• Jehova Watondezya Bukali Kumasi
    Ibusinsimi bwa Isaya Mumuni ku Bantu Boonse-Ibbuku 1

    • 16, 17. Ino cisi ca Edomu ciyooba nzi, alimwi ciyootola ciindi cilamfwu buti kacili muciimo eeco?

      16 Ibusinsimi bwa Isaya bwazumanana ikusinsima kuti mubusena bwabana Edomu kuyooba banyama bamusokwe, icaamba kusaalwa kulangilwa ategwa: “Kuzwa kuzyalani limwi kusikila kuzyalani limwi ciyooba matongo. Takukooyooba bantu bainda nkuko mazuba oonse mane kukabe kutamani. Sifundwe anungu mbebayoocivuba, tumba acikwangala mbebayookala nkuko. Uyoovungulula alincico ceelesyo calupilingano azipimyo zyalupilingano. Basilutwe baco, taakwe uucili nkuko bwami nibwaambwa, abapati baco boonse tabacibonwi limbi. Mamvwa ayoomena atala lyamaanda aaco aabwami. Lweemya amikoka ziyoomena mumaanda aaco aakulwisya. Ciyooba cikalilo cabamwaba alubuwa lwampoo. Banyama bamusokwe bayooswanana abaumpe, abalo bagutu bayoolila umwi aumwi kukwiita mweenzinyina. Muzimu wamasiku uyookala-kala mulincico akulijanina cilyokezezyo. Mulala uyooyaka citeente cakwe nkuko, uyoozyala mai.”—Isaya 34:10b-15.a

      17 Ee, kunyina uuyookkala mucisi ca Edomu. Balikke banyama bamusokwe, bayuni alimwi anzoka nzezyinookkala mumo, liyooba tongo. Inyika eeyi iyoozumanana kuba tongo “lyoonse mane kukabe kutamani” kweelana abwaamba kapango 10. Kunyina noiyoobukulusyigwa pe.—Obadiya 18.