Nkaambo Nzi Basikwiiya Ba Jesu Ncobataliimyi Kulya?

Johane Mubbapatizi wali muntolongo kuzwa ciindi Jesu naakali ku Pobwe Lyakwiindilila lyamu 30 C.E. Johane wakali kuyanda kuti basikwiiya bakwe babe basikutobela Jesu, pele tabali boonse ibacita boobo mumyezi yatobela kuzwa ciindi Johane naakabikkwa muntolongo.

Lino nolyalondelela Pobwe Lyakwiindilila lyamu 31 C.E., basikwiiya ba Johane bamwi baboola kuli Jesu akubuzya kuti: “Ino nkaambo nzi swebo aba Farisi ncotuliimya kulya, pele basikwiiya bako tabaliimyi?” (Matayo 9:14) Ba Farisi balaliimya kulya kweelana acilengwa cabukombi bwabo. Mukuya kwaciindi, Jesu mane wakaamba cikozyanyo camu Farisi umwi uulibona kululama ooyo iwakapaila kuti: “O Leza, ndilakulumba kuti tandili mbuli bantu bamwi . . . Ndilaliimya kulya ziindi zyobilo ansondo.” (Luka 18:11, 12) Ambweni abalo basikwiiya ba Johane balaacilengwa cakuliimya kulya. Alimwi ambweni balaliimya kulya akaambo kakulila kwaangwa kwa Johane. Abalo basikulangilila buyo bagambwa kubona kuti basikwiiya ba Jesu tabaliimyi kulya, ambweni kuti batole lubazu mukutondezya kuusa akaambo kaceeco camucitikila Johane.

Jesu wavwiila kwiinda mukupa cikozyanyo eeci: “Sena balongwe basibwiinga balijisi kaambo kabapa kulila ciindi sibwiinga nacili ambabo? Pele ciyoosika ciindi ncobayoonyangwa sibwiinga, eelyo bayooliimya kulya.”—Matayo 9:15.

Johane lwakwe wakaamba Jesu kuti ngosibwiinga. (Johane 3:28, 29) Aboobo, eelyo Jesu naciliko, basikwiiya bakwe tabaliimyi kulya pe. Kumbele aamazuba, Jesu aakufwa, basikwiiya bakwe bayoolila alimwi cakulya tacikabooli kumoyo. Pele aakubusyigwa, zintu ziyakucinca! Aciindi eeco, tabakabi limbi akaambo kakuliimya kulya akaambo kakuusa.

Mpoonya Jesu wapa zikozyanyo zyobilo eezyi: “Kunyina muntu uusuma cigamba camulembo mupya acisani caatala cakaindi, nkaambo cigamba camulembo mupya cilakonzya kukwela cisani eeco, aboobo cimonko cilakomena kapati. Alimwi bantu tababikki waini mupya munkomo zyazipaya zyakaindi. Ikuti bacita boobo, nkomo zilaanduka, waini ulatika ankomo zilanyonyooka. Pele bantu babikka waini mupya munkomo zyazipaya zipya.” (Matayo 9:16, 17) Ino Jesu upandulula nzi?

Jesu ugwasya basikwiiya ba Johane Mubbapatizi kuzyiba kuti kunyina weelede kulangila basikutobela Jesu kuti kabaccilila zilengwa zyakaindi zyabukombi bwaba Juda, mbuli cilengwa cakuliimya kulya. Tanaakaboolela kuzyikugambika akutola ambele bukombi bwakaindi bumanide kale ibulindila buyo kusoogwa. Bukombi mbwasumpula Jesu tabuli boobo bweendelana abukombi bwaba Juda bakuciindi eeci bwalo bujisi tunsiyansiya twabantu. Peepe, tasoli kubikka cigamba camulembo mupya acisani cakaindi naa kubikka waini mupya munkomo zyazipaya zyakaindi, ziyuminide.