Kubala Bbaibbele kulagwasya, pele talili lyoonse nocili cuuba-uba. Zimwi ziindi mulakonzya kulibilika kuti naa muyoozumanana kwiiya Bbaibbele. Nkaambo nzi ncomweelede kuzumanana? Ncinzi cikonzya kumugwasya kuliyumya nokuba kuti kuli buyumuyumu?

1. Nkaambo nzi kwiiya Bbaibbele ncokuyandika?

“Jwi lya Leza lilaabuumi alimwi lilaanguzu.” (Bahebrayo 4:12) Bbaibbele lilagwasya nkaambo liyubununa mizeezo ya Leza alimwi aluyando ndwajisi kulindinywe. Lilagwasya kuba aluzyibo, busongo bwini-bwini alimwi abulangizi. Kwiinda zyoonse, Bbaibbele lilakonzya kumugwasya kuba mulongwe wa Jehova. Kuti mwazumanana kwiiya Bbaibbele, mulakonzya kuba abuumi bukkomanisya.

2. Nkaambo nzi ncociyandika kuzyiba bubotu bwakasimpe kamu Bbaibbele?

Kasimpe kamu Bbaibbele kali mbuli zintu ziyandisi. Nkakaambo kaako Bbaibbele litukulwaizya kuti, “koula kasimpe, utakasambali pe.” (Tusimpi 23:23) Ikuti katubuyeeya bubotu bwakasimpe kamu Bbaibbele, tulabeleka canguzu kuzumanana kwiiya, nokuba kuti tulajana buyumuyumu.​—Amubale Tusimpi 2:4, 5.

3. Mbuti Jehova mbwakonzya kumugwasya kuzumanana kwiiya?

Mbwali Mulengi Singuzuzyoonse alimwi Mulongwe wanu, Jehova uyanda kumugwasya kwiiya kujatikizya nguwe. Ulakonzya kumupa “kuti kamukanza alimwi anguzu zyakucita zintu.” (Amubale Bafilipi 2:13.) Aboobo, ikuti naa zimwi ziindi kamuyanda kuyungizya luyandisyo lwanu lwakwiiya naa kubelesya nzyomwiiya, ulakonzya kumugwasya. Ikuti naa muyandika nguzu zyakuzunda buyumuyumu naa kuliyumya ciindi nomukazyigwa ulakonzya kumupa. Kamupaila lyoonse kuli Jehova kutegwa amugwasye kuzumanana kwiiya Bbaibbele.—1 Batesalonika 5:17.

AMWIIYE ZINJI

4. Amukubikke mubusena bwakusaanguna kubala Bbaibbele

Zimwi ziindi tulakonzya kulimvwa kuti tujisi bubi kapati cakuti tatujisi ciindi cakwiiya Bbaibbele. Ncinzi cikonzya kutugwasya? Amubale Bafilipi 1:10, akubandika mibuzyo eeyi:

• Ino muyeeya kuti nzintu nzi “ziyandika kapati” mubuumi?

• Mbuti mbomukonzya kubikka kwiiya Bbaibbele mubusena bwakusaanguna?

1. Ikuti mwabikka musenga mubbekete akusola kubikka mabwe, mabwe inga taakkwani

2. Ikuti mwasaanguna kubikka mabwe mubbekete, mpoonya musenga munji inga wakkwana. Mbubwenya buyo, ikuti mwabikka “zintu ziyandika kapati” mubusena bwakusaanguna mubuumi, muyoocikonzya kuzizuzikizya alimwi akusyaalilwa aciindi cakucita zintu zimbi

Ikwiiya Bbaibbele kutupa kusololelwa a Leza, eeco ncecintu ncotuyandika kutegwa tumuzyibe alimwi akumukomba. Amubale Matayo 5:3, akubandika mubuzyo ooyu:

• Ino mbuti mbotugwasyigwa ikuti kwiiya Bbaibbele twakubikka mubusena bwakusaanguna?

5. Amuzumanane nokuba kuti mulakazyigwa

VIDIYO: Bakalongezyegwa Akaambo Kakuzumanana (5:22)

• Muvidiyo, ino beenzinyina baba Francesco alimwi abanamukwasyi bakacita buti ciindi nobakabaambila nzyobakali kwiiya?

• Ino mbuti mbobakalongezyegwa akaambo kakuzumanana?

Amubale 2 Timoteyo 2:24, 25, akubandika mibuzyo eeyi:

• Ino banamukwasyi abalongwe banu balimvwa buti kujatikizya nzyomwiiya?

• Kweelana atupango ntotwabala, ino mweelede kucita buti kuti muntu umwi katakkomene akaambo kakuti mwiiya Bbaibbele? Nkaambo nzi?

6. Amusyome Jehova kuti amugwasye

VIDIYO: Jehova Ulatugwasya Kucinca (3:56)

• Muvidiyo, nkucinca kuli buti nkobakacita ba Jim kutegwa bamukkomanisye Jehova?

• Ncinzi camukkomanisya kujatikizya cikozyanyo cabo?

