4, 5. (a) Ino mubanzi mucikozyanyo ca Jesu wakalijana mubukkale buli buti? (b) Ino Jesu wakabakulwaizya kucita nzi basikumutobela?

⁴ Amubale Luka 16:1-9. Cikozyanyo ncaakapa Jesu camubanzi uutaluleme cipa kukkala ansi kuyeeya. Nobakamubejelezya kunyonyoona lubono, mubanzi ooyu “wakacita cabusongo” kwiinda ‘mukujana balongwe’ ibakali kuyoomugwasya aakusweekelwa mulimo wakwe wabubanzi.a Masimpe, Jesu tanaakali kukulwaizya basikwiiya bakwe kucita cakutalulama kutegwa bazwidilile munyika eeyi. Bukkale oobo wakabwaamba kuti mbukkale ‘bwabana bamubweende bwazintu oobu,’ pele wakabelesya cikozyanyo eeci kutegwa akankaizye kaambo kamwi.

⁵ Jesu wakalizyi kuti mbubwenya mbuli mubanzi iwakajanika mubukkale bukatazya, basikutobela Jesu banji bakali kuyooyandika zintu zyakubagwasya kutegwa bazumanane kupona mubukkale bwamunyika eeyi imuli kutalulama mumakani aamakwebo. Aboobo wakabakulwaizya kuti: “Amujane balongwe kwiinda mukubelesya lubono lutaluleme kutegwa lwaakubula mpindu, bakamutambule [Jehova alimwi a Jesu] mumasena aakukkala aatamani.” Ino ncinzi ncotukonzya kwiiya kululayo lwa Jesu?

6. Ino tuzyi buti kuti makwebo aacitika mazuba aano tanaakali cibeela camakanze aa Leza?

⁶ Nokuba kuti Jesu tanaakapandulula ikaambo ncaakaambila kuti lubono ‘talululeme,’ Bbaibbele lilakasalazya ikaambo kakuti kucita makwebo tanaakali cibeela camakanze aa Leza. Jehova wakapa Adamu a Eva zintu zyoonse nzyobakali kuyandika. (Matl. 2:15, 16) Kumbele, ciindi muuya uusalala nowakabeleka kubananike bamumbungano yamumwaanda wamwaka wakusaanguna, “kunyina naba omwe akati kabo iwakali kwaamba kuti zintu nzyaakajisi zyakali zyakwe alikke, pele bakali kwaabana zintu zyoonse.” (Mil. 4:32) Musinsimi Isaya wakaamba kujatikizya ciindi eelyo bantu boonse nobayoolikwaya kubelesya zintu zyakumubili zyamunyika eeyi. (Is. 25:6-9; 65:21, 22) Pele nocitanasika ciindi eeco, basikutobela Jesu beelede ‘kucita cabusongo’ kutegwa bajane zintu zikonzya kubagwasya kwiinda mukubelesya “lubono lutaluleme” lwamunyika eeyi, kumwi kababikkilide maano kukkomanisya Leza.

7. Ino ndulayo nzi ilujanika kulugwalo lwa Luka 16:10-13?

⁷ Amubale Luka 16:10-13. Mubanzi mucikozyanyo ca Jesu wakapanga balongwe kutegwa aligwasye lwakwe mwini. Nokuba boobo, Jesu wakakulwaizya basikumutobela kupanga zilongwe kujulu kabajisi makanze mabotu ikutali kuyanda kuligwasya lwabo beni. Tupango itutobela cikozyanyo eeci tuswaanganya kubelesya “lubono lutaluleme” akusyomeka kuli Leza. Ikaambo Jesu nkaakali kwaamba aawa nkakuti, tulakonzya ‘kutondezya kuti tulasyomeka’ katujisi lubono oolo akuti inga twalweendelezya kabotu ikuti katulujisi. Mbuti mbotukonzya kucita oobo?