Kwiinda mukubelesya Bwami bwakwe, lino-lino Jehova uyakwaamanizya mapenzi eesu oonse. Makani aaya mabotu kapati cakuti bantu boonse bayandika kwaamvwa. Jesu wakali kuyanda kuti, basikumutobela baambile bantu boonse mulumbe ooyu! (Matayo 28:19, 20) Mbuti Bakamboni ba Jehova mbobaatobela malailile aa Jesu?

1. Mbuti lugwalo lwa Matayo 24:14 mboluzuzikizyigwa mazuba aano?

Jesu wakasinsima kuti: “Makani mabotu aa Bwami aaya ayookambaukwa munyika yoonse.” (Matayo 24:14) Bakamboni ba Jehova balikkomene kutola lubazu mumulimo ooyu uuyandika kapati. Tulakambauka makani mabotu nyika yoonse mumyaambo iinda ku 1,000! Mulimo ooyu mupati, uyandika kubeleka canguzu alimwi akuweendelezya kabotu. Inga tiicakonzyeka kuubeleka kakunyina kugwasyigwa a Jehova.

2. Nkusolekesya kuli buti nkotucita kutegwa tukambaukile bantu?

Tulakambauka kufwumbwa nkotukonzya kubajana bantu. Mbubwenya mbuli Banakristo bamumwaanda wamyaka wakusaanguna, tulakambauka ‘kuŋanda aŋanda.’ (Milimo 5:42) Kwiinda mukubelesya nzila eeyi, tulakambaukila bantu banji kapati mwaka-amwaka. Alimwi mbwaanga zimwi ziindi bantu tabajaniki mumaanda, tulakambauka amumasena aabuleya. Lyoonse inga tuyandaula zyoolwe zyakwaambila bamwi kujatikizya Jehova alimwi amakanze aakwe.

3. Ino mbaani bajisi mukuli wakukambauka makani mabotu?

Boonse Banakristo beni-beni balijisi mukuli wakwaambila bamwi makani mabotu. Alimwi tulaubikkila maano kapati mulimo ooyu. Tulakambauka kusikila mpotugolela nkaambo tulizyi kuti buumi bwabantu buli muntenda. (Amubale 1 Timoteyo 4:16.) Tatubbadelwi notubeleka mulimo ooyu, nkaambo Bbaibbele lyaamba kuti: “Mwakapegwa kakunyina kubbadelesyegwa, amupe kakunyina kubbadelesya.” (Matayo 10:7, 8) Tabali bantu boonse bautambula mulumbe wesu. Pele tulazumanana kukambauka nkaambo ncibeela cabukombi bwesu alimwi cilamukkomanisya Jehova.

AMWIIYE ZINJI

4. Tulabeleka canguzu kutegwa tukambaukile bantu boonse

VIDIYO: Kukambaukila “Kumasena Aakulamfwu Kapati Aanyika” (7:33)

• Ncinzi cimukkomanisya kujatikizya kusolekesya nkobacita Bakamboni ba Jehova kutegwa bakambauke?

Amubale Matayo 22:39 a Baroma 10:13-15, akubandika mibuzyo eeyi:

• Mbuti mulimo wesu wakukambauka mboutondezya kuti tulabayanda bantu?

• Ino Jehova ulimvwa buti kujatikizya baabo bakambauka makani mabotu?—Amubone kapango 15.

5. Tuli basimilimonyina a Leza

Zyakuluula zinji zitondezya kuti Jehova nguutusololela mumulimo wesu. Mucikozyanyo, bumwi buzuba kumazuba, mukwesu Paul waku New Zealand wakajana mukaintu naakali kukambauka kuŋanda aŋanda. Buzuba mbubwenya oobo kuseeni, mukaintu wakapaila kubelesya zina lya Leza lyakuti Jehova akulomba kuti muntu umwi amuswaye. Mukwesu Paul wakaamba kuti: “Nokwakainda mawoola otatwe, ndakamuswaya.”

Amubale 1 Bakorinto 3:9, akubandika mubuzyo ooyu:

• Mbuti zyakuluula mbuli ceeci caku New Zealand mbozitondezya kuti Jehova ulausololela mulimo wakukambauka?

Amubale Milimo 1:8, akubandika mubuzyo ooyu:

• Nkaambo nzi ncotuyandika kugwasyigwa a Jehova kutegwa tuuzuzikizye mulimo wesu?

Sena Mulizyi?

Nsondo ansondo kumuswaangano wamukati kansondo, tulatambula lwiiyo lutugwasya kukambauka. Kuti naa mwakajanika kale kumiswaangano eeyi, ino muyeeya buti kujatikizya lwiiyo ndotutambula?

6. Tulaatobela malailile aa Leza aajatikizya kukambauka

Mumwaanda wamyaka wakusaanguna, basikukazya bakasola kubakasya basikutobela Jesu kukambauka. Banakristo bakusaanguna, bakalukwabilila lwaanguluko lwabo lwakukambauka kwiinda ‘mukusitikizya makani mabotu mumulawo.’ (Bafilipi 1:7) Abalo Bakamboni ba Jehova balacita mbubwenya oobo mazuba aano.a

VIDIYO: Kukwabilila Makani Mabotu Mumulawo (2:28)

Amubale Milimo 5:27-42, akubandika mubuzyo ooyu:

• Nkaambo nzi ncotutaleki kukambauka?—Amubone kapango 29, 38, a 39.

MUBUFWAAFWI

Jesu wakalailila basikumutobela kukambauka makani mabotu kumasi oonse. Jehova ulabagwasya bantu bakwe kucita mulimo ooyu.

Ncinzi Ncomwaiya?

• Ino makani mabotu akambaukwa buti munyika yoonse?

• Mbuti mulimo wesu wakukambauka mboutondezya kuti tulabayanda bantu?

• Sena muyeeya kuti mulimo wakukambauka ulakonzya kutuletela lukkomano? Nkaambo nzi?

AMUZYIBE ZINJI

Amubone Bakamboni ba Jehova mbobakambaukila bantu mumadolopo mapati.

Bukambausi Bwaalubazu Bwakukambauka Kubuleya mu Paris (5:11)

Ncinzi Bakamboni ba Jehova ncobacita kutegwa bakambaukile bazangalisi?

Kukambaukila Bazangalisi (5:59)

Amumvwe muntu umwi napandulula mbwaakakkomana kubelesya buumi bwakwe mumulimo wakukambauka.

Ndilikkomene Kuti Ndakasala Mulimo Ooyu (6:29)

Amubone kujatikizya milandu mipati imwi njotwakazunda munkuta mboyakapa kuti mulimo wakukambauka makani mabotu uyaambele.

“Bakambausi ba Bwami Balatola Milandu Yabo Kunkuta” (Bwami bwa Leza Bulalela!, cibalo 13)

Jesu wakaamba kuti Banakristo baleelede kubbapatizyigwa. (Amubale Matayo 28:19, 20.) Pele ino lubbapatizyo ninzi? Alimwi ino ncinzi muntu ncayelede kucita kutegwa ayizuzikizye mbaakani eeyi?

1. Ino lubbapatizyo ninzi?

Ibbala lyakuti “kubbapatizya” lizwa kubbala lya Chigiriki ilyaamba “kubbila” mumaanzi. Ciindi Jesu naakabbapatizyigwa, wakabbizyigwa mu Mulonga wa Jordano, mpoonya ‘wakaimpuka mumaanzi.’ (Marko 1:9, 10) Mbubwenya buyo, Banakristo bakasimpe balabbizyigwa cakumaninina mumaanzi.

2. Ino kubbapatizyigwa citondezya nzi?

Kwiinda mukubbapatizyigwa, muntu utondezya kuti wakalyaaba kuli Jehova Leza. Mbuti muntu mbwalyaaba? Katanabbapatizyigwa, ulapaila kuli Jehova kali alikke kumwaambila kuti uyanda kumubelekela kukabe kutamani. Ulasyomezya kuti unookomba buyo Jehova alikke alimwi akuti kucita kuyanda kwa Leza cinooli cintu ciyandika kapati mubuumi bwakwe. Usala ‘kuliimya, akuzumanana kutobela’ njiisyo alimwi acikozyanyo ca Jesu. (Matayo 16:24) Kulyaaba alimwi akubbapatizyigwa nkwacita muntu, kumupa kuba acilongwe ciyumu a Jehova alimwi abakombinyina.

3. Mbuti muntu mbwakonzya kweelela kubbapatizyigwa?

Muntu ulakonzya kulibambila kubbapatizyigwa kwiinda mukwiiya kujatikizya Jehova alimwi akuba alusyomo mulinguwe. (Amubale Bahebrayo 11:6.) Ciindi luzyibo alimwi alusyomo noziyaabuvwula, alwalo luyando lwanu kuli Jehova luyoovwula. Mpoonya muyooba aluyandisisyo lwakuyanda kukambauka kujatikizya nguwe alimwi akupona kweelana azyeelelo zyakwe. (2 Timoteyo 4:2; 1 Johane 5:3) Ciindi muntu ‘napona kweelana ambwayanda Jehova akumukkomanisya cakumaninina,’ ulakonzya kusala kulyaaba kuli Leza akubbapatizyigwa.—Bakolose 1:9, 10.a

AMWIIYE ZINJI

4. Ncotukonzya kwiiya kulubbapatizyo lwa Jesu

Amubale Matayo 3:13-17, akwiiya zinji kujatikizya lubbapatizyo lwa Jesu. Mpoonya mubandike mibuzyo eeyi:

• Sena Jesu wakabbapatizyigwa kali muvwanda?

• Ino wakabbapatizyigwa buti? Sena wakasansailwa buyo maanzi?

Jesu wakatalika mulimo wakwe waalubazu ngwaakapegwa a Leza anyika naakamana kubbapatizyigwa. Amubale Luka 3:21-23 alimwi a Johane 6:38, akubandika mubuzyo ooyu:

• Naakamana kubbapatizyigwa, mulimo nzi Jesu ngwaakabikka mubusena bwakusaanguna?

5. Kubbapatizyigwa nimbaakani njomukonzya kuzuzikizya

Kumatalikilo mulakonzya kuyeeya kuti kulyaaba akubbapatizyigwa ncintu cikatazya. Nokuba boobo, mulakonzya kuyaambele cakuti andinywe inga mwalimvwa kuti muleelede kubweza ntaamu eeyi iiyandika kapati. Kutegwa mubone bantu bakacita boobo, atweebelele VIDIYO.

VIDIYO: Kuyumya Cilongwe a Jehova (1:11)

Amubale Johane 17:3 alimwi a Jakobo 1:5, akubandika mubuzyo ooyu:

• Ncinzi cikonzya kugwasya muntu kulibambila kubbapatizyigwa?

1. Tulalyaaba kwiinda mukwaambila Jehova kuti tuyanda kumubelekela kukabe kutamani

2. Ciindi notubbapatizyigwa, tutondezya bantu kuti twakalyaaba kuli Leza

6. Ciindi notwabbapatizyigwa, tuba cibeela camukwasyi wa Jehova

Ciindi notwabbapatizyigwa, tuba cibeela camukwasyi wa Jehova wanyika yoonse uukamantene. Nokuba kuti tuzwa mumasena alimwi amubukkale bwiindene-indene, tusyoma zintu zikozyenye alimwi akupona kweelana azyeelelo zyakulilemeka zikozyenye. Amubale Intembauzyo 25:14 alimwi a 1 Petro 2:17, akubandika mubuzyo ooyu:

• Mbuti lubbapatizyo mbolucijatikizya cilongwe ncajisi muntu a Jehova alimwi abakombi bakwe?

MUBUFWAAFWI

Jesu wakayiisya kuti Banakristo beelede kubbapatizyigwa. Kutegwa muntu asike ambaakani eeyo, weelede kuba alusyomo luyumu muli Jehova, kupona kweelana azyeelelo zyakwe alimwi akulyaaba kulinguwe.

Ncinzi Ncomwaiya?

• Ino lubbapatizyo ninzi, alimwi nkaambo nzi ncoluyandika?

• Mbuti kulyaaba mbokuswaangene akubbapatizyigwa?

• Nintaamu nzi izisololela kukulyaaba akubbapatizyigwa?

AMUZYIBE ZINJI

Amwiiye mbolubede lubbapatizyo.

“Ino Lubbapatizyo Ninzi?” (Cibalo caaintaneti)

Amulange-lange nzila zikonzya kupa kuti muntu ayelele kubbapatizyigwa.

“Luyando Akulumba Jehova Zilatukulwaizya Kubbapatizyigwa” (Ngazi Yamulindizi, March 2020)

Amubale kujatikizya kusala nkwaakacita mwaalumi umwi kutegwa abbapatizyigwe, mbokwatakayeeme buyo ambwaakali kulimvwa.

“Bakali Kuyanda Kuti Ndilibonene Ndelikke Cini Bbaibbele Ncolyaamba” (Ngazi Yamulindizi, February 1, 2013)

Amubone kaambo kubbapatizyigwa ncoili mbaakani iiyandika kapati alimwi akaambo ncomweelede kulibambila.

“Sena Ndeelede Kubbapatizyigwa?” (Mibuzyo Njobabuzya Bakubusi​—Bwiinguzi Bugwasya, Volyumu 2, cibalo 37)