TUPANGO TWAMU BBAIBBELE TWAPANDULULWA
Intembauzyo 23:4—“Nokuba Kuti Ndeenda Mukkuti Lisiya Mbi”
“Nokuba kuti ndeenda mukkuti lisiya mbi, kunyina cintu cibi ncondiyoowa, nkaambo yebo ulaandime; inkoli yako amusako wako zilandikkazika moyo.”—Intembauzyo 23:4, Bbaibbele lya Busanduluzi Bwanyika Mpya.
“Nenjeenda mumumpata walufu uusia mbi, nsiyoowi bubi, nkaambo tuli ayebo, musako wako ankoli yako zilandiyumya.”—Intembauzyo 23:4, The Bible in Tonga Lyamu 1963.
Bupanduluzi bwa Intembauzyo 23:4a
Leza ulabakwabilila alimwi akubalanganya aabo bamukomba, nociba ciindi nobali mubukkale bukatazya. Kapango aaka kakozyanisya nzila Jehova mbwabalanganya bakombi bakwe alimwi amweembezi mbwazibikkila maano mbelele zyakwe.b Tabalimvwi kuba balikke ciindi nobali mubuyumuyumu, naa kuba mukkuti lisiya mbi naaba muntenda yalufwu, kweelana ambokwaambidwe mukapango aaka. Balimvwa kukwabililwa, mbuli kuti Leza uli ambabo.
Kaindi, mweembezi wakali kubelesya nkoli kukwabilila mbelele zyakwe kubanyama bakali. Alimwi wakali kubelesya musako uujisi ngobyo, kusololela mbelele naa kuzikwela kutegwa zitanjili muntenda. Mbubonya buyo, Jehova Leza uli mbuli Mweembezi siluyando uukwabilila alimwi akusololela baabo bamukomba. Nomuba mubukkale bukatazya kapati, Jehova ulabalanganya munzila ziindene-indene.
Ulabalailila alimwi akubaumbulizya kwiinda mu Jwi lyakwe Bbaibbele.—Baroma 15:4.
Ulaswiilila mipailo yabo, akubapa kulimvwa kukwabililwa mumyoyo yabo alimwi amumizeezo.—Bafilipi 4:6, 7.
Ubelesya bakombinyina kubakulwaizya.—Bahebrayo 10:24, 25.
Ulabapa bulangizi bwini-bwini bubotu bwakumbele, ciindi nayoogwisya mapenzi ngobajisi lino.—Intembauzyo 37:29; Ciyubunuzyo 21:3-5.
Makani aayengelede lugwalo lwa Intembauzyo 23:4
Intembauzyo 23 yakalembwa a Davida, walo iwakali mweembezi naakali mulombe alimwi kumbele wakaba mwami wacisi ca Israyeli. (1 Samuele 17:34, 35; 2 Samuele 7:8) Sintembauzyo wakatalika kwiinda mukwaamba Jehova kuti Mweembezi uusololela, uusanina, alimwi akukatalusya bakombi bakwe, mbubonya mbuli mweembezi mbwacita kumbelele zyakwe.—Intembauzyo 23:1-3.
Majwi ngaakabelesya Davida ku Intembauzyo 23:4 atondezya mbwaakali mulongwe mwini-mwini wa Jehova. Davida wakalizyi kuti Leza wakali kumubikkila maano akuti wakalizibwene zintu izyakali kumucitikila. Akaambo kaceeci, Davida kunyina naakali kuyoowa.
Ku Intembauzyo 23 kapango 5 a 6,, Davida wacinca cikozyanyo camweembezi ambelele zyakwe, akwaamba casikutambula mweenzu amweenzu wakwe. Mbuli sikusamausya mweenzu, Jehova wakamulanganya Davida mbuli mweenzu uulemekwa. Nobaba basinkondonyina Davida tabakonzyi kukasya Leza kumulanganya. Kumamanino aantembauzyo, Davida watondezya lusyomo lwakuti Leza uyoomutondezya bubotu alimwi aluyando buumi bwakwe boonse.
Zikozyanyo zibelesyedwe ku Intembauzyo 23 zitondezya luyando lutamani Leza ndwapa bakombi bakwe.—1 Petro 2:25.
a Muma Bbaibbele aamwi eeyi ni Ntembauzyo 22. Nokuba kuti kuli Ntembauzyo zili 150, muma Bbaibbele aamwi zilembedwe kweelana amalembe aa Chihebrayo aaitwa kuti Masoretic, kumane muli aamwi zilembedwe kweelana amalembe aa Chigiriki aakusaanguna aaitwa kuti Septuagint, ibusanduluzi buzwa mu Chihebrayo ibwakamana kulembwa mumwaanda wamyaka wabili B.C.E.
b Leza, uujisi zina lyakuti Jehova, kanji-kanji mu Bbaibbele waambwa kuti Mweembezi uubikkila maano. Bakombi bakwe, ibaambwa kuti mbelele, balangila kulinguwe kutegwa abakwabilile alimwi akubagwasyilizya.—Intembauzyo 100:3; Isaya 40:10, 11; Jeremiya 31:10; Ezekieli 34:11-16.