• Jehova Ulabayanda Aabo ‘Ibazyala Micelo Cakuliyumya’
    Ngazi Yamulindizi (Yakwiiya)—2018 | May

    • 7. (a) Ino mbaani ibaimininwa ‘amulimi,’ “musaansa” alimwi ‘amitabi’? (b) Ino mubuzyo nzi ngotuyanda kwiingula?

      7 Amubale Johane 15:1-5, 8. Amubone kuti Jesu wakaambila baapostolo bakwe kuti: “Taata ulalemekwa muliceeci, ikuti muzumanane kuzyala micelo minji akulitondezya kuti muli basikwiiya bangu.” Jesu wakapandulula kuti Jehova “ngomulimi,” walo “musaansa wini-wini” mpoonya basikwiiya bakwe “mitabi.”b Aboobo ino micelo nzi njobeelede kuzyala basikutobela Kristo? Mucikozyanyo eeci, Jesu tanaakayaamba cacigaminina micelo eeyo, pele wakaamba buyo kaambo kamwi ikayandika kapati ikakonzya kutugwasya kwiizyiba micelo eeyo.

      8. (a) Mucikozyanyo eeci, nkaambo nzi micelo ncoitakonzyi kwaambwa kuti mbaasikwiiya bapya? (b) Ino ncinzi Jehova ncayanda kuti tucite?

      8 Kaamba kujatikizya Bausyi, Jesu wakati: “Imutabi wangu uuli woonse uutazyali micelo ulaugonka.” Munzila iimwi, Jehova utubona kuti tuli babelesi bakwe lilikke kuti katuzyala micelo. (Mt. 13:23; 21:43) Aboobo, mucikozyanyo eeci, imicelo Munakristo umwi aumwi njayelede kuzyala tayaambi basikwiiya bapya mbakonzya kujana. (Mt. 28:19) Nocali boobo, nkokuti Bakamboni basyomeka ibatajani basikwiiya akaambo kakuti bakambaukila mucilawo bantu mobatabikkili maano balakonzya kuba mbuli mitabi iitazyali yamucikozyanyo ca Jesu. Kuyeeya kuli boobo takuluzi pe! Nkaambo nzi? Nkaambo kakuti tatukonzyi kubasinikizya bantu kuba basikwiiya. Ikubona babelesi bakwe kuti tabeeleli akaambo kakwaalilwa kucita cintu ncobatakonzyi kucita munguzu zyabo, inga tiiceendelana anzila zya Jehova zyaluyando. Cili coonse Jehova ncatwaambila kuti tucite cilakonzyeka lyoonse.—Dt. 30:11-14.

      9. (a) Ino mulimo nzi uutupa kuzyala micelo? (b) Ncikozyanyo nzi ncotutiilange-lange, alimwi nkaambo nzi?

      9 Ino micelo nzi njotweelede kuzyala? Cilisalede kuti, micelo kweelede kuti yaamba mulimo umwi aumwi wesu ngwakonzya kucita. Ino mulimo nzi uutupa “kuzyala micelo”? Mulimo wakukambauka makani mabotu aa Bwami bwa Leza.c (Mt. 24:14) Cikozyanyo ca Jesu cakuminza mbuto cilakasinizya kaambo aaka. Atulange-lange cikozyanyo eeci cabili.