Bwatatu, August 27
Mumubili wangu ndibona mulawo uumbi uulwana mulawo uuli mumizeezo yangu, alimwi uundipa kuba mwaange wamulawo wacibi ooyo uuli mumubili wangu.—Rom. 7:23.
Kuti mwatyompwa akaambo kakulubizya kwanu, kuyeeya ncomwakamusyomezya Jehova ciindi nomwakalyaaba kulinguwe kuyoomugwasya kulwana masunko. Mubuti? Ciindi nomwalyaaba kuli Jehova, mulaliimya zintu zimwi. Eeci caamba kuti musala kukaka zintu zimwi nzyomulombozya alimwi ambaakani zyanu kutegwa mukkomanisye Jehova. (Mt. 16:24) Aboobo mwaakusunkwa, tamukayandiki kutalika kuyeeya buya ncomweelede kucita. Kayi munoozyi kale ncomweelede kucita, nkokuti kuzumanana kusyomeka kuli Jehova. Muyoozumanana kuyanda kukkomanisya Jehova. Kwiinda mukucita boobo, muyooba mbuli Jobu. Nokuba kuti wakajana mapenzi aakatazya kapati, cakusinizya wakaamba kuti: “Tandikaleki kusyomeka pe!”—Job. 27:5. w24.03 9 ¶6-7
Bwane, August 28
Jehova ulaafwaafwi abaabo boonse bamwiita, aabo boonse bamwiita mukasimpe.—Int. 145:18.
Jehova, “Leza siluyando” ulaandiswe. (2Kor. 13:11) Ulamubikkila maano umwi aumwi wesu kumugama. Alimwi tulisinizyide kuti ‘tuzingulukidwe aluyando lwakwe lutamani.’ (Int. 32:10) Ciindi notuzinzibala kuyeeya mbwatondezya luyando lwakwe kulindiswe, tulalibonena kuti ulatulanganya ncobeni alimwi uba mulongwe wesu mwini-mwini. Aboobo tulakonzya kumusikila mumupailo cakulikwaya akumwaambila mbotukkomene akaambo kakuti ulatuyanda. Kunze lyaboobo, tulakonzya kumwaambila zyoonse zitulibilisya, katusinizyide kuti ulatumvwa alimwi akuti ulilibambilide kutugwasya. (Int. 145:19) Mbubwenya mbotukwelelezyegwa akukasaala kwamulilo ciindi nokutontola, andiswe tulakwelelezyegwa aluyando lwa Jehova. Nokuba kuti Jehova ulaanguzu, pele alimwi uli aluyando kapati. Aboobo, amukkomane akaambo kakuti Jehova ulamuyanda. Mpoonya toonse atutondezye kuti tulalumba kuluyando ndwatutondezya kwiinda mukwaamba kuti: “Ndilamuyanda Jehova!”—Int. 116:1. w24.01 31 ¶19-20
Bwasanu, August 29
Ndabazyibya zina lyako.—Joh. 17:26.
Jesu tanaakagolela buyo akwaambila bantu kuti zina lya Leza ngu Jehova. Kayi ba Juda mbaakali kuyiisya bakalilizyi kale zina lya Leza. Pele Jesu “ngonguwe wakamupandulula” bwini mbwabede. (Joh. 1:17, 18) Mucikozyanyo, Magwalo aa Chihebrayo atondezya kuti Jehova ngusiluse alimwi ngusilweetelelo. (Kul. 34:5-7) Jesu wakakasalazya kaambo aaka ciindi naakaamba cikozyanyo camwana mutaka abausyi. Ciindi notubala kuti bausyi nobakamubona mwanaabo iwakeempwa “kacili kulaale,” bakamubalikila akumukumbata mpoonya akumulekelela camoyo woonse, tulamvwisya kuti Jehova ngusiluse alimwi ngusilweetelelo kapati. (Lk. 15:11-32) Aboobo Jesu wakabagwasya bantu kuzyiba bwini mbwabede Jehova. w24.02 10 ¶8-9