20. Mbuti muuya uusalala mbowakabagwasya ba Juda kutobela mulawo wa Leza wakumanizya kuyaka tempele?

²⁰ Kwakalibonya mbuli kuti kwakali kukazyigwa ikwakali mbuli cilundu cipati, ikwakali kucitwa abalupati-pati bafwulumende ibakapa kuti mulimo ukasyigwe. Pele Jehova wakasyomezya kuti mapenzi aakali kulibonya mbuli kuti “[n]cilundu cipati” akali kuyoogusyigwa akuba “ibanda buyo.” (Zekariya 4:7) Alimwi eezyo zyakacitika. Mwami Dariyo Wakusaanguna wakalangaula akujana lugwalo lwa Koresi lwakali kuzumizya ba Juda kuyakulula tempele. Aboobo Dariyo wakagusya mulawo wakabikkidwe wakukasya akuzuminizya kuti mali aabwezyegwe muciyobwedo camwami akupa ba Juda kutegwa abagwasyilizye mumulimo wakuyaka. Eelo kwakali kucinca kupati ooku! Sena muuya wa Leza wakabeleka mubukkale oobu? Tulakonzya kusyoma kuti masimpe muuya wa Leza wakabeleka. Itempele lyakamanizyigwa mu 515 B.C.E., mumwaka wacisambomwi wakulela wa Dariyo Wakusaanguna.—Ezara 6:1, 15.

5, 6. Nkuzuzikizyigwa kupati kuli nkwaamba Zekariya 4:7?

⁵ Tulakonzya kusyoma kuti ikukambauka akuyiisya kucitwa kuciindi ncotupona ababelesi ba Jehova bamumvwida kuyoozumanana kwiinda mulugwasyo lwa Jehova. Kuli Zekariya 4:7 tubala kuti: “Ibbwe lyakumpela uyoolikazika, bantu niboongolola kuti, Cabota! Cabota!” Pele ino eeci citondezya mulimo nzi mupati uucitwa kuciindi ncotupona?

⁶ Ibbuku lya Zekariya 4:7 lyakaamba ciindi ibukombi bwakasimpe bwa Mwami Mupati Mububumbo boonse nobuyoopilusyigwa kubukkale bulondokede mutempele yakwe yakumuuya. Tempele eeyo nenzila njabambide Jehova motukonzya kumukomba kwiinda mukugwasyigwa acipaizyo ca Kristo Jesu. Ncamasimpe kuti tempele mpati yakumuuya yaliko lyoonse kuzwa mumwaanda wamyaka wakusaanguna C.E. Pele bukombi bwakasimpe buyoolondoka anyika. Tuulunzuma twabakombi lino tulabelekela mutempele lyakumuuya yaanyika. Aaba alimwi ankamu yabantu bayoobusyigwa bayoolondoka mu Bulelo bwa Jesu Kristo bwa Myaka iili Cuulu. Kumamanino aamyaka iili cuulu, balikke bakombi ba Leza bakasimpe mbabayoocaala munyika iisalazidwe.