Sena Mali Ngomuyanda Wamisyobo Yoonse Yazintu Zibyaabi?

Bwiinguzi bwamu Bbaibbele

Peepe. Bbaibbele talyaambi kuti mali mabi, naa kuti ngaapa kuti zintu zyoonse zibi kazicitika. Ikwiile kuzubulula buyo mabala aamu Bbaibbele aakuti “mali ngomuyanda wamisyobo yoonse yazintu zibyaabi” takuzulide pe alimwi kulanyonganya. Mubwini Bbaibbele lyaamba kuti “kuyandisya mali ngomuyanda wamisyobo yoonse yazintu zibyaabi.”—1 Timoteyo 6:10.

Ino Bbaibbele lyaamba nzi kujatikizya mali?

Bbaibbele lyaamba kuti, ikuti mali abelesyegwa kabotu, alakonzya kugwasya alimwi alakonzya kuba ‘cilikwabilizyo.’ (Mukambausi 7:12) Kuyungizya waawo, lilabalumbaizya aabo ibatondezya bwaabi kuli bamwi, calo cibikkilizya akupa bamwi mali.—Tusimpi 11:25.

Aciindi ncomunya, Bbaibbele licenjezya kuti tatweelede kwaabikka kumbele mali mubuumi bwesu. Lyaamba kuti: “Ibukkale bwanu butabi bwakuyandisya mali pe, pele amukkutile azintu nzyomujisi lino.” (Bahebrayo 13:5) Ncotwiiya ncakuti, tweelede kubikka mali mubusena bwangawo alimwi akutayandisya kuvwuba. Aboobo tweelede kukkutila azintu nzyotuyandika, mbuli cakulya, zyakusama alimwi abusena bwakukkala.—1 Timoteyo 6:8.

**Nkaambo nzi Bbaibbele ncolitucenjezya kujatikizya kuyandisya mali?**

Basyaacivwulemwangu tabakabi abuumi butamani. (Baefeso 5:5) Cili boobo akaambo kakuti busyaacivwulemwangu nkukomba mituni naa mbukombi bwakubeja. (Bakolose 3:5) Kaambo kambi nkakuti, kwiinda mukusolekesya kuti bajane zintu nzyobalombozya, kanji-kanji basyaacivwulemwangu tabatobeli zyeelelo zibotu. Lugwalo lwa Tusimpi 28:20 lwaamba kuti: ‘Aabo bafwamvwaanya kujana buvwubi tabakoozumanana kubula mulandu.’ Balakonzya kusunkwa kucita milandu mbuli cisinka mulomo, bumpelenge, kubba bantu nokuba kujaya.

Nokuba kuti kuyandisya mali inga tiikwasololela kubukkale bubi, kulakonzya kuleta mapenzi aamwi. Bbaibbele lyaamba kuti “aabo bakanzide kuvwuba banjila mumasunko alimwi balacegwa mukakole amuzisusi zinji zyabufwubafwuba.”—1 Timoteyo 6:9.

Mbuti mbotukonzya kugwasyigwa alulayo lwamu Bbaibbele lujatikizya mali

Ikuti twazumanana kucita zintu nzyotuzyi kuti zilamukkomanisya Leza nokuba kuti tulijisi mali, tunoolemekwa akukkomaninwa a Leza alimwi unootugwasyilizya. Kuli baabo basolekesya kumukkomanisya, Leza usyomezya kuti: “Ziyume zitete, tandikakusiyi pe alimwi tandikakulekelezyi pe.” (Bahebrayo 13:5, 6) Alimwi utusyomezya kuti “muntu uusyomeka uyoojana zileleko zinji.”—Tusimpi 28:20.

Tupango Twamu Bbaibbele Twaamba Kujatikizya Mali

Mukambausi 7:12: ‘Mali alakwabilila.’

Bupanduluzi: Ikuti abelesyegwa cabusongo, mali alakonzya kugwasya nkaambo alatukwabilila zimwi ziindi.

Luka 12:15: “Nokuba kuti muntu kajisi zintu zinji buti, ibuumi bwakwe tabuzwi kuzintu eezyo nzyajisi.”

Bupanduluzi: Mali taali ncecintu ciyandika kapati mubuumi, alimwi takonzyi kupa kuti tukafwutuke.

1 Timoteyo 6:10: “Kuyandisya mali ngomuyanda wamisyobo yoonse yazintu zibyaabi, eelyo kwiinda mukuba aluyandisisyo luli boobu bantu bamwi baleya kulusyomo alimwi baliyasaula koonse-koonse amacise manji.”

Bupanduluzi: Mali kwaagama taali mabi pe. Pele bantu bayandisya mali, ibaabikkila maano kapati mubuumi bwabo, baliletela mapenzi lwabo beni mbuli, kwaandaana kwamikwasyi alimwi akutaba abuumi buli kabotu akaambo kakuciindizya kubeleka.

Bahebrayo 13:5: “Ibukkale bwanu butabi bwakuyandisya mali pe, pele amukkutile azintu nzyomujisi lino.”

Bupanduluzi: Muciindi cakubikka buumi muntenda akaambo kakuyandisya buvwubi, ncabusongo kukkutila azintu nzyotuyandika ncobeni.

Matayo 19:24: “Ncuuba-uba kunkamela ikwiinda mukapulo kanyeleti kwiinda mbocibede kumuntu muvwubi kunjila mu Bwami bwa Leza.”

Bupanduluzi: Jesu wakazwide aakutamba mwaalumi muvwubi kuti amutobele. Mwaalumi ooyu wakakaka akaambo kakuti moyo wakwe wakali kulubono lwakwe. Aboobo Jesu wakali kutucenjezya buya. Muntu uubikka buvwubi kumbele kwiinda Leza ubikka buumi bwakwe muntenda yakusweekelwa buumi butamani.