⁷ Nokuba boobo, kuyandika bupampu kutegwa tubumvwisye bumboni oobu. “Taakwe mwaambo, taakwe majwi; ijwi lyazyo talimvwigwi.” Pele ibumboni butaambauli ibwakujulu bulalimvwisya. “Nekubaboobo mulazyo wazyo ulasika muluwa loonse, amajwi aazyo alasika kumagolelo aanyika.” (Intembauzyo 19:3, 4) Cili mbuli kuti ijulu lyakapa “mulazyo wazyo” kutegwa bumboni bwazyo butaambauli, buzuzye nyika yoonse.

8, 9. Ino ntwaambo nzi tugambya kujatikizya zuba?

⁸ Davida alimwi ulapandulula cilenge acimbi ca Jehova cikankamanisya: “Mulinzizyo [mujulu] mwabikide cilao cazuba. Lyalo lili mbuli sibwiinga uuzwa muŋanda yakwe. Lilakondwa mbuli singuzu uusiyana. Mazwido aalyo njempela yajulu, amusinzo walyo ulasika kumabbililo aalyo. Taakwe cisisidwe kukupya kwalyo.”—Intembauzyo 19:4-6.

10. (a) Mbuti zuba mbolinjila akuzwa ‘mucilao cayo’? (b) Mbuti mbolibalika mbuli ‘mwaalumi singuzu’?

¹⁰ Sitembauzyo waamba zyazuba kubelesya mwaambo wacikozyanyo, ulyaamba kube ‘mmwaalumi singuzu’ uubalika imasikati kuzwa kumagolelo aanyika kusikila kumagolelo amwi amana masiku ulalyookezya ‘mucilao cakwe.’ Ciindi nyenyeezi mpati eeyo niibbila, noilangilwa aanyika iboneka kube injila ‘mucilao cayo’ mbuli kuti yaunka kukulyookezya. Imafwumo-fwumo lilapasula kalimweka “mbuli sibwiinga uuzwa muŋanda yakwe.” Kali mweembezi, Davida wakalizi mbukwakali kutontola masiku. (Matalikilo 31:40) Wakayeeya izuba mbulyakali kumukasaazya kubikkilizya abusena mpaakabede. Cakutadooneka, kunyina nolyakali kukatala “amusinzo” walyo kuzwa kujwe kuya kumbo, pele lili mbuli ‘mwaalumi singuzu’ uulibambide kupilukila mulweendo lwakwe.