Mbaani banikuyandaula Bwami bwa Leza? Jesu wayubununa kuti mweelwe musyoonto buyo, nkokuti “katanga kaniini” kabantu basyomeka mbabanikucita oobo. Kumbele kuyakuyubununwa kuti mweelwe wabantu aaba unooli buyo 144,000. Ino babambilidwe nzi? Jesu ubasyomezya kuti: “Uso wasala kumupa Bwami.” Aaba kunyina nobanikubikkila maano kukuyandaula lubono lwaanyika, oolo babbi ndobakonzya kubba. Muciindi caboobo, myoyo yabo inooli ‘kulubono lutamani kujulu,’ ooko nkobayakulela antoomwe a Kristo.—Luka 12:32-34.

Jesu wapandulula kuti balikke aabo bali mu “katanga kaniini” mbabayoopegwa busena bwakulela mu Bwami bwakujulu. (Luka 12:32) Pele kupegwa bulumbu oobu butaliboteli makani mapati. Mubwini, Jesu wayaambele ikukankaizya muntu mbwayandika kuba amizeezo mibotu ikuti kayanda kuba akati kabaabo bayakuba mu Bwami.