Sena Kuli Ntenda Iiliko Mukulikondelezya Azintu Zijatikizya Mizimo?

Ino muyeeya buti?

• Sena kuli ntenda iiliko mukubuzya-buzya basikupandulula bweende bwanyenyeezi, basikuuma nkakata naa basikupandulula tweengo twamumaanza?

• Sena makani aamba zyamizimo ntwaano buyo, naa makani aakacitika ncobeni alimwi aakonzya kumubikka muntenda?

Cibalo eeci cilalanga-langa kaambo zintu zijatikizya mizimo ncozikonzya kulibonya mbuli kuti zili kabotu alimwi ancomweelede kuzicenjelela.

• Nkaambo nzi ncobazikkomanina?

• Nkaambo nzi ncomweelede kucenjela?

• Ncomukonzya kucita

• Nzyobaamba beenzinyoko

Nkaambo nzi ncobazikkomanina?

Basikupanga zyakulikondelezya bali mukujana mali manji kwiinda muzintu zisumpula mizimo zijanika mumafilimu, a TV, muzisobano zyaakkompyuta alimwi amumabbuku. Aboobo eeci capa kuti bakubusi banji kabazikkomanina zintu mbuli kupandululwa kwabweende bwanyenyeezi, madaimona, zyeelo alimwi abulozi. Ino nkaambo nzi? Twaambo tubikkilizya:

• Kuyandisisya kuzyiba zinji: Kuyanda kuzyiba naa myuuya nkoili ncobeni

• Kulibilika: Kuyanda kuzyiba ziyoocitika kumbele

• Kubandika: Kuyanda kubandika abayandwa ibakafwa

Twaambo ootu tatulubide pe. Mucikozyanyo, tacilubide kulibilika kujatikizya zyakumbele naa kuyeeya muyandwa iwakafwa. Pele kuli ntenda nzyomweelede kuzyiba.

Nkaambo nzi ncomweelede kucenjela?

Bbaibbele lilatucenjezya canguzu kujatikizya cintu cili coonse ciswaangene amizimo. Mucikozyanyo lyaamba kuti:

“Takweelede kujanwa akati kanu . . . muŋanga, simasalamuzi, sibusangu, mulozi, simabibo, muntu uubuzya makani kubaŋanga, simaloto naa muntu uubuzya makani kubafwu. Nkaambo kufwumbwa muntu uucita zintu eezyi ncisesemyo kuli Jehova.”​—Deuteronomo 18:10-​12.

Ino nkaambo nzi Bbaibbele canguzu ncolikasya zintu zijatikizya mizimo?

• Mizimo ipa kumvwana amadaimona. Bbaibbele liyiisya kuti bangelo bamwi bakazangila Leza akuba basinkondonyina. (Matalikilo 6:2; Juda 6) Bangelo aaba babyaabi, ibaitwa kuti madaimona, beena bantu kwiinda mukubelesya baŋanga alimwi abasikupandulula bweende bwanyenyeezi. Kucita zintu eezyi inga kwapa kuti tube balongwe abasinkondonyina a Leza.

• Mizimo isumpula makani aakubeja aakuti bantu balakonzya kuzyiba ziyoocitika kumbele. Pele Leza alikke nguukonzya kwaamba kuti: “Kuzwa kumatalikilo ndaambila limwi ciyoocitika kumbele, alimwi kuzwa kaindi ndaambila limwi zintu zitanacitika.”​—Isaya 46:10; Jakobo 4:13, 14.

• Mizimo ikulwaizya makani aakubeja aakuti bafwide balakonzya kwaambaula abaumi. Pele Bbaibbele lyaamba kuti: “Bafwide tabazyi cintu nociba comwe . . . Kunyina mulimo naa kuyeeya noluba luzyibo naa busongo mu Cuumbwe.”​—Mukambausi 9:​5, 10.

Akaambo katwaambo ootu, Bakamboni ba Jehova tabajatikizyigwi muzintu ziswaangene amizimo. Kunze lyaboobo, tabatoli lubazu muzyakulikondelezya zibikkilizya bantu baungudwe, zyeelo alimwi azimwi buyo zijatikizya mizimo. Mukubusi umwi wazina lya Maria wakaamba kuti, “Ikuti filimu imwi kaijatikizya mizimo, nkokuti tandeelede kuyeebelela.”a

Ncomukonzya kucita

• Amukanze “kuba amanjezyeezya aasalala” kuli Jehova kwiinda mukutantamuka micito iili yoonse naa zyakulikondelezya zijatikizya mizimo.​—Milimo 24:16.

• Amucisowe cintu cili coonse ncomujisi iciswaangene amizimo. Amubale Milimo 19:19, 20, akubona cikozyanyo cibotu ncobakasiya Banakristo bamumwaanda wamyaka wakusaanguna cijatikizya makani aaya.

Mutalubi kuti: Ciindi nomutantamuka micito azyakulikondelezya zijatikizya mizimo, musala kuba kulubazu lwa Jehova. Kucita boobo kukkomanisya moyo wakwe.​—Tusimpi 27:11.