Nkaambo Nzi Ncondeelede Kuzikaka Zintu Ziletela Muzeezo Wakoonana?

Sena mulakonzya kuzikaka?

Ikuti naa mulabelesya Intaneti, amulangile kujana musyobo umwi wazintu ziletela muzeezo wakoonana. Musimbi wazina lya Hayley, uujisi myaka iili 17 waamba kuti: “Taziyandaulwi buya, muciindi caboobo zyalo nzyezikuyandaula.”

Zintu ziletela muzeezo wakoonana zilakonzya kubasunka nobaba baabo ibakanzide kuzikaka. Musankwa wazina lya Greg, uujisi myaka iili 18 waamba kuti: “Ndakalisinizyide kuzumanana kulikwabilila, pele cakandaalila kuzumanana kucita oobo. Tokonzyi kwaamba kuti tacikandicitikili.”

Mazuba aano, zintu ziletela muzeezo wakoonana tazikatazyi kujana. Alimwi akaambo kakuti cilakonzyeka kutuminana tugwalo naa zifwanikiso ziletela muzeezo wakoonana afooni, bakubusi banji balalipangila alimwi akutuma zintu ziletela muzeezo wakoonana izyabo beni.

Masimpe ngakuti: Mujisi buyumuyumu bupati ibwiinda boobo mbobakajisi bazyali naa bamakaapanyoko nobakali aciimo canu. Pele mubuzyo ngwakuti, sena mulakonzya kuzikaka zintu ziletela muzeezo wakoonana?​—Intembauzyo 97:10.

Bwiinguzi mbwakuti inzya​—ikuti mwasala kucita oobo. Pele cakusaanguna mweelede kuzumina kuti zintu ziletela muzeezo wakoonana tazili kabotu. Atulange-lange makani aakubeja alimwi aamasimpe kujatikizya makani aaya.

Makani aakubeja alimwi aamasimpe

Makani aakubeja: Zintu ziletela muzeezo wakoonana tazikonzyi kundiletelela.

Makani aamasimpe: Zintu ziletela muzeezo wakoonana zipa mizeezo yako kuba mbubwenya mapunga aasikufweba mbwabede. Zilasofwaazya. Zyuubya-ubya cintu Jehova ncaakalenga calo icipa bantu bobilo kukamantana. (Matalikilo 2:​24) Mukuya kwaciindi, zilakonzya kumupa kuubya-ubya mbomuzilanga zintu ziluzi azitaluzi. Mucikozyanyo, basyaazibwene bamwi baamba kuti bamaalumi ibajisi cilengwa cakweebelela zintu ziletela muzeezo wakoonana balalangilwa kuti taakwe mbobakonzya kulimvwa kujatikizya makani aakuuma bamakaintu.

Bbaibbele lilaamba kujatikizya bantu ‘batacijisi nsoni naaba aniini mubukkale bwabo.’ (Baefeso 4:19) Manjezyeezya aabo alaleka kubeleka cakuti tabalipi mulandu kujatikizya zintu zibi nzyobacita.

Makani aakubeja: Zintu ziletela muzeezo wakoonana zilakonzya kukuyiisya makani aakoonana.

Makani aamasimpe: Zintu ziletela muzeezo wakoonana ziyiisya muntu kulikondelezya lwakwe mwini. Zipa bantu kuba mbuli zibelesyo buyo calo icaamba kuti baponena buyo kukondelezya baabo bazyeebelela. Aboobo, tacigambyi kuti mubuvwuntauzi bumwi kwakajanwa kuti bantu bajisi cilengwa cakweebelela zintu ziletela muzeezo wakoonana tabalangilwi kujana lukkomano mumakani aakoonana baakukwata naa kukwatwa.

Bbaibbele lyaambila Banakristo kukaka “bwaamu, busofwaazi, luunyaunya, kunyomenena zintu zibi, alimwi abusyaacivwulemwangu”​—zintu zyoonse eezyi zilakonzya kuboola akaambo kakweebelela zintu ziletela muzeezo wakoonana.​—Bakolose 3:5.

Makani aakubeja: Aabo ibatayandi zintu ziletela muzeezo wakoonana mbakandu kubandika makani aakoonana.

Makani aamasimpe: Bantu ibakaka zintu ziletela muzeezo wakoonana balakulemeka koonana. Bakubona kuti ncipego kuzwa kuli Leza icipa mwaalumi amukaintu ibakwetene kukamantana alimwi akubikkilana maano. Aabo ibakubona munzila iili boobu balalangilwa kukkomana kapati caboola kukoonana baakukwata naa kukwatwa.

Bbaibbele taliindi mumbali nolyaamba makani aakoonana. Mucikozyanyo, lyaambila bamaalumi kuti: “Kokkomana amukaintu wakubukubusi bwako . . . Luyando lwakwe alukutolele moyo ciindi coonse.”​—Tusimpi 5:​18, 19.

Mbomukonzya kuzikaka zintu ziletela muzeezo wakoonana

Ino mbuti kuti mwabona kuti sunko lyakweebelela zintu ziletela muzeezo wakoonana lyamuyumina kulilwana? Pepa lyakulembela lyakuti “Mbomukonzya Kuzikaka Zintu Ziletela Muzeezo Wakoonana” lilakonzya kumugwasya.

Tumusyomezya kuti mulakonzya kuzikaka zintu ziletela muzeezo wakoonana. Alimwi mulakonzya kwiiya kucileka kweebelela zintu eezyi kuti naa mulazyeebelela. Kucita boobo cilakonzya kumugwasya kapati.

Amulange-lange cakuluula ca Calvin iwakazumina kuti wakatalika kweebelela zintu ziletela muzeezo wakoonana naakajisi myaka iili 13. Waamba kuti: “Ndakalizyi kuti tiicakali kabotu, pele cakali kundaalila kutazyeebelela. Aboobo ndamana kuzyeebelela, tiindakali kulimvwa kabotu. Mukuya kwaciindi, bataata bakazyiba, alimwi kwaamba masimpe, ndakalimvwa kwaanguluka! Kumamanino, ndakajana lugwasyo ndondakali kuyanda.”

Calvin wakaiya kuzikaka zintu ziletela muzeezo wakoonana. Waamba kuti: “Kweebelela zintu ziletela muzeezo wakoonana kwakali kulubizya kupati ikucindipenzya asunu nkaambo zintu nzyondakali kweebelela inga zilaboola mumizeezo yangu. Alimwi zimwi ziindi inga ndilasunkwa ikuyeeya nzyondikonzya kubona ikuti ndayanda kuti ndeebelele zintu nzyonditeelede kweebelela. Pele inga ndiyeeya mbondikonzya kuba alukkomano alimwi akusalala alimwi azintu mbozikonzya kundibotela kumbele kuti ndacita zintu zikonzya kukkomanisya Jehova.”