Ilampi lyakumusololela Munzila Yanu Yabuumi

“O JEHOVA, ndizi kuti muntu waansi tezi kubamba kabotu inzila yakwe. Muntu ulaya bweenda, pele tabwene kweenzya intaamu zyakwe.” (Jeremiya 10:23) Kwiinda mumajwi aaya, musinsimi Jeremiya wakatondezya kuti ibantunsi kwiina nobanga bazwidilila kuzumanana munzila yabuumi kakunyina lugwasyo. Ino nkuukuli lugwasyo luli boobo nkolunga lwajanika? Sintembauzyo uingula boobu mumupailo kuli Jehova Leza, ategwa: “Ijwi lyako ndilampi kuzituta zyangu, lilamunikila inzila yangu.”—Intembauzyo 119:105.

Ibantu ibacita ciiyo ca Jwi lya Leza, Ibbaibbele Lisalala, alimwi ibabelesya malailile ngolyaamba banikuli mbuli muntu uuyumuka mulweendo ciindi camafwumofwumo kakucisiya ansi. Naciyumuka, inga takuboni kabotu pe nkwaya nkaambo inga kucisiya. Pele izuba mboliyabupaswida, kulagweemuka alimwi ulatalika kubona zintu zinji. Mpoona, ibuzuba mbobuya bweenda izuba lilasika aciindi nolitalika kubalila acilungulungu. Ono muntu oyu ulatalika kuzibona kabotu-kabotu zintu zyoonse mbuli mbozibede. Imukozyanyo uli boobu uyeezya kasimpi ka Bbaibbele kakuti: “Pele inzila yabaluleme ili mbuli mumuni uumweka, uuya bungwengwemuka mane bwaca buzuba.”—Tusimpi 4:18.

Ino mbuti kuli baabo babukaka busolozi na malailile aa Leza? Ibbaibbele lyaamba kuti: “Inzila yabasizibi ili mbuli mudima uusia mbi; Tabezi, kuli butezi.” (Tusimpi 4:19) Inzya, basizibi bali mbuli muntu uutezemuka akuwa mumudima. Alimwi nokuba kuzwidilila ikubaanga kulimukubacitikila mubukkale ibubaanga mbubotu, nkwakaindi buyo kaniini nkaambo “taakwe busongo, taakwe luzibo, taakwe muzeezo uukonzya kuzwidilila mukulwana Mwami Leza.”—Tusimpi 21:30, Tonga Bible 1996.

Elyo aboobo, amwaatobele malailile aa Jwi lya Leza, Ibbaibbele. Ikuti naa mwacita obo, imajwi aali ku Tusimpi 3:5, 6 akuti: “Syoma Jehova amoyo wako woonse; utalifunkizyi kumaanu aako omwini. Umuzibye munzila zyako zyoonse, nkabela uyooyenzya myeendelo yako,” ayakumubedaa kasimpe.