Gulu wa Nswi Iitegwa Hagfish

Kuzwa kaindi, basayaansi abamana maano makani aajatikizya gulu uuzwa kunswi iitegwa hagfish. Nkaambo nzi ncobayanda kwaazyiba makani aaya? Gulu uuzwa kunswi eeyi waambwa kuti “muuba kapati kwiinda magulu oonse aazyibidwe.”

Amulange-lange: Nswi eeyi ikkala kunsi kwini mulwizi. Ikuti yaba muntenda yakuyanda kulumwa azilenge zimwi, nswi eeyi igusya mamina mutubeela tumwi. Mamina aaya ajisi misyobo minji kapati yama protein, mane amwi ali mbuli tutambo tulamfwu. Mpoonya kuti ma protein aaya asangana, apa kuti maanzi aangane akuba gulu. Gulu ooyu ulajatilila kuzilakula zyazilenge eezyo ziyanda kwiiluma nswi eeyi. Eeci cipa kuti ziilekezye nswi akuccija.

Gulu wanswi eeyi ulilibedelede. Katambo komwe ikajisi ma protein, nkasyoonto kapati kwiinda kasusu, pele nkayumu ziindi zili kkumi kwiinda nylon. Kuti naa asindilwa mumaanzi, mamina alimwi atutambo ootu zipanga tuntu tuli mbuli nsefwa iingene ziindi zyotatwe. Tuntu ootu tulakonzya kujata maanzi aalema ziindi zili 26,000 kwiinda mbotulema twalo. Mubwini, cibeela cipati cagulu ooyu, maanzi!

Basayaansi baalilwa kupanga gulu uuli mbuli gulu wanswi eeyi. Sikuvwuntauzya uumwi wakaamba kuti: “Cilakatazya kumvwisya mboilipanga gulu eeyi.” Nokuba boobo, basayaansi bayanda kupanga tutambo tujisi ma protein, kubelesya ma bacteria. Makanze aabo ngakupanga cintu cuuba, citakonzyi kuyauka, ciladamuka alimwi citakonzyi kubola. Tutambo ootu tulakonzya kubelesyegwa kupanga zintu kwaambisya nkobapangila zisani alimwi amumakani aabusilisi. Masimpe, gulu ngwakonzya kupanga muntu ulakonzya kubelesyegwa munzila zinji.

Ino muyeeya buti? Sena gulu wanswi iitegwa hagfish wakasanduka buya? Naa wakalengwa buya?