TUPANGO TWAMU BBAIBBELE TWAPANDULULWA
Isaya 42:8—“Ndime Mwami”
“Ndime Jehova. Eeli ndezina lyangu; Bulemu bwangu tandibupi umbi pe, akwalo kutembaulwa kwangu tandikupi zikozyanyo zibezedwe.”—Isaya 42:8, Bbaibbele lya Busanduluzi Bwanyika Mpya.
“Ndime Mwami Leza, eeli ndezina lyangu! Tandipi bulemu bwangu kuluumbi nikuba kutembaulwa kwangu kumituni.”—Isaya 42:8, The Bible in Tonga, Lyamu 1996.
Bupanduluzi bwa Isaya 42:8
Leza ulatwaambila zina lyakwe limugeme alimwi ulayungizya kuti bulemu bwakwe naa kutembaulwa kwakwe takupi mituni.
Leza wakalyuulika zina eeli, ilivwula kwaambwa kuti “Jehova” mu Chitonga.a (Kulonga 3:14, 15) Nokuba kuti zina lya Leza lilajanika ziindi zitandila ku 7,000 mu Cizuminano Cakaindi (Magwalo aa Chihebrayo aa Chiaramu), mubusanduluzi bunji zina eeli lyakanjililwa busena azina lyabulemu lyakuti “MWAMI” (mumabala mapati). Mucikozyanyo, mabala aaya alajanika ku Intembauzyo 110:1, lyalo ilisinsima kujatikizya Jehova alimwi a Jesu. Mu The Bible in Tonga, Lyamu 1996, tubala kuti: “Mwami Leza [Jehova] wakati ku Mwami wangu [Jesu].” (Milimo 2:34-36) Pele Bbaibbele lya Busanduluzi Bwanyika Mpya lyakabikka zina lya Leza mubusena bwandilyo kutegwa kutabi kunyongana akati ka “Bami” bobilo aaba. Lyaamba kuti: “Jehova wakaambila Mwami wangu kuti: ‘Kkala kujanza lyangu lyalulyo kusikila mane ndikabikke basinkondonyoko kuba cilyatilo camaulu aako.’”
Basyaazibwene banji basyoma kuti zina lya Leza lyaamba kuti “Upa Kuti Kube.” Alikke Leza wakasimpe nguukonzya kuzuzikizya majwi aaya, akaambo kakuti walo ulakonzya kuba naa kupa zilenge zyakwe kuba kufwumbwa ciyandika kutegwa azuzikizye makanze aakwe.
Mbwaanga ngo Mulengi wesu akuti ngo Leza alikke wakasimpe, Jehova uyanda kuti katukomba nguwe alikke. Kunyina muntu naa cintu cimbi ncotweelede kukomba, noiba mituni naa zikozyanyo.—Kulonga 20:2-6; 34:14; 1 Johane 5:21.
Makani aayengelede lugwalo lwa Isaya 42:8
Mutupango tuli kumatalikilo aa Isaya caandaano 42, Jehova wakasinsima mulimo ngwayoocita “musale.” Leza wakaamba kuti mubelesi ooyu ngwakkomanina, “uyooleta bululami kumasi.” (Isaya 42:1) Kujatikizya cisyomezyo eeci, Leza wakaamba kuti: “Lino ndaambilizya zintu zipya. Kazitanacitika, ndilamwaambila kujatikizya nzizyo.” (Isaya 42:9) Businsimi bujatikizya “musale” bwakazuzikizyigwa myaanda yamyaka kumbele ciindi Mesiya, naa Kristo naakaboola akucita mulimo wakwe anyika.—Matayo 3:16, 17; 12:15-21.
a Zina lya Leza mu Chihebrayo lijisi mabala one, aalembwa kuti YHWH mu Cikuwa. Busanduluzi bumwi bwamu Cikuwa bwaamba zina lya Leza kuti “Yahweh.” Kutegwa muzyibe zinji, amubone cibalo cakuti “Izina lya Leza mu Magwalo aa Chihebrayo” mu Bupanduluzi Buyungizyidwe A4 mu Bbaibbele lya Busanduluzi Bwanyika Mpya.