“Kunyina Nondicimvwa Nsoni”

MBONDAKABEDE KAINDI

Ndakazyalilwa ku Ciudad Obregón, cisi ca Mexico nkocili kunyika, alimwi ndili wasanu kuzyalwa akati kabana bali fwuka. Twakali kukkala afaamu, pesi twakalikkomene kapati akaambo kakuti mukwasyi wesu wakalikamantene. Mukubula coolwe, nondakajisi myaka yosanwe, guwo pati lyakainyonyoona faamu yesu aboobo twakalongela kudolopo limbi.

Ookuya bataata bakatalika kujana mali manji. Pele aciindi nciconya bakaba bacakolwa. Eeci cakanyonganya cikwati cabo alimwi andiswe tobana twakanyongana. Twakatalika kufweba tombwe njotwakali kubba kuli bataata. Nondakajisi myaka iili buyo cisambomwe ndakatalika kukolwa. Tiilyakalampa bazyali bangu bakaandaana, aboobo ndakaindila kunywa bukoko akufweba.

Bamaama nobakakwatwa kumwaalumi uumbi, bakatutolelezya. Mwaalumi ooyu kunyina naakali kubapa mali, alimwi mali ngobakali kujana bamaama tanaakali kukkwana kuula nzyotwakali kuyandika. Aboobo, mebo abanabokwesu twakali kubeleka kufwumbwa mulimo ngotwakali kukonzya, pele mali ngotwakali kujana akali masyoonto kuula zyakali kuyandika. Ndakali kupolisyila bantu mabbusu, kusambala zinkwa, miteende, ncungamu, azintu zimwi. Kuyungizya waawo ndakali kwiingaila kuyandaula cakulya mumabbiini aabavwubi.

Nondakakkwanya myaka iili kkumi, mwaalumi umwi wakandilomba kuti katubeleka limwi kubusena bwakali kusowelwa tombe. Ndakazumina, mpoonya ndakacileka cikolo, alimwi akuzwa aŋanda. Mali ngaakali kundivwozya tanaakali kusika a 1 dola alimwi wakali kundipa cakulya ncotwakali kubwezelela kubusena busowelwa tombe. Ndakali kukkala mukaanda nkondakaliyakila kubelesya zintu nzyondakali kubwezelela. Bantu mbondakali kujanika limwi bakajisi ŋambawido yacisapi alimwi tiibakali kulilemeka. Bunji bwabo bakali kubelesya misamu iikola alimwi bakali bacakolwa. Masimpe eeci cakali ciindi cuusisya kapati mubuumi bwangu, alimwi ndakali kulila masiku lyoonse akuyoowa. Aboobo akaambo kabucete alimwi akutaiya, ndakali kumvwa nsoni kapati. Kwamyaka yotatwe ndakali kukkala kubusena bwakali kusowelwa tombe kusikila nondakalongela kucooko cimbi mumwenya mu Mexico. Ookuya ndakatalika kubeleka mumyuunda, kutebula maluba abutonje, kuyobolola nzimbe akusya magwili.

Nokwakainda myaka yone, ndakajokela ku Ciudad Obregón. Ndakasikila kubacizyi babataata bamwi ibakali baŋanga. Lino ndoona masiku ndakali kulota ziloto zibyaabi cakuti ndakanyongana kapati mumizeezo akutalika kuyeeya kulijaya. Busiku bumwi ndakapaila kuli Leza akumwaambila kuti: “Mwami, ikuti naa nkoli ncobeni, ndiyanda kukuzyiba, akukubelekela kukabe kutamani. Ikuti naa kuli cikombelo cakasimpe, ndiyanda kucizyiba.”

BBAIBBELE MBOLYAKANDICINCA

Lyoonse ndakali kuyanda kwiiya zinji kujatikizya Leza. Noliba leelyo nondakacili mwana, ndakanjila zikombelo ziindene-indene, pele zyoonse zyakandityompya. Tiizyakali kulibelesya kapati Bbaibbele naa kundigwasya kumuzyiba Leza. Zimwi zyakali kubikkila kapati maano kumali, mpoonya zimwi bapati-pati bacikombelo tiibakali kulilemeka.

Nondakakkwanya myaka iili 19, bamulamu ibakakwete bacizyi bangu bakandaambila kuti Bakamboni ba Jehova bakabatondezya ncolyaamba Bbaibbele kujatikizya kubelesya zikozyanyo mubukombi. Bakandibalila lugwalo lwa Kulonga 20:4, 5. Lwaamba kuti tatweelede kubelesya zikozyanyo. Kapango 5 kaamba kuti: “Utazikotamini naa koongelezyegwa kuzikomba, nkaambo mebo nde Jehova Leza wako, ndime Leza uuyanda kuti bantu kabakomba buyo ndime ndelikke.” Mpoonya bakandibuzya kuti, “Ikuti naa Leza ubelesya zikozyanyo kucita maleele naa uyanda kuti swebo katuzibelesya mukumukomba, ino inga wazikasyila nzi? Mubuzyo wabo wakandipa kuyeeya. Kuzwa waawo, twakabandika twaambo tunji tujatikizya makani aamu Bbaibbele. Akaambo kaceeci, ndakali kwiikkomanina mibandi eeyo cakuti ciindi tiicakali kulibonya ambocakali kweenda.

Kumane, bakanditolelezya kumiswaangano ya Bakamboni ba Jehova. Cakandikkomanisya kapati ncondakabona akumvwa okuya. Nobaba bana baniini bakali kutola lubazu mupulogilamu, akwaambaula cakulikwaya acibumbili! Aboobo ndakati, ‘Eelo kaka bantu aaba balayiisyigwa!’ Nokuba kuti masusu aangu akali malamfwu alimwi tiindakali kulibonya kabotu, Bakamboni bakanditambula amaanza obilo. Mane buya mukwasyi umwi wakanditamba kucakulya cakumangolezya nowakamana muswaangano.

Kwiinda mukwiiya Bbaibbele a Bakamboni, ndakajana kuti Jehova Leza ngu Taata siluyando uutulanganya tacikwe makani amali, mpuwo, mubala naa lwiiyo ndotujisi. Masimpe tasalululi. (Milimo 10:34, 35) Kwaamba masimpe, nzyondakali kuyandika kumuuya ndakazijana, aboobo kulimvwa kubula mpindu kwakamana.

MBONDAGWASYIGWA

Buumi bwangu bwakatalika kucinca cakutayeeyela! Ndakaleka kufweba, kuciindizya kunywa bukoko alimwi akubelesya ŋambawido yacisapi. Kubikkilila nkondakajisi kuzwa kubwana kwakamana, akwalo kulota zintu zibyaabi kwakamana. Kubula mpindu nkondakali kulimvwa akaambo kamapenzi ngondakajisi kubwana alimwi akutaiya, kwakamana.

Ndilijisi mukaintu mubotu uumuyanda Jehova alimwi ulandigwasyilizya kapati. Lino ndilabeleka kandili mulangizi weendeenda wa Bakamboni ba Jehova. Ndilabaswaya bakwesu abacizyi kutegwa ndibakulwaizye alimwi akubayiisya. Ndilalumba kapati akaambo kanguzu nzyolijisi Bbaibbele zyakuponya alimwi alwiiyo lubotu kapati Leza ndwatupa, kunyina nondicimvwa nsoni.