Ibusongo Bwabunaleza—Ino Butondezyegwa Buti?

IMWAMI musongo Solomoni wakamanizya caano cakwe camuntu mubombe pele kali musongo iwakavwuna munzi woonse kulunyonyooko kwiinda mukwaamba majwi aaya aakuti: “Busongo bwamucete bwasampaulwa, amajwi aakwe taaswiililwi.” Pele cilausisya kujana kuti “katakwe muntu iwakaingasila [kuyeeya] oyo mucete.”—Mukambausi 9:14-16.

Ibantu balaacilengwa cakutabalanganya kabotu bantu bacete, nokuba kuti aaba bacete bacitide zintu zibotu. Oobu mbucakacitika kuli Jesu. Isaya wakasinsima kujatikizya nguwe kuti: “Wakasampaulwa akukakigwa kubantu, muntu wamapenzi uubwene maciswe.” (Isaya 53:3) Ibamwi bakamukaka Jesu akaambo kakuti tanaakajisi cuuno naa kubula mpuwo mbuli bwakali basololi mumazubaakwe. Nokuba boobo, wakalijisi busongo kwiinda bantu boonse basizibi. Ibantu bamumunzi Jesu mwaakali kukkala tiibakakuzumina kuti “mwana wamubezi” wakatondezya busongo buli boobo akucita maleele mapati aali boobo. Kuyeeya boobo kwakali kulubizya kapati nkaambo cibalo cizumanana kwaamba kuti Jesu “oko teewakacita malele manji nkaambo kakutasyoma kwabo.” Elo kaka bakaindwa maleele bantu aaba!—Matayo 13:54-58.

Tutalubizyi pe mbuli mbubakalubizya balo. Jesu wakati: “Maanu alulamikwa kumilimo yao.” Aabo bacita mulimo wa Leza akuyiisya busongo bwakujulu balazyibwa, kutali kwiinda muzyuuno nzyobajisi naa buvwubi, pele nkwiinda “[mu]micelo mibotu” njibatondezya—lusyomo lwabo luyeeme a Bbaibbele alimwi amicito.—Matayo 7:18-20; 11:19.