9. Ino nkuunzi sintembauzyo nkwakozyanyisya myaka yabuumi bwabantu iili cuulu?

⁹ Sintembauzyo wakasololelwaa muuya kukozyanyisya cuulu camyaka cabuumi bwabantu kuciindi cifwaafwi kapati kubuumi bwa Mulengi uupona lyoonse. Kaambila Leza, wakalemba kuti: “Ulapilusya bantu kubulongo, ulaamba kuti, Amupiluke nobana ba-Adamu. Nkaambo myaka iili mbuli cuulu mumeso aako ili mbuli buzuba bwajilo bwakainda, ambuli kaindi kamasiku kakulindila.”—Intembauzyo 90:3, 4.

11. Nkaambo nzi ncotukonzya kwaamba kuti ciindi swebo ncotubona kuti ncilamfwu Leza ucibona kuti nkaindi buyo kafwaafwi?

¹¹ Kweelanaa mbuli Jehova mbwazilanga zintu, naba Metusela iwakapona myaka iili 969, tanaakakkwanya buzuba bomwe pe. (Matalikilo 5:27) Kuli Leza myaka iili cuulu ili buyo mbuli jilo mabala—ikaindi kali buyo mbuli mawoola aali 24 ainda. Awalo sintembauzyo waamba kuti, kuli Leza myaka iili cuulu ili buyo mbuli mawoola aakulindila zivwuka aali one ciindi camasiku. (Babetesi 7:19) Lino cilasalala ikwaamba kuti, ciindi swebo ncotubona kuti ncilamfwu, kuli Leza uupona lyoonse Jehova ucibona kuti nkaindi buyo kafwaafwi.