Ino Inga Ndalikwabilila Buti Kukucitwa naa Kwaambilwa Zyintu Ziletela Muzeezo Wakoonana?

Bwiinguzi bwamu Bbaibbele

Amulange-lange mizeezo eeyi iigwasya iiyeeme abusongo bujanika mu Bbaibbele:

1. Amucite mbuli mbobacita basimakwebo. Kamuseka-seka alimwi akubalemeka mbomubeleka limwi, pele amucitantamuke cilongwe citondezya kuti mulakonzya kuzumina koonana ambabo.​—Matayo 10:16; Bakolose 4:6.

2. Kamusama cabulemu. Kusama zisani zitali zyabulemu cipa muzeezo uutaluzi kubantu bamulangilila. Ibbaibbele likulwaizya kusama “cabulemu alimwi acakulibatamika.”​—1 Timoteyo 2:9.

3. Amube abalongwe bali kabotu. Kuti kamujanika abantu batalilemeki, andinywe mulalangilwa kucitwa zyintu eezyo nzyobabacita beenzinyoko.​—Tusimpi 13:20.

4. Amwiikake mibandi iitali kabotu. Amuzwe abusena aawo kuti naa mumubandi kwatalika kwaambwa “makani aabufwubafwuba naa kwaamba masesya aajatikizya zitondwa.”​—Baefeso 5:4.

5. Mutanoojaniki mubukkale bukonzya kumuletela penzi. Mucikozyanyo, amucenjele kuti muntu wamulomba kuti musyaalizye kumulimo mwakotoka kakunyina akaambo kalimvwisya.​—Tusimpi 22:3.

6. Mweelede kwaamba cakusinizya alimwi cakutainda mumbali. Ikuti muntu watalika kumucita naa kumwaambila zyintu ziletela muzeezo wakoonana, amumwaambile kuti tamuyandi. (1 Bakolinto 14:9) Mucikozyanyo, mulakonzya kwaamba kuti: “Mwatalika kaindi kundiguma, tandiyandi ncomucita eeco.” Mulakonzya kumulembela lugwalo muntu ooyu kumwaambila zyintu zyakacitika, mbomwakalimvwa, alimwi ancomuyanda lino. Amumwaambile cakusalazya kuti nzyomucita ziyeeme azyintu nzyomusyoma kujatikizya kulilemeka alimwi abukombi.​—1 Batesalonika 4:3-5.

7. Amulombe lugwasyo. Ikuti muntu ooyo wazumanana, amwaambile mweenzinyoko ngomusyoma, wamumukwasyi, naa ngomubeleka limwi naa muntu ulaaluzyibo mukugwasyilizya bantu bacitwa naa kwaambilwa zyintu ziletela muzeezo wakoonana. (Tusimpi 27:9) Bantu banji bapenzyegwa munzila eeyi balajana lugwasyo kwiinda mumupailo. Nokuba kuti tamuna buzuba mwapaila, tamweelede kuubya lugwasyo ndomukonzya kujana kuli Jehova, “siluumbulizyo loonse.”​—2 Bakolinto 1:3.

Kucitwa naa kwaambilwa zyintu ziletela muzeezo wakoonana kupa kuti bantu banji kabatabeleki kabotu kumulimo, pele Bbaibbele lilakonzya kugwasya.