LUGWASYO KUMUKWASYI
Mbomukonzya Kukweendelezya Kunyema Kwanu
Ngomukwetene limwi wamwaambila naa kumucitila cintu camunyemya, mwasoleka kulisisa kuti camucisa. Pele wazyiba kuti kuli calubila alimwi watalika kumubuzya-buzya kutegwa azyibe. Eeci capa kuti ciindile kumucisa. Ino mbuti mbomukonzya kukweendelezya kunyema kwanu kuti zintu zyaba boobo?
Ncomweelede kuzyiba
Kunyema kulakonzya kunyonganya buumi bwanu. Buvwuntauzi butondezya kuti kunyema kwakutalijata kulakonzya kupa muntu kuciswa BP, bulwazi bwamoyo, kutyompwa alimwi amapenzi aamwida. Kunyema kupa muntu kuba apenzi lyacilabila, kulibilika kapati, malwazi aalukanda, alimwi akulebuka mubili. Bbaibbele lilapa kaambo kabotu nolyaamba kuti: “Koleka kunyema . . . , nkaambo eeco inga cakusololela buyo kucibi.”—Intembauzyo 37:8, bupanduluzi buyungizyidwe.
Kulisisa kuti camucisa alyalo lilakonzya kuba penzi. Kuti kunyema kwalekelwa kuti kuzumanane inga kwakozyanisyigwa abulwazi buli mumubili pele ibutalibonyi aanze. Mucikozyanyo, mulakonzya kuba amuuya wakuyeeya kuti bantu boonse tabali kabotu. Muuya uuli boobu inga wapa kuti cimuyumine kupona abantu alimwi inga wanyonganya cikwati canu.
Ncomweelede kucita
Amubikkile maano kubube bubotu mbwajisi ngomukwetene limwi. Amulembe zintu zyotatwe nzyomukkomanina kujatikizya ngomukwetene limwi. Ciindi mwaakunyema, amukaziyeeye zintu eezyi zyotatwe. Eeci ciyoomugwasya kukweendelezya kunyema.
Njiisyo yamu Bbaibbele: “Amutondezye kulumba.”—Bakolose 3:15.
Amube amuuya wakulekelela. Cakusaanguna amusoleke kulanga zintu mbuli mbwazilanga ngomukwetene limwi. Eeci ciyoomugwasya kuba ‘alweetelelo.’ (1 Petro 3:8) Cabili, amulibuzye kuti, ‘Sena kaambo kandipa kunyema nkapati cakuti cilandaalila kulekelela?’
Njiisyo yamu Bbaibbele: ‘Ncibotu . . . kujatila milandu.’—Tusimpi 19:11.
Amwaambe mbomulimvwa calubomba alimwi cabupampu. Amube acilengwa cakulibikkilizya. Mucikozyanyo, muciindi cakwaamba kuti, “Eeci ncotaambi nkobede citondezya kuti tondibikkili maano,” amwaambe kuti, “Ndilalibilika kapati ikuti kwasiya kanditazyi nkobede.” Kwaamba mbomulimvwa cabubombe kulakonzya kulakonzya kumugwasya kukweendelezya kunyema kwanu.
Njiisyo yamu Bbaibbele: “Majwi aanu kaakondelezya lyoonse, aalweezyedwe kabotu amunyo.”—Bakolose 4:6.
Amuswiilile cabulemu. Nomwamana kwaamba, amumulekele ngomukwetene limwi kuti aingule kakunyina kumunjila mukanwa. Amana kwaambaula, amutulange-lange twaambo ntwaamba akubona naa mwatumvwisya. Kuswiilila kulakonzya kugwasya kapati kukweendelezya kunyema kwanu.
Njiisyo yamu Bbaibbele: ‘Amufwambaane kuswiilila, akumuka kwaambaula.’—Jakobo 1:19.