Bwami bwa Leza ngomutwe wamakani aamu Bbaibbele uuyandika kapati. Jehova uyoobelesya Bwami oobu kuzuzikizya makanze aakwe aakumatalikilo kujatikizya nyika. Ino Bwami ninzi? Ino tuzyi buti kuti bulalela lino? Ino nzintu nzi nzyobwacita kale? Alimwi nzintu nzi nzyobuyoocita kumbele? Ciiyo eeci alimwi aziiyo zyobilo zitobela zilayiingula mibuzyo eeyi.

1