⁹ Wazumanana ulaamba: “Na wabuyandaula mbuli insiliva, akubulangaula mbuli zintu ziyandika zisisidwe, . . . ” (Tusimpi 2:4) Eeci cituyeezya milimo bantu njobacita mumigodi, balo kwamyaanda yamyaka iili mbwiibede ibayandaula lubulo luyandisi mbuli nsiliva alimwi angolida. Ibantu bajayana akaambo kangolida. Ibamwi mubuumi bwabo boonse bayandaula buyo ingolida. Pele, ino ngolida ijisi mpindu mpati buti naa iyandika buti? Ikuti naa mwasweeka munkanda alimwi kamufwide nyota kapati, ino ncinzi ncomunga mwasala, ingolida naa nkomeki yamaanzi? Pele bantu mbasungu caboola kumakani aakuyandaula ngolida ampindu yayo iicinca-cinca.a Elo kaka tuleelede kubaa busungu bwiinda aawo ciindi notuyandaula busongo, bupampu alimwi akumvwisya Leza akuyanda kwakwe! Ino nimpindu nzi iikonzya kujanika mukuvwuntauzya kuli boobo?—Intembauzyo 19:7-10; Tusimpi 3:13-18.