4. Ncinzi Paulo ncaakasinizya kwaamba, alimwi mbuti mbwaakatondezya kusinizya kwakwe mumajwi ngakaambila Timoteo?

⁴ Paulo wakali masimpe kuti Jehova ulakonzya kubuyubununa bukombi bwakuupaupa ameso, alimwi wakalizyi kuti Jehova ulakonzya kubayubununa bantu basyomeka kulinguwe. Paulo wakatondezya lusyomo lwakwe mumajwi ngaakasololelwa kulembela Timoteo. Naakamana kutondezya ntenda yakumuuya yakaliko akaambo kabasiluleyo ibakaliko kale mumbungano, Paulo wakalemba kuti: “Nokuba boobo, intalisyo njumu ya Leza iciimvwi kiijisi cidinto cilembedwe kuti: ‘Jehova ulibazyi aabo babalilwa kulinguwe,’ akuti: ‘Ooyo wiita zyina lya Jehova akukake kutalulama.’”—2 Ti. 2:18, 19.

⁶ Paulo waamba “ntalisyo njumu ya Leza” mucibalo mwalo mwaamba majwi aa Musa kujatikizya Kora abasikumutobela bakwe aalembedwe mulugwalo lwa Myeelwe 16:5. Paulo wakali kwaamba zyakacitika mumazuba aa Musa mukusola kukulwaizya Timoteo alimwi akumuyeezya nguzu Jehova nzyajisi zyakuzyiba micito yabuzangi. Makanze aa Jehova tanaakacincwa a Kora alimwi tanaakali kukonzya kucincwa abasiluleyo ibakaliko mumbungano. Paulo tanaakapandulula cakumaninina kujatikizya ncoyakali kwiiminina “ntalisyo njumu ya Leza.” Nokuba boobo, majwi ngaakabelesya akamukulwaizya Timoteo kusyoma nzila zya Jehova.

8, 9. Ncinzi ncotukonzya kwiiya kucikozyanyo ca Paulo ‘cacidinto’?

⁸ Majwi aa Paulo aalembedwe mulugwalo lwa 2 Timoteo 2:19 atondezya ntalisyo iijisi mulumbe, mbuli kuti wakalembwa acidinto. Kaindi, cakalidumide kulemba bulembo bumwi aantalisyo yaŋanda, ambweni kutondezya wakayaka naa mukamwini ŋanda eeyo. Paulo ngomulembi wa Bbaibbele wakusaanguna kubelesya cikozyanyo camusyobo ooyu.a Cidinto icili ‘antalisyo njumu ya Leza,’ cijisi twaambo tobilo. Kaambo kakusaanguna nkakuti, “Jehova ulibazyi aabo babalilwa kulinguwe,” kabili nkakuti, “Ooyo wiita zyina lya Jehova akukake kutalulama.” Eeci cituyeezya kaambo nkotubala mulugwalo lwa Myeelwe 16:5.—Amubale.