Amubale Bahebrayo 11:6, akubandika mibuzyo eeyi:

• Ncinzi ncayoobacitila Jehova aabo “bamuyandaula cabusungu,” nkokuti aabo ibasolekesya kumuzyiba alimwi akumukkomanisya?

• Mbuti Jehova mbwalimvwa ciindi nabona kusolekesya nkomucita kutegwa mwiiye Bbaibbele?

MUBUFWAAFWI

Talili lyoonse nocili cuuba-uba kwiiya Bbaibbele, pele kucita boobo kuyoomugwasya kupona kukabe kutamani. Amuzumanane kusyoma Jehova, mpoonya uyoomupa bulumbu.

Ncinzi Ncomwaiya?

• Nkaambo nzi kasimpe kamu Bbaibbele ncokayandika kapati kulindinywe?

• Mbuti mbomukonzya ‘kusinizya zintu ziyandika kapati’?

• Nkaambo nzi ncomweelede kumulomba Jehova kuti amugwasye kuzumanana kwiiya Bbaibbele?

AMUZYIBE ZINJI

Amulange-lange nzila zyone izyabagwasya bantu banji kucibelesya kabotu ciindi.

“Mbomukonzya Kucibelesya Kabotu Ciindi” (Sinsimuka!, February 2014)

Amubone Jehova mbwaakagwasya mukaintu umwi uuli amwaalumi iwatakali kumvwisya kusolekesya nkwaakali kucita kutegwa akkomanisye Leza.

Jehova Ulatupa Nguzu Zyakunyamuna Mikuli Yesu (5:05)

Amubone mwaalumi umwi mbwaakagwasyigwa akaambo kakuliyumya kwamukaintu wakwe.

Ndakakasunka Kasimpe (6:30)

Bakamboni ba Jehova zimwi ziindi batamikizyigwa kuti baandaanya mikwasyi. Sena aaya masimpe?

“Sena Bakamboni ba Jehova Bapa Kuti Mikwasyi Yaandaane naa Balaiyumya?” (Cibalo caaintaneti)

Toonse tulasala zyakucita. Kusala kunji nkotucita kulakonzya kutujatikizya kapati swebo alimwi acilongwe cesu a Jehova. Mucikozyanyo, tulakonzya kusala nkotuyanda kukkala, mbotukonzya kujana mali aakuligwasya naa kusala kukwata naa kukwatwa. Kuti twasala kabotu, tulakonzya kuba abuumi bukkomanisya alimwi akukkomanisya Jehova.

1. Mbuti mbomukonzya kubelesya Bbaibbele kumugwasya kusala kabotu?

Kamutanasala, amupaile kuli Jehova akulingaula mu Bbaibbele kutegwa mubone walo mbwaabona makani aayo aajatikizya cintu ncomuyanda kusala. (Amubale Tusimpi 2:3-6.) Zimwi ziindi, Jehova ulapa mulawo uugaminide. Kuti kacili boobo, inga mwasala cabusongo kwiinda mukwaatobela malailile aayo.

Pele ino mbuti kuti kakunyina mulawo wamu Bbaibbele uugaminide uukonzya kumugwasya kusala cakucita? Jehova uyoomusololela ‘munzila momweelede kweendela.’ (Isaya 48:17) Munzila nzi? Amujane njiisyo izikonzya kumusololela. Njiisyo zyamu Bbaibbele nkasimpe ikayubununa mizeezo ya Leza alimwi ambwalimvwa. Kanji-kanji tulazyiba mbwalimvwa Leza kujatikizya makani amwi ciindi notubala mu Bbaibbele. Mpoonya twazyiba mbwalimvwa Jehova, tulakonzya kusala zintu zimukkomanisya.

2. Ncinzi ncomweelede kuyeeya kamutanasala?

Bbaibbele lyaamba kuti: “Ooyo uucenjede ulakkala ansi kuyeeya ntaamu zyakwe.” (Tusimpi 14:15) Icaamba kuti katutanasala, tweelede kuzinzibala kuyeeya kujatikizya nzyotuyanda kusala. Ciindi nomucita oobo, amulibuzye kuti: ‘Ninjiisyo nzi zyamu Bbaibbele nzyondikonzya kubelesya? Nkusala kuli buti ikukonzya kundipa luumuno lwamumizeezo? Ino kusala kwangu inga kwabajatikizya buti bamwi? Kwiinda zyoonse, sena kulamukkomanisya Jehova?’​—Deuteronomo 32:29.

Jehova ulijisi nguzu zyakutwaambila cintu cibotu alimwi acibi. Aboobo kuti twaizyiba milawo yakwe anjiisyo alimwi akuba amakanze akwiitobela, tuyiisya manjezyeezya eesu. Manjezyeezya mbuntu bwesu bwamukati ibutuzyibya cintu ciluzi acitaluzi. (Baroma 2:14, 15) Manjezyeezya aayiisyidwe inga atugwasya kusala kabotu.

AMWIIYE ZINJI

3. Amulekele Bbaibbele kumusololela

VIDIYO: Amulekele Njiisyo Zyamu Bbaibbele Kumusololela (5:54)

• Ino lwaanguluko lwakulisalila ninzi?

• Nkaambo nzi Jehova ncatupa lwaanguluko lwakulisalila?

• Ncinzi ncaatupa kutegwa citugwasye kulubelesya munzila iinda kubota lwaanguluko lwesu?

Kutegwa mubone cikozyanyo canjiisyo yamu Bbaibbele, amubale Baefeso 5:15, 16. Mpoonya mubandike mbomukonzya “kucibelesya kabotu ciindi coonse ncomujisi” kutegwa . . .

• kamubala Bbaibbele abuzuba.

• mube muzyali, mwana naa muntu uuli kabotu mucikwati.

• kamujanika kumiswaangano yambungano.

4. Amwaayiisye manjezyeezya aanu kutegwa kamusala kabotu

VIDIYO: “Amuzumanane Kuba Amanjezyeezya Aasalala” (5:13)

• Muvidiyo, nintaamu nzi nzyaabweza mucizyi kutegwa ayiisye manjezyeezya aakwe alimwi akusala cintu icikkomanisya Jehova?

Nkaambo nzi ncotuteelede kulomba bamwi kuti batusalile mumakani ngotweelede kulisalila? Amubale Bahebrayo 5:14, akubandika mibuzyo iitobela:

• Nokuba kuti cilakonzya kulibonya kuti ncuuba-uba kulomba bamwi kuti batusalile, ncinzi ncotweelede kwaandaanya tobeni?

• Ncinzi cikonzya kumugwasya kuyiisya manjezyeezya aanu akusala kabotu?

5. Amwaalemeke manjezyeezya aabamwi

Bantu baindene-indene balakonzya kusala zintu ziindene. Mbuti mbotukonzya kulemeka manjezyeezya aabamwi? Atulange-lange bukkale oobu bobilo:

Bukkale bwakusaanguna: Mucizyi uuyandisya kulipenta-penta walongela kumbungano kwalo bacizyi banji nkobatazyibide kubona bantu ibalipenta-penta.

Amubale Baroma 15:1 alimwi a 1 Bakorinto 10:23, 24, akubandika mibuzyo eeyi:

• Kweelana atupango ootu, ncinzi ncakonzya kusala mucizyi ooyo? Ncinzi ncomukonzya kucita kuti kamuli aamuntu uuli aamanjezyeezya aamukasya kucita cintu cimwi nywebo manjezyeezya aanu ncaamuzumizya kucita?

Bukkale bwabili: Mukwesu ulizyi kuti Bbaibbele talikasyi kutaciindizya kunywa bukoko, pele wasala kutanywa. Watambwa kupobwe kwalo nkwaabona bakwesu ibanywa bukoko.

Amubale Mukambausi 7:16 alimwi a Baroma 14:1, 10, akubandika mibuzyo eeyi:

• Kweelana atupango ootu, ncinzi ncakonzya kusala mukwesu ooyo? Ncinzi ncomukonzya kucita kuti mwabona muntu umwi uucita cintu cimwi nywebo manjezyeezya aanu ncaatamuzumizyi?

Nzintu nzi zikonzya kumugwasya kusala kabotu?

1. Amumulombe Jehova kuti amugwasye kusala cakucita.—Jakobo 1:5.

2. Amuvwuntauzye mu Bbaibbele alimwi amumabbuku aamba zyamu Bbaibbele kutegwa mujane njiisyo zikonzya kugwasya. Alimwi mulakonzya kubandika a Banakristo basimide.

3. Amuyeeye cikonzya kucitika kumanjezyeezya aanu alimwi aabamwi akaambo kakusala kwanu.

MUBUFWAAFWI

Tulasala cabusongo ciindi notuzyiba mbwalimvwa Jehova kujatikizya makani amwi alimwi akulanga-langa naa zintu nzyotucita ziyoobagwasya bamwi naa kubacisizya moyo.

Ncinzi Ncomwaiya?

• Mbuti mbomukonzya kusala zintu zikkomanisya Jehova?

• Mbuti mbomukonzya kuyiisya manjezyeezya aanu?

• Mbuti mbomukonzya kulemeka manjezyeezya aabamwi?

AMUZYIBE ZINJI

Mbuti mbomukonzya kusala zintu zikonzya kuyumya cilongwe canu a Leza?

“Ikusala Zyintu Zikonzya Kumulemeka Leza” (Ngazi Yamulindizi, April 15, 2011)

Amwiiye zinji kujatikizya Jehova mbwatulailila.

Jehova Ulabasololela Bantu Bakwe (9:50)

Amubone twaambo itwakagwasya mwaalumi umwi kusala mumakani aamwi aakatazya.

Jehova Nguupa Zintu Zyoonse Zibotu (5:46)

Amwiiye zinji kujatikizya mbomukonzya kumukkomanisya Jehova ciindi natapede busolozi bugaminide mumakani amwi.

“Sena Lyoonse Muyandika Malailile Aamu Bbaibbele?” (Ngazi Yamulindizi, December 1, 2003)