Ino Munyama Uujisi Mitwe Iili Ciloba Waambwa mu Ciyubunuzyo Caandaano 13 Wiiminina Nzi?
Bwiinguzi bwamu Bbaibbele
Munyama uujisi mitwe iili ciloba waambwa mu Ciyubunuzyo 13:1 wiiminina bweende bwatwaambo twacisi munyika yoonse.
Munyama ooyu ulaabweendelezi, nguzu alimwi acuuno cabwami, calo icitondezya kuti wiiminina bweende bwatwaambo twacisi.—Ciyubunuzyo 13:2.
Uleendelezya “misyobo yoonse amikowa yoonse amyaambo yoonse amasi oonse,” aboobo ulijisi nguzu kwiinda mfwulumende yacisi comwe.—Ciyubunuzyo 13:7.
Munyama ooyu ulijisi bube bwazinyama izyaambwa mubusinsimi bulembedwe mubbuku lya Daniele 7:2-8, kubikkilizya ambwalibonya siluwe, zituta zyanengo, mulomo wamulavu alimwi ameja aali kkumi. Banyama bamubusinsimi bwa Daniele bazyibidwe kuti baiminina bami bagaminide, naa mami aatwaambo twacisi, aayendelezya cakutobelana aamami aambi. (Daniele 7:17, 23) Aboobo munyama waambwa mu Ciyubunuzyo caandaano 13 wiiminina bweende boonse bwatwaambo twacisi.
Munyama ooyu ‘uzwa mulwizi.’ Eeci caamba kuti mfwulumende zyabantu zizwa kubantu balo ibakazya Leza alimwi taziko miyanda.—Ciyubunuzyo 13:1; Isaya 17:12, 13.
Bbaibbele lyaamba kuti namba, naa zina lya munyama yakuti—666—“ninamba yamuntu.” (Ciyubunuzyo 13:17, 18) Majwi aaya atondezya kuti munyama waambwa mu Ciyubunuzyo 13 wiiminina bulelo bwabantu ikutali muuya naa bulelo bwamadaimona.
Nokuba kuti zisi zilakonzya kumvwana muzintu zimwi, zilakamantana mumakanze ngozijisi aakuzumanana kuba anguzu zyakweendelezya muciindi cakulibombya kubweendelezi bwa Bwami bwa Leza. (Intembauzyo 2:2) Alimwi ziyootola lubazu mukulwana mpi zya Leza iziyoosololelwa a Jesu Kristo lya Armageddon, pele nkondo eeyi iyoonyonyoona zisi.—Ciyubunuzyo 16:14, 16; 19:19, 20.
“Meja aali kkumi amitwe iili ciloba”
Mu Bbaibbele, manamba aamwi alabelesyegwa munzila yacikozyanyo. Mucikozyanyo, 10 alimwi a 7 aiminina kuzulila. Cikonzya kutugwasya kapati kuzyiba ncaamba “meja aali kkumi amitwe iili ciloba” yamunyama waambwa mu Ciyubunuzyo 13, nkuzyiba “cikozyanyo camunyama” iwaambwa alimwi mu Ciyubunuzyo—munyama uusalala pyu uujisi mitwe iili ciloba ameja aali kkumi. (Ciyubunuzyo 13:1, 14, 15; 17:3) Bbaibbele lyaamba kuti mitwe iili ciloba yamunyama ooyu uusalala pyu yiiminina “bami bali ciloba,” naa mfwulumende.—Ciyubunuzyo 17:9, 10.
Mbubwenya buyo, mitwe iili ciloba yamunyama waambwa mu Ciyubunuzyo 13:1 yiiminina mfwulumende zili ciloba: nkokuti bweendelezi bwanguzu ibwali kweendelezya kuzwa kaindi alimwi bwali kupenzya bantu ba Leza—Egepita, Asuri, Babuloni, Mediya a Persia, Greece, Roma alimwi a Anglo-America. Kuti makani twaakosola kuti meja aali kkumi aiminina zisi zyoonse izilyeendelezya, ziniini alimwi azipati, nkokuti musini uuli alwija lumwi alumwi utondezya kuti cisi cimwi acimwi cilalyeendelezya aciindi bweendelezi bujisi nguzu kapati nobweendelezya.