Amubaambile Kuti Mulabayanda

Ba Ong-li Mbaakamboni ba Jehova ku Bulgaria. Bakali kwiiya Bbaibbele aba Zlatka, pele balumi babo tiibakali kubasangana. Ba Ong-li bakaamba kuti: “Notwakali kubandika makani aabuumi bwamumukwasyi, ndakakankaizya mbociyandika kwaambila mbotukwetene limwi alimwi abana kuti tulabayanda. Kabauside ba Zlatka bakandilanga akwaamba kuti tabanabaambilide balumi babo alimwi amwanaabo musimbi uujisi myaka iili fwuka kuti balabayanda!”

Ba Zlatka bakapandulula kuti, “ndililibambilide kubacitila kufwumbwa ncobayanda, pele cilandiyumina kubaambila kuti ndilabayanda.” Bakayungizya kuti, “bamaama tabanabuzuba bandaambila kuti balandiyanda, mpoonya abalo bakaapa kunyina nobakaambilide bamaama kuti balabayanda.” Ba Ong-li bakapanduluda ba Zlatka kuti Jehova cakupozya wakaambila Jesu kuti ulamuyanda. (Matayo 3:​17) Bakakulwaizya ba Zlatka kwaapailila makani aaya akulibikkila mbaakani yakwaambila balumi babo alimwi amwanaabo kuti balabayanda.

Ba Ong-li bakaamba kuti: “Nokwakainda mazuba obilo, ba Zlatka calukkomano bakandaambila kuti bakapaila kuli Jehova. Ciindi balumi babo nobakasika kuŋanda, bakabaambila kuti bakaiya mu Bbaibbele mbociyandika kubalemeka akubayanda. Aboobo, bakaumuna asyoonto mpoonya bakabaambila kuti balabayanda kapati! Mwanaabo naakasika aŋanda, ba Zlatka bakamukumbata akumwaambila kuti balamuyanda! Ba Zlatka bakandaambila kuti: ‘Lino ndilimvwa kulemununwa. Myaka yoonse yainda, kunyina nondakaambide mbondilimvwa, pele lino kwiinda mukwaapailila makani aaya, ndacikonzya kwaambila bamukwasyi wangu kuti ndilabayanda.’

Ba Ong-li bakayungizya kuti: “Nokwakainda nsondo yomwe, ndakaswaangana abalumi baba Zlatka. Bakandaambila kuti: ‘Bantu banji bandaambila kuti ndibakasye ba Zlatka kwiiya Bbaibbele andinywe, pele ndajana kuti mukwasyi wesu wagwasyigwa kapati akaambo kakwiiya Bbaibbele nkobacita. Lino kuli luyando alukkomano mumukwasyi wesu.’”