Heather Broccard-Bell/iStock via Getty Images
SENA CAKALENGWA BUYA?
Cipapa ca Cuuka Citegwa Syaankumbula Mazi
Cuuka citegwa syaankumbula mazi (Phloeodes diabolicus) cijanika ku North America nkoili kumbo. Basikuvwuntauzya bakajana kuti, cuuka eeci cilakonzya kubweza mukuli uulema ziindi zibalilwa ku 39,000 kwiinda mubili wancico alimwi cilakonzya kufwutuka nokuba kuti calyatwa amoota uubalika. Mbuti cuuka eeci mbocikonzya kubweza zintu zilema boobu?
Cipapa casyaankumbula mazi mpocili atala alimwi aansi cilijisi mifwolo yalo iswaanganina akati. Akati kamifwolo eeyi kuli musyobo umwi uutanyonyooki nokuba kuti walimbwa cintu cimwi, eeci cipa kuti zizo ziyandika kapati kazikwabililwa. Kumane wabili ulabbenda, alimwi ncuuba-uba kunyonyooka. Mpoonya watatu upa kuti cipapa casyaankumbula mazi kaciswena. Kunyoneka kwamusyobo wamufwolo watatu kupa kuti cuuka eeci kacicikonzya kunjila kunsi aamakwa aacisamu naa kuyuba akati kamabwe aasyaankene.
Kuyungizya waawo, cipapa casyaankumbula mazi ciswaanganina mpocili akati calo cipa kuti kacinjilana kabotu mbuli tubeela-beela twa jigsaw puzzle, kumane eeci cipa kuti kacicikonzya kunyamuna mukuli uuli woonse. Mifwolo yancinco ipangidwe aatubeela-beela twalo tuswaanganizyidwe kabotu amapuloteni. Ikuti cuuka eeci calicisa, mapuloteni alacigwasilizya kufwambaana kupona alimwi akupa kuti mifwolo yancico itaandaani.
Mifwolo yancico injilana kabotu mbuli tubeela-beela twa jigsaw puzzle
Malaini aasalala atondezya mifwolo mpociswaanganina cipapa casyaankumbula mazi mpocili ansi alimwi aatala. Kumane malaini aagileyi atondezya mboinjilana mifwolo mpoili akati eeni
Basyaazibwene baamba kuti basikupanga zintu baiya cipapa casyaankumbula mazi ciindi nobapanga zintu zimwi mbuli myoota, mabbiliji alimwi amayake.
Ino muyeeya buti? Sena cipapa casyaankumbula mazi cakasanduka buya? Naa cakalengwa buya?