BAKUBUSI BALABUZYA
Nkaambo Nzi Lyoonse Ncondilubizya Mukwaambaula?
“Zimwi ziindi ndilaujata mulaka, pele ziindi zimbi cilibonya mbuli kuti ndaamba cakutayeeya!”—James.
“Ikuti ndalibilika, ndilaamba kakunyina kuyeeya, pele kuti kandiliibide ndilaciindizya kwaambaula. Aboobo, ciindi coonse ndilalubizya.”—Marie.
Bbaibbele lyaamba kuti: “Mulaka uli mbuli mulilo.” Eelo “takaliceeli kaka kalilo ikaumpa syokwe pati!” (Jakobo 3:5, 6) Sena majwi aanu kanji-kanji amupa kulubizya? Ikuti kacili boobo, cibalo eeci cilakonzya kumugwasya.
Nkaambo nzi ncondilubizya mukwaambaula?
Kutalondoka. Bbaibbele lyaamba kuti: “Toonse tulalubizya ziindi zinji. Ikuti naa kuli uutalubizyi mukwaambaula, ooyo muntu ulilondokede.” (Jakobo 3:2) Akaambo kakuti tatulondokede, tulakonzya kulinontola ciindi notweenda alimwi akulubizya ciindi notwaambaula.
“Mbwaanga tandilondokede, inga caba cabufwubafwuba kwaamba kuti inga ndaweendelezya mulaka wangu munzila iilondokede.”—Anna.
Kuciindizya kwaambaula. Bbaibbele lyaamba kuti: “Mukuvwula kwamajwi takubuli kulubizya.” (Tusimpi 10:19) Bantu baciindizya kwaambaula alimwi akutaswiilila balalangilwa kulubizya ciindi nobaambaula.
“Bantu baambaulisya tacaambi kuti lyoonse mbobasongo. Jesu ngomusongo kwiinda muntu uuli woonse wakapona anyika, nokuba boobo talili lyoonse naakali kwaambaula.”—Julia.
Kufwubaazya. Bbaibbele lyaamba kuti: “Majwi aambwa cakutayeeya alayasa mbuli panga.” (Tusimpi 12:18) Cikozyanyo cimwi cakwaamba cakutayeeya nkufwubaazya nkokuti, ikubelesya majwi aacisizya bamwi moyo alimwi aakunyansya. Bantu babelesya majwi aakufwubaazya balakonzya kwaamba kuti, “Ndali kusobana buyo!” Pele kufwubaazya bamwi taali makani aasesya. Bbaibbele litwaambila kutabelesya “majwi aakusampaula antoomwe abubi buli boonse.”—Baefeso 4:31.
“Ndiyandisya kwaamba masesya, bube busololela kukufwubaazya, calo kanji-kanji icindipa kulubizya mukwaambaula.”—Oksana.
Mbubwenya mbocitakonzyeki kujosya musamu wakucumbya meno iwazwa kale mutyuubbu, tacikonzyeki kujosya kaambo ikaambwa kale
Kweendelezya mulaka
Tacili cuuba-uba kwiiya kweendelezya mulaka, pele njiisyo zyamu Bbaibbele zilakonzya kumugwasya. Mucikozyanyo, amulange-lange njiisyo zitobela.
“Amulyaambauzye mumyoyo yanu, . . . akuumuna.”—Intembauzyo 4:4.
Zimwi ziindi icikonzya kugwasya kapati nkuumuna buyo. Mukaintu wazina lya Laura wakaamba kuti: “Mbondilimvwa ciindi nondinyemede kulakonzya kwiindana ambondilimvwa kwainda ciindi. Moyo wakkalikana, inga ndilikkomene akaambo kakucikonzya kulijata.” Nokuba kuumuna asyoonto buyo kulakonzya kumugwasya kutegwa mutalubizyi.
“Sena kutwi takusoli majwi mbubonya mulaka mboulabila cakulya?”—Jobu 12:11.
Mulakonzya kweeleba mapenzi ikuti mwazyiba cili mumoyo wanu kwiinda mukulibuzya mibuzyo iitobela:
Sena ncamasimpe? Sena tacicisizyi moyo? Sena cilayandika kucaamba?—Baroma 14:19.
Ino inga ndalimvwa buti ikuti naa umwi wandaambila majwi aayo?—Matayo 7:12.
Sena cilatondezya kuti ndilacilemeka ncaamba umwi?—Baroma 12:10.
Sena eeci nceciindi ceelede cakuti ndicaambe?—Mukambausi 3:7.
“Amucite zintu zyoonse cakulicesya akubona bamwi kuti balamwiinda.”—Bafilipi 2:3.
Lulayo oolu luyoomugwasya kuba amizeezo mibotu kujatikizya bamwi, calo ciyoomupa kujata mulaka akuyeeya kamutanaambaula. Nokuba kuti mwalubizya kale akwaamba majwi aacisizya moyo, kulicesya kuyoomugwasya kulilekelela cakufwambaana. (Matayo 5:23, 24) Aboobo, aabe makanze aanu aakweendelezya mulaka wanu.