Cakuma October mu 29 C.E., Jesu wakaunka Kumulonga wa Jordano kwaakubbapatizyigwa. Ibbaibbele lilaamba cakacitika: “Lino Jesu naakamana kubapatizigwa, mpawo wakazwa mumaanzi. Nkabela kujulu kwakajaluka, elyo wakabona Muuya wa-Leza, ulaseluka mbuli inziba, uleza kulinguwe. Lino kwakazwa ijwi kujulu, lyakati, Ngooyu mwanaangu uuyandika ngunkondelwa.”a (Matayo 3:16, 17) Majwi aaya mabotu aakaambwa a Jehova kumugama, atwaambila zinji kujatikizya mbwabede mbwali Taata. Amubone zintu zyotatwe Jehova zyaakaamba ku Mwanaakwe.

Kusaanguna, kwiinda mukwaamba majwi aakuti “Nduwe Mwanaangu,” Jehova wakali kwaamba kuti, ‘Ndilikkomene kuba Swaanu.’ Usyi uuzi nzyobayandika bana bakwe ulabalumbaizya akubabikkila maano. Bana bayandika kubona kuti balayandika mumukwasyi. Amweezyeezye buyo mbwaakalimvwa Jesu—nokuba kuti wakali mupati—ikwaambilwa boobu aba Bausyi.

Cabili, kwiinda mukwaambila Mwanaakwe kuti “ooyandwa,” Jehova caatangalala wakatondezya luyando ndwaakajisi kuli Jesu. Mubwini Bausyi bakali kwaamba kuti ‘Ndilakuyanda.’ Usyi uuli kabotu ulabaambila bana bakwe kuti ulabayanda kapati. Majwi mbuli bwayaaya akubayanda ncobeni alabagwasya bana kukomena kabotu. Eelo akamunjila mumoyo Jesu majwi ngaakamvwa kuli Bausyi kabatondezya luyando ndobajisi kuli nguwe!

Catatu, kwiinda mukwaamba majwi aakuti “ndakondwa anduwe,” Jehova wakatondezya kuti wakamukkomanina Mwanaakwe. Cakali mbuli kuti Jehova wakali kwaamba kuti, ‘Mwanaangu, Ndilikkomene azintu nzyoocita.’ Usyi siluyando ulalangaula nzila zyakwaambila bana bakwe kuti ulazikkomanina zintu nzyobaamba naa kucita. Bana balakulwaizyigwa akuba basicamba bazyali babo nobabaambila kuti balabakkomanina. Cakutadooneka, Jesu wakakulwaizyigwa ikumvwa kuti Bausyi bakali kumukkomanina.