TUPANGO TWAMU BBAIBBELE TWAPANDULULWA
Joshua 1:9—“Koyuma Akuba Sicamba”
“Lino ndikulailila kuti, koyuma akuba sicamba. Utayoowi nokuba kukankama, nkaambo Jehova Leza wako unooli anduwe kufwumbwa nkounka.”—Joshua 1:9, Bbaibbele lya Busanduluzi Bwanyika Mpya.
“Sa teensi ndime ndakulailila na? Koyuma akuba mukozu. Utakankami nikuba kuyoowa, pe, nkaambo Jehova Leza wako uli ayebo koonse koonse nkoya.”—Joshua 1:9, The Bible in Tonga Lyamu 1963.
Bupanduluzi bwa Joshua 1:9
Kwiinda mumajwi aaya, Jehovaa Leza wakasyomezya mukombi wakwe uusyomeka Joshua kuti, wakali kukonzya ‘kuyuma akuba sicamba,’ nokuba kuti wakali kuyoolijana mubukkale bukatazya kapati. Joshua tanaakali kuyakuyoowa zyakumbele kufwumbwa buyo kuti watobela milawo ya Leza, nkaambo cakali mbuli kuti Jehova wakali munsi anguwe kutegwa amugwasye. Leza wakali aa Joshua kwiinda mukumulailila alimwi akumugwasya kuzunda basinkondonyina.
Ino mbuti Joshua mbwaakali ‘kuyooyuma akuba sicamba’? Wakali kuyookulwaizyigwa akuyumizyigwa kwiinda mumalembe aakasololelwa amuuya ngaakapede Jehova aciindi eciya. Eeci cakali kubikkilizya ‘Mulawo woonse Musa, mubelesi wa Jehova ngwaakalailila Joshua.’b (Joshua 1:7) Jehova wakaambila Joshua ‘kuubala caansaansi [“kuzinzibala kuyeeya zili mumo,” bupanduluzi buyungizyidwe] syikati amasiku.’ (Joshua 1:8) Kubala alimwi akuzinzibala kuli boobu kwakagwasya Joshua kukanza mumoyo wakwe kucita kuyanda kwa Leza. Mpoonya Joshua wakeelede kucita kweelana anzyaakali kwiiya kuzwa mu Jwi lya Leza, “kutobela makani oonse [aakalembedwe] mulindilyo.” Ikucita boobo, kwakali kuyoopa kuti acite cabusongo alimwi akuzwidilila. Alimwi buya eeci ncecakacitika. Nokuba kuti wakali kujana buyumuyumu, Joshua wakapona buumi bubotu alimwi akukkutila kali mukombi uusyomeka wa Jehova.—Joshua 23:14; 24:15.
Majwi Jehova ngaakaambila Joshua azumanana kutukulwaizya naaba mazuba aano. Atondezya Jehova mbwababikkila maano bakombi bakwe boonse, kwaambisya ciindi nobali mubuyumuyumu. Uyanda kuti bazwidilile mbubonya mbuli Joshua! Alimwi mbuli Joshua, balakonzya ‘kuyuma akuba basicamba’ kwiinda mukubala Jwi lya Leza Bbaibbele buzuba abuzuba, alimwi akuzinzibala kuyeeya, mpoonya akucita kweelana ancolyaamba.
Makani aayengelede lugwalo lwa Joshua 1:9
Naakafwa Musa, Jehova wakalailila Joshua kuti asololele cisi ca Israyeli. (Joshua 1:1, 2) Aciindi eeci, bana Israyeli bakali kulibambila kunjila Munyika Yakasyomezyedwe, nyika ya Kanana. Pele bakeelede kulwana basinkondonyina bakajisi nguzu kapati. Mucikozyanyo, Joshua wakeelede kulwana bana Kanana, balo ibakali babi ncobeni.c (Deuteronomo 9:5; 20:17, 18) Kuyungizya waawo, bana Kanana bakali banji kapati alimwi bakajisi zilwanyo zinji zyankondo kwiinda bana Israyeli. (Joshua 9:1, 2; 17:18) Pele Joshua cabusicamba wakatobela malailile aa Jehova. Alimwi Leza wakatondezya kuti wakali aanguwe, nkaambo bana Israyeli bakazunda basinkondonyina banji mumyaka buyo iili cisambomwe.—Joshua 21:43, 44.
a Izina lyakuti Jehova ndizina lyakasandululwa mu Cikuwa kuzwa kuzina lyamu Chihebrayo lya Leza—liimininwa amabala one יהוה (YHWH), aazyibidwe kuti Tetragrammaton. Izina eeli lyaambwa kuti “Mwami” mukapango aaka mu The Bible in Tonga Lyamu 1996. Kutegwa muzyibe makani manji kujatikizya Jehova alimwi akaambo ma Bbaibbele aamwi ncaatabelesyi zina eeli, amubone cibalo cakuti “Ino Jehova Nguni?”
b Malembe aakasololelwa amuuya ngaakali kubelesya Joshua, alimwi ngotucibelesya andiswe, kweelede kuti akali kubikkilizya amabbuku osanwe ngaakalemba Musa (Matalikilo, Kulonga, Levitiko, Myeelwe, alimwi a Deuteronomo), bbuku lya Jobu, alimwi antembauzyo yomwe naa zyobilo.
c Kutegwa muzyibe kaambo nkondo eezyi ncozyakali kucitika, amubone cibalo cakuti “Why Did God Wage War Against the Canaanites?” mu Ngazi Yamulindizi ya January 1, 2010, yamu Cikuwa.