Isaya 26:3—“Yebo Unoobakwabilila Bantu Balanga Kulinduwe Muzintu Zyoonse”

“Yebo unoobakwabilila bantu balanga kulinduwe muzintu zyoonse; uyoobapa luumuno lutamani, nkaambo basyoma mulinduwe.”—Isaya 26:3, Bbaibbele lya Busanduluzi Bwanyika Mpya.

“Oyo uupangika Moyo wakwe kulinduwe, uyoomukazika muluumuno lwakasimpe, nkaambo kakuti ulakusyoma.”—Isaya 26:3, The Bible in Tonga Lyamu 1963.

Bupanduluzi bwalugwalo lwa Isaya 26:3

Kwiinda mumajwi aaya aakulwaizya, musinsimi Isaya utondezya kuti Leza ulabakwabilila aabo bamusyoma cakumaninina. Ulacita oobo kwiinda mukubagwasya kulimvwa kukwabililwa alimwi akuba aluumuno.

“Unoobakwabilila bantu balanga kulinduwe.” Majwi aaya aamba bantu bakanzide mumyoyo yabo kusyoma Jehovaa Leza ciindi coonse. Aabo basyoma Leza balizyi kuti beelede kulanga kulinguwe. Mucikozyanyo, tabasyomi mizeezo yabo ciindi nobapanga zyakusala ziyandika kapati. Muciindi caboobo, basyoma Leza muzintu zyoonse nzyobacita. (Tusimpi 3:5, 6) Balalanga-langa Leza mbwabubona bukkale kwiinda mukubala Jwi lyakwe, Bbaibbele, alimwi akuyeeyesya kujatikizya nzyobabala. (Intembauzyo 1:2; 119:15) Ciindi nobalijana mubukkale bukatazya, balapaila kuli Jehova camoyo woonse kulomba kuti abagwasye. (Intembauzyo 37:5; 55:22) Kwiinda mukucita boobo, batondezya lusyomo ndobajisi mulinguwe, aboobo ulabapa luumuno.

“Uyoobapa luumuno lutamani.” Mumabala aakusaanguna aa Chihebrayo, bbala lyakuti “luumuno” lyakali kujanika ziindi zyobilo ikukankaizya kaambo; aboobo kukankaizya kaambo aako, ibbala eeli lyakabikkilwa bbala limbi, lino lyaba “luumuno lutamani,” “luumuno lwakasimpe,” naa “luumuno lwini.” Munzila iimwi, aabo basyoma Jehova cakumaninina balaba aluumuno lwamumizeezo, tacikwe makani abukkale bwabo. (Intembauzyo 112:7; 119:165) Luumuno oolu lulaboola kwiinda mukuba acilongwe cibotu, cibageme a Jehova alimwi akusolekesya kucita zintu zimukkomanisya.—Tusimpi 3:32; Isaya 48:18.

“Luumuno lutamani” oolu talwaambi kuti Leza ulaagwisya mapenzi oonse aabakombi bakwe akupa kuti kabatalibiliki. (1 Samuele 1:6, 7; Jobu 6:1, 2; Intembauzyo 31:9) Muciindi caboobo, ulabagwasya kuliyumya kumapenzi aabo. (Isaya 41:10, 13) Ulayiingula mipailo yabo kwiinda mukubapa busongo, nguzu, alimwi aluumbulizyo. (Intembauzyo 94:19; Tusimpi 2:6; Isaya 40:29) Akaambo kaceeci, balakonzya kuliiba nomuba mubukkale bukatazya.—Bafilipi 4:6, 7.

Makani aayengelede lugwalo lwa Isaya 26:3

Kwainda myaka iili 2,800 kuzwa ciindi musinsimi Isaya naakali kupona. Ba Juda banji aciindi eeco, alimwi amumyaka yakatobela, tiibakali kumukomba cakusyomeka Jehova Leza. Akaambo kaceeci, mukuya kwaciindi Jehova wakazumizya kuti munzi wabo mupati, nkokuti Jerusalemu, unyonyoonwe mumwaka wa 607 B.C.E.

Nokuba boobo, myaka yiinda ku 100 munzi kautananyonyoonwa, Isaya wakalemba lwiimbo lwabusinsimi ilulembedwe kucaandaano 26 lwakutembaula Jehova. (Isaya 26:1-6) Lwiimbo oolo lwakaamba zyakuyakululwa kwamunzi iwakali mu Juda, nkokuti Jerusalemu.

Jerusalemu wakatalika kuyakululwa nowakainda mwaka wa 537 B.C.E. Nowakamana kuyakululwa munzi, ba Juda basyomeka ibakajokela ku Jerusalemu bakalimvwa kukwabililwa akwaamba kuti: “Tulijisi munzi muyumu.” (Isaya 26:1) Nokuba boobo, bwaanda bwamunzi tauli nguwo wakali kupa kuti munzi kauli muyumu. Pele, bukwabilizi bwamunzi bwakayeeme akulongezyegwa alimwi akukwabililwa a Jehova.—Isaya 26:2.

Mbocibede amazuba aano. Aabo basyoma muli Jehova cakumaninina balimvwa kukwabililwa nkaambo bamubona kuti ‘Nindomba,’ naa mayubilo aabo.—Isaya 26:4.

Amweebelele kavidiyo aaka kutegwa mubone twaambo tupati-pati ituli mubbuku lya Isaya.