Ncocaamba Kutatola Lubazu Mutwaambo Twacisi

Jesu wakayiisya kuti basikumutobela tabeelede ‘kuba banyika.’ (Johane 15:19) Eeci cibikkilizya kutatola lubazu mutwaambo twacisi, nkokuti mumapolitikisi alimwi amunkondo. Mubwini, talili lyoonse nocili cuuba-uba kutatola lubazu mutwaambo twacisi. Bantu balakonzya kutufwubaazya akaambo kaceeci. Mbuti mbotukonzya kuzumanana kutatola lubazu mutwaambo twacisi alimwi akuzumanana kusyomeka kuli Jehova Leza?

1. Ino Banakristo bakasimpe bazibona buti mfwulumende zyabantu?

Banakristo balazilemeka mfwulumende. Tulacita kweelana ancaakaamba Jesu ‘akupa Kaisara zintu zya Kaisara,’ nkokuti tulaitobela milawo yamucisi, mbuli yeeyo iijatikizya kutela mitelo. (Marko 12:17) Bbaibbele lyaamba kuti mfwulumende zyabantu zileendelezya akaambo buyo kakuti zilizumizyidwe a Jehova. (Baroma 13:1) Akaambo kaceeci, tulizyi kuti nguzu nzyozijisi mfwulumende zyabantu kuli mpozigolela. Aboobo tusyoma Leza alimwi a Bwami bwakwe bwakujulu kuti mbobuyoomanizya mapenzi ngobajisi bantu.

2. Mbuti mbotukonzya kutondezya kuti tatutoli lubazu mutwaambo twacisi?

Mbubwenya mbuli Jesu, tatutoli lubazu mumapolitikisi. Ciindi bantu nobakabona maleele amwi ngaakacita Jesu, bakasola kuti bamubikke kuba mwami wabo anyika, pele wakakaka. (Johane 6:15) Nkaambo nzi? Nkaambo wakalaambide kale kuti, “Bwami bwangu tabuli bwanyika eeyi.” (Johane 18:36) Mbotuli basikwiiya ba Jesu, tulatondezya kuti tatutoli lubazu mutwaambo twacisi munzila zinji. Mucikozyanyo, tatuunki kunkondo. (Amubale Mika 4:3.) Tulazilemeka zitondezyo zyacisi, mbuli ndembela, pele tatuzikombi. (1 Johane 5:21) Alimwi tatuwidi kubbazu lyacipani cimwi naa kuli yooyo uuyanda kweendelezya. Munzila eezyi alimwi azimbi, tulatondezya kuti tulasyomeka cakumaninina kumfwulumende ya Leza, nkokuti Bwami bwakwe.

AMWIIYE ZINJI

3. Banakristo bakasimpe tabatoli lubazu mutwaambo twacisi

Jesu alimwi abasikumutobela bakatusiila cikozyanyo cibotu. Amubale Baroma 13:1, 5-7 alimwi a 1 Petro 2:13, 14. Mpoonya, tweebelele VIDIYO akubandika mibuzyo iitobela.

VIDIYO: Banakristo Bakasimpe Tabatoli Lubazu Mutwaambo Twacisi​—Cibeela 1 (4:28)

• Nkaambo nzi ncotweelede kuzilemeka mfwulumende zyabantu?

• Muunzila nzi motutondezya kuti tulalibombya kulinzizyo?

Muziindi zyankondo, zisi zimwi zilakonzya kulitaminina kutatola lubazu, pele zilagwasyilizya mumazwanga aazisi zilwana. Ino kutatola lubazu mutwaambo twacisi kwini-kwini caamba nzi? Amubale Johane 17:16. Mpoonya, tweebelele VIDIYO akubandika mubuzyo uutobela.

VIDIYO: Banakristo Bakasimpe Tabatoli Lubazu Mutwaambo Twacisi​—Cibeela 2 (3:11)

• Ino kutatola lubazu mutwaambo twacisi caamba nzi?

Mbuti kuti beendelezi bamfwulumende bayanda kuti mucite cintu cimwi citeendelani amulawo wa Leza? Amubale Milimo 5:28, 29. Mpoonya, tweebelele VIDIYO akubandika mibuzyo iitobela.

VIDIYO: Banakristo Bakasimpe Tabatoli Lubazu Mutwaambo Twacisi​—Cibeela 3 (1:18)

• Kuti kwaba kuteendelana akati kamulawo wabantu alimwi awa Leza, ino mulawo wani ngotweelede kutobela?

• Sena kuli bukkale buli boonse mbomukonzya kuyeeya mwalo Munakristo mwateelede kutobela mulawo wabeendelezi bamfwulumende?

4. Mutatoli lubazu mutwaambo twacisi mumizeezo alimwi amumicito

Amubale 1 Johane 5:21. Mpoonya, tweebelele VIDIYO akubandika mibuzyo iitobela.

VIDIYO: Ikaambo Banakristo Bakasimpe Ncobayandika Busicamba​—Kutegwa Batatoli Lubazu Mutwaambo Twacisi (2:49)

• Muvidiyo, nkaambo nzi ba Ayenge ncobakasala kutanjila cipani camapolitikisi naa kutatola lubazu mumapobwe aacisi, mbuli kusalyuuta ndembela?

• Sena muyeeya kuti bakasala cabusongo?

Mbukkale nzi bumwi ibukonzya kutusunka mumakani aakutatola lubazu mutwaambo twacisi? Atweebelele VIDIYO, akubandika mibuzyo iitobela.

VIDIYO: Ziiyo Kuzwa mu Ngazi Yamulindizi​—Amuzumanane Kutatola Lubazu Mutwaambo Twacisi Munyika Eeyi Iitakamantene (5:16)

• Mbuti mbotukonzya kuzumanana kutatola lubazu ciindi notweebelela zisobano zyamasi aayindene-indene?

• Mbuti mbotukonzya kuzumanana kutatola lubazu mutwaambo twacisi nokuba kuti nzyobasala basimapolitikisi zyatujatikizya cacigaminina?

• Mbuti zintu nzyotumvwa mumanyuuzi naa kubalongwe besu mbozikonzya kukujatikizya kutatola lubazu kwesu mutwaambo twacisi?

MUBUFWAAFWI

Banakristo balabeleka canguzu kutegwa batatoli lubazu mumapolitikisi mumizeezo, mumajwi alimwi amumicito yabo.

Ncinzi Ncomwaiya?

• Ncinzi ncotweelede kucita kumfwulumende zyabantu?

• Nkaambo nzi ncotuteelede kutola lubazu mumapolitikisi?

• Mbukkale nzi ibukonzya kutusunka akaambo kakutatola lubazu mutwaambo twacisi?

AMUZYIBE ZINJI

Nkulyaaba kuli buti nkotukonzya kucita kutegwa tuzumanane kutatola lubazu mutwaambo twacisi?

Jehova Kunyina Naakatulekelezya (3:14)

Ncinzi ncoikonzya kucita mikwasyi kutegwa ilibambilile limwi kuti naa yasunkwa kutola lubazu mutwaambo twacisi?

Kutatola Lubazu Muzilengwa Zidumide Mucisi (4:25)

Nkaambo nzi kwiiminina cisi ncobutali bulumbu bwiinda kukomena muntu mbwakonzya kupegwa?

“Zintu Zyoonse Zilakonzyeka Kuli Leza” (5:19)

Atulange-lange mbomukonzya kutaba banyika ciindi nomusala zintu zimwi kujatikizya mulimo wanu.

“Aumwi Uleelede Kunyampula Mukuli Wakwe Mwini” (Ngazi Yamulindizi, April 1, 2006)

Kalitanalampa, Banakristo boonse bayookazyigwa, naa kupenzyegwa buya. Sena eeci ceelede kutuyoosya?

1. Nkaambo nzi ncotulangila kupenzyegwa?

Bbaibbele cakutainda mumbali lyaamba kuti: “Boonse aabo bayanda kupona buumi bwakubelekela Leza cakulyaaba mukuyanzana a Kristo Jesu abalo bayoopenzyegwa.” (2 Timoteyo 3:12) Jesu wakapenzyegwa nkaambo tanaakali wanyika ya Saatani. Andiswe tatuli banyika, aboobo tatugambwi ciindi notupenzyegwa amfwulumende zyamunyika eeyi alimwi ambunga zyabukombi.​—Johane 15:18, 19.

2. Mbuti mbotukonzya kulibambila kupenzyegwa?

Tweelede kuyumya lusyomo lwesu muli Jehova lino. Abuzuba amujane ciindi cakupaila kulinguwe alimwi akubala Jwi lyakwe. Kamujanika lyoonse kumiswaangano yambungano. Kucita boobu kuyoomugwasya kuba anguzu nzyomuyandika, kutegwa muliyumye cabusicamba kukupenzyegwa kuli koonse nkomukonzya kujana, nokuba kuti kuzwa kubanamukwasyi. Mwaapostolo Paulo, kanji-kanji iwakali kupenzyegwa wakalemba kuti: “Jehova ngomugwasyi wangu; tandikooyoowa pe.”​—Bahebrayo 13:6.

Tulakonzya kuyumya busicamba bwesu kwiinda mukukambauka lyoonse. Kukambauka kutuyiisya kusyoma Jehova alimwi akuzunda kuyoowa bantu. (Tusimpi 29:25) Kuti mwaba abusicamba bwakukambauka lino, munoolibambilide kukambauka nokuba kuti mfwulumende yaulesya mulimo wesu.​—1 Batesalonika 2:2.

3. Ino kuliyumya kutugwasya buti ciindi notupenzyegwa?

Mubwini, tatukukkomanini kupenzyegwa, pele ciindi notuliyumya, lusyomo lwesu lulayuma kapati. Cilongwe cesu a Jehova cilayuma kapati nkaambo tulalubona lugwasyo lwakwe ciindi notulimvwa kuti inga tatucikonzyi kuzumanana kuliyumya. (Amubale Jakobo 1:2-4.) Cilamucisa Jehova kutubona katupenga, pele ulakkomana ciindi notuliyumya. Bbaibbele lyaamba kuti: “Ikuti mwaliyumya nomupenga akaambo kakucita zibotu, eeci ncintu cibotu kuli Leza.” (1 Petro 2:20) Bulumbu mbwayoobapa Jehova aabo boonse baliyumya cakusyomeka, mbuumi butamani munyika imunoonyina basikukazya bukombi bwakasimpe.—Matayo 24:13.

AMWIIYE ZINJI

4. Mulakonzya kuliyumya kukukazyigwa abanamukwasyi

Jesu wakalizyi kabotu-kabotu kuti banamukwasyi bamwi tabakakukkomanini kusala kwesu kwakukomba Jehova. Amubale Matayo 10:34-36, akubandika mubuzyo ooyu:

• Ncinzi cikonzya kucitika ciindi munamukwasyi naasala kubelekela Jehova?

VIDIYO: Jehova Wakatugwasya (5:13)

• Ncinzi ncomukonzya kucita kuti munamukwasyi naa mulongwe wanu wasola kumutyompya kubelekela Jehova?

Amubale Intembauzyo 27:10 alimwi a Marko 10:29, 30. Mwamana kubala lugwalo lumwi alumwi, amubandike mubuzyo ooyu:

• Mbuti cisyomezyo eeci mbocikonzya kumugwasya ikuti banamukwasyi naa balongwe batalika kumukazya?

5. Amuzumanane kukomba Jehova nokuba kuti mulapenzyegwa

VIDIYO: Kutondezya Busicamba Nokuba Kuti Tulapenzyegwa (6:27)

• Mbuti zikozyanyo izili muvidiyo eeyi mbozyamuyumya?

Amubale Milimo 5:27-29 alimwi a Bahebrayo 10:24, 25. Mwamana kubala lugwalo lumwi alumwi, amubandike mubuzyo ooyu:

• Nkaambo nzi ncociyandika kapati kuzumanana kukomba Jehova nokuba kuti mulimo wesu wakukambauka naa miswaangano zyalesyegwa?

6. Jehova uyoomugwasya kuliyumya

VIDIYO: Jehova Leza Uyoondiyumya (3:40)

• Muvidiyo, ncinzi cakabagwasya Bakamboni aaba kuliyumya?

Amubale Baroma 8:35, 37-39 alimwi a Bafilipi 4:13. Mwamana kubala lugwalo lumwi alumwi, amubandike mubuzyo ooyu:

• Mbuti lugwalo oolu mbolumupa lusyomo lwakuti inga mwacikonzya kuliyumya kusunko lili lyoonse?

Amubale Matayo 5:10-12, akubandika mubuzyo ooyu:

• Nkaambo nzi ncomukonzya kukkomana nokuba kuti mulapenzyegwa?

MUBUFWAAFWI

Jehova ulakukkomanina kusolekesya nkotucita kutegwa tumubelekele nokuba kuti tulapenzyegwa. Kwiinda mulugwasyo lwakwe, tulakonzya kuliyumya!

Ncinzi Ncomwaiya?

• Nkaambo nzi Banakristo ncobeelede kulangila kupenzyegwa?

• Ncinzi ncomukonzya kucita lino kutegwa kamunoolibambilide ciindi kupenzyegwa kwaakutalika?

• Ncinzi cikonzya kumupa kuba alusyomo lwakuti inga mwamubelekela Jehova, tacikwe makani asunko lili lyoonse ndyomukonzya kujana?

AMUZYIBE ZINJI

Amubone mukwesu uucili mwana-mwana uupandulula mbwaakamugwasya Jehova kutegwa aliyumye ciindi naakaangwa akaambo kakutatola lubazu mutwaambo twacisi.

Kuliyumya Nokuba Kuti Twapenzyegwa (2:34)

Amubone icakagwasya banabukwetene bamwi kumubelekela Jehova cakusyomeka alimwi kwamyaka minji, nokuba kuti bakali kukazyigwa.

Kuzumanana Kubelekela Jehova Ciindi Bukkale Nobwacinca (7:11)

Amwiiye mbomukonzya kuba basicamba ciindi nomupenzyegwa.

“Amulibambile Lino Kujatikizya Kupenzyegwa” (Ngazi Yamulindizi, July 2019)

Ino tweelede kukubona buti kukazyigwa abanamukwasyi, alimwi mbuti mbotukonzya kuzwidilila mubuyumuyumu buboola akaambo kaceeci?

“Kasimpe Kaleta ‘Panga, Ikutali Luumuno’” (Ngazi Yamulindizi, October 2017)