Bafilipi 4:6, 7—“Mutalibiliki Acintu Nociba Comwe”

“Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu kwiinda muli Kristo Jesu.”—Bafilipi 4:6, 7, Bbaibbele lya Busanduluzi Bwanyika Mpya.

“Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza, elyo luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo Jesu.”—Bafilipi 4:6, 7, The Bible in Tonga Lyamu 1963.

Bupanduluzi bwa Bafilipi 4:6, 7

Bakombi ba Leza balakonzya kucesya kulibilika kwiinda mukupaila. Leza wasyomezya kubapa luumuno lwamumizeezo, iluyoobagwasya kucesya kulibilika akukwabilila mizeezo yabo ambobalimvwa. Kapango 6 kaamba misyobo yamipailo iikonzya kubagwasya kujana luumuno oolu.

Mipailo yakukombelezya: Muntu ulakonzya kumukombelezya Leza ciindi nakatazyidwe acintu cimwi, mbuli mbwaakacita Jesu. (Bahebrayo 5:7) Kanji-kanji mipailo iili boobu ilaakucitwa cakwiinduluka-induluka.

Mipailo yakulomba: Bakombi ba Leza balakonzya kumulomba “cintu cili coonse,” alimwi “amubukkale buli boonse.” Pele mipailo eeyi yeelede kweendelana akuyanda kwa Leza mbubwenya mbokwaambidwe mu Bbaibbele.—1 Johane 5:14.

Mipailo yakulumba: Mumipailo eeyi, tulamulumba Leza akaambo kazintu nzyaatucitila alimwi anzyayakutucitila kumbele. Ikuti twabikkila maano kutwaambo tutupa kumulumba Leza, tulagwasyigwa kuzilanga kabotu zintu.—1 Batesalonika 5:16-18.

Leza ulayiingula mipailo iili boobu kwiinda mukubapa luumuno bakombi bakwe. “Luumuno lwa-Leza,” nduumuno ndwapa Leza kuli baabo ibajisi cilongwe ciyumu anguwe. (Baroma 15:13; Bafilipi 4:9, BT) Luumuno oolu “lwiinda maano oonse” nkaambo luzwa kuli Leza alimwi lulakonzya kutugwasya munzila nzyotutayeeyeli.

Kapango aaka kaamba kuti luumuno oolu lulakonzya kukwabilila myoyo yesu. Ibbala lya Chigiriki ilyakasandululwa kuti “kukwabilila” lilikozyenye abbala ndyobabelesya basikalumamba ikwaamba nzyobakali kucita kutegwa bakwabilile munzi. Mbubwenya buyo, luumuno lwa Leza lulaikwabilila mizeezo yamuntu alimwi ambwalimvwa. Lulamugwasya kutalibilika kapati amapenzi.

Luumuno ndwatupa Leza lulatukwabilila “kwiinda muli Kristo Jesu,” akaambo kakuti nkwiinda muli Jesu motukonzya kuba acilongwe a Leza. Jesu wakaaba buumi bwakwe kabuli cituuzyo cazibi zyesu. Ikuti katujisi lusyomo mulinguwe, Leza ulakonzya kutulongezya. (Bahebrayo 11:6) Alimwi Jesu nenzila iisololela kuli Leza. Wakaamba kuti: “Kunyina uuboola kuli Taata ccita kuti wainda mulindime.”—Johane 14:6; 16:23.

Makani aayengelede lugwalo lwa Bafilipi 4:6, 7

Lugwalo lwa Bafilipi ndugwalo mwaapostolo Paulo ndwaakalembela Banakristo bakkala mumunzi wa Filipi.a Mucaandaano 4 calugwalo oolu, Paulo wakakulwaizya bamumbungano eeyi kukondwa, alimwi wakabalumbaizya akaambo kabwaabi bwabo, lwalo ilwakabaletela lukkomano. (Bafilipi 4:4, 10, 18) Ulatondezya mupailo mboukonzya kuleta luumuno lwa Leza, alimwi ulaamba mizeezo amicito iisalala iikonzya kupa kuti “Leza waluumuno” atugwasye.—Bafilipi 4:8, 9.