Naakapiluka kuzwa kunkondo, Asa wakaswaangana a Azariya. Musinsimi ooyu wakapa kukulwaizya alimwi akucenjezya kwakuti: “Amundiswiilile, Asa anyoonse nuba-Juda aba-Benjamini. Jehova uli anywe na muli awe. Na mwamuyandaula, ulajanwa kulindinywe, pele na mwamulekelezya, alakwe ulamulekelezya inywe. . . . Amuliyumye. Maanza aanu ataleki kubeleka, nkaambo milimo yanu iyoolumbulwa.”—2 Mak. 15:1, 2, 7.

Majwi aaya alakonzya kuyumya lusyomo lwesu. Atondezya kuti Jehova unooli andiswe kuti twazumanana kumubelekela cakusyomeka. Ciindi notumulomba kuti atugwasye, tulakonzya kuba masimpe kuti ulatuswiilila. Azariya wakaamba kuti: “Amuliyumye.” Kanji-kanji kuyandika busicamba kutegwa tucite ciluleme, pele tulizyi kuti tulakonzya kucita oobo kwiinda mulugwasyo lwa Jehova.

Nikuba boobo, kuli kaambo akamwi kalibilisya nkakaamba musinsimi Azariya. Wakacenjezya kuti: “[Ikuti] na mwamulekelezya [Jehova], alakwe ulamulekelezya inywe.” Eelo kaka tweelede kucenjela kutegwa eeci citatucitikili, nkaambo kuli mapenzi manji aakonzya kuboola ikuti twamusiya Jehova! (2 Pe. 2:20-22) Magwalo taatondezyi kaambo Jehova ncaakamucenjezyela Asa, nikuba boobo mwami wakaalilwa kukubikkila maano kucenjezya ooku.