Sena Muciyeeyede?

Sena cakamukkomanisya kubala mamagazini aa Ngazi Yamulindizi aa lino-lino? Amubone naa inga mwaingula mibuzyo eeyi iitobela:

• Ino Nguni Weelede Kuyiisya Bana Kujatikizya Leza?

Nokuba kuti bamwi balakonzya kubagwasya bazyali, bazyali mbabapedwe mukuli wakuyiisya bana babo kujatikizya Leza alimwi akujatikizya mukwasyi mboweelede kubeleka kweelana ambwayanda Leza.—10/1, peeji 7.

• Ncinzi ncaakali kupandulula Leza naakaambila ba Levi kuti: “Mebo ndime caabilo cako”?

Misyobo yabana Israyeli yoonse yakapegwa nyika, pele ba Levi tiibakapegwa, Jehova wakali kuyooba “caabilo” cabo. (My. 18:20) Iba Levi tiibakapegwa nyika yacikono, muciindi caboobo, bakapegwa coolwe cakubeleka mulimo uulibedelede. Nokuba boobo, Jehova wakali kubapa nzyobakali kuyandika izyakumubili. Mazuba aano aabo bajisi coolwe cakutola aambele zyintu zya Bwami balakonzya kuba alusyomo lwakuti bayoopegwa nzyobayandika mubuumi.—9/15, mapeeji 7-8, 13.

• Nkaambo nzi ncociyandika kulemeka ngomukwetene limwi?

Bulemu nenzila yomwe iiyandika kapati kutegwa mube abuumi bukkomanisya mucikwati. Bulemu bupa kulimvwa kwaanguluka akukkutila mucikwati. Bulemu bulayandika ncobeni mucikwati.—10/1, peeji 12.

• Ncinzi cikonzya kugwasya Munakristo kuzyiba kuti cakulikondelezya ncaasala kucita cilagwasya naa pe?

Kutegwa tuzyibe kuti cakulikondelezya ncotwasala cilagwasya alimwi akuti cili kabotu mumeso aa Leza, cilagwasya kulibuzya kuti: Ncinzi cibikkilizyidwe? Ndilili nendicita cakulikondelezya? Mbaani mbondiyanzana limwi?—10/15, mapeeji 9-12.

• Sena mweelede kutela mitelo?

Naakabuzyigwa kuti naa cakali kabotu mumeso aa Leza kutela mitelo kumfwulumende yabana Roma yakali kweendelezya aciindi eeco, Jesu wakaingula kuti: “Amupe Kaisala zyintu zya Kaisala, pele zyintu zya Leza amupe Leza.” (Mk. 12:13-17) Mfwulumende—iziimininwa a “Kaisala”—zilapanga mali aalubwe-lubwe amali aamapepa alimwi akugwasya kuti mali aaya kaali aanguzu. Aboobo, kweelana ambwazibona zyintu Leza, balijisi nguzu zyakwaamba kuti mali aayo abbadelwe kuli mbabo kwiinda mumitelo.—10/1, peeji 14, 15.

• Mbuti mbocikonzya kutugwasya cibalo cili mulugwalo lwa Tusimpi 7:6-23 kuti tuteebeleli zyintu ziletela muzeezo wakoonana?

Cibalo eeci caamba mukubusi umwi wakali kuyaabweenda kubusena kwalo mwanakazi muvwuule nkwaakali kukkala. Wakamoongelezya. Mazuba aano inga twacita kabotu kweeleba zibeela zimwi zya Intaneti zijisi zifwanikiso zitali kabotu, alimwi cilayandika kupaila kuli Leza kutegwa atugwasye katutanajalula cibeela eeco ca Intaneti.—11/15, mapeeji 9-10.

• Ino Inga Mwabuzyiba Buti Bukombi Bwakasimpe?

Bakombi bakasimpe balalilemeka Bbaibbele kuti ndi Jwi lya Leza. Balalilemeka zyina lya Leza, Jehova alimwi balakambauka kujatikizya Bwami bwa Leza. Tabali banyika eeyi mbyaabi alimwi balijisi luyando akati kabo.—10/1, peeji 16, 17.

• Sena kuli musyobo wabantu Leza ngwayanda kapati kwiinda uumbi?

Peepe, taciti oobo. Ibbaibbele lyaamba kuti: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—Mil. 10:34, 35. 10/1, peeji 26.