Sikuminza Iwoona

13, 14. (a) Amwaambe mubufwaafwi cikozyanyo ca Jesu camuntu uumwaya mbuto. (b) Ino nguni wiimininwa asikuminza, alimwi ino mbuto ninzi?

¹³ Kulugwalo lwa Marko 4:26-29, tulajana cikozyanyo acimbi cijatikizya sikuminza caamba kuti: “Bwami bwa-Leza buli mbuli muntu uuminza imbuto ansi. Walo uloona akubuka lyoonse masiku asikati nkabela imbuto zilamena akukomena, pele walo tazi naazikomena buti. Insi ilazyala micelo ini, kutaanguna busonga, nkokuya makunka, nkokuya maila aatuba mumakunka. Lino maila naabizwa, mpoonya mpoonya ulatuma cigonsyo, nkaambo casika ciindi cakutebula.”

¹⁴ Ino sikuminza nguni? Bamwi mu Bunakristo bwanyika basyoma kuti eeci caamba Jesu mwini. Pele mbuti Jesu mbwakonzya kwaambwa kuti uloona alimwi takonzyi kuzyiba mbuto mbozikomena? Masimpe Jesu ulizyi mbozikomena! Muciindi caboobo, sikuminza, mbuli uulya waambwa kale mumincali yainda, wiiminina bantu baambilizya Bwami aumwi kumugama, aabo basyanga mbuto zya Bwami kwiinda mumulimo wabo wakukambauka cabusungu. Imbuto nzyobamwaya mubulongo ndijwi ndyobakambauka.b

15, 16. Ino nkaambo nzi kajatikizya kukomena kwini alimwi akwakumuuya nkaakaamba Jesu mucikozyanyo casikuminza?

¹⁵ Jesu waamba kuti sikuminza “uloona akubuka lyoonse masiku asikati.” Eeci tacaambi kuti sikuminza tabikkili maano pe. Citondezya buumi bwabuzuba abuzuba bwabantu banji. Imajwi aabelesyedwe aawa atondezya cintu cizumanana kucitika icakubeleka isikati akoona masiku kwaciindi cili mbocibede. Jesu wakacipandulula cakali kucitika ciindi eeco. Waamba kuti: “imbuto zilamena akukomena.” Mpoonya Jesu uyungizya kuti: “Pele walo tazi naazikomena buti.” Icikankaizyigwa aawa ncakuti zilalikomenena zini.c

¹⁶ Ino ncinzi ncaakali kwaamba Jesu aawa? Amubone kuti cikankaizyigwa aawa nkukomena alimwi aciindi kukomena ooku ncokutola. “Insi ilazyala micelo ini, kutaanguna busonga, nkokuya makunka, nkokuya maila aatuba mumakunka.” (Mk. 4:28) Kukomena ooku kulacitika buce-buce alimwi muzibeela-beela. Takukonzyi kusinikizyigwa naa kubindaanizyigwa. Ncimwi buyo akukomena kwakumuuya. Eeci cilacitika muzibeela-beela ciindi Jehova napa kuti kasimpe kakomene mumoyo wamuntu iweelela.—Inc.13:48; Heb. 6:1.

17. Ino mbaani batola lubazu ciindi imbuto yakasimpe noizyala micelo?

¹⁷ Ino mbuti sikuminza mbwatola lubazu mubutebuzi ciindi “maila naabizwa”? Ciindi Jehova napa kuti kasimpe ka Bwami kakomene mumyoyo yabasikwiiya bapya, mpoonya balayaambele mane akukulwaizyigwa aluyando ndobajisi kuli Leza kuti balyaabe kuli nguwe. Balakutondezya kulyaaba kwabo kwiinda mukubbapatizyigwa mumeenda. Ibakwesu bazumanana kuyaambele akusima, buce-buce balaba amikuli mumbungano. Micelo ya Bwami ilatebulwa asikuminza alimwi abasikwaambilizya ba Bwami bambi ibatakatola lubazu mukusyanga mbuto eeyo yakagwasya kuti ooyu muntu abe sikwiiya. (Amubale Johane 4:36-38.) Masimpe, “oyo uusyanga ayooyo uutebula [balabotelwa] antoomwe.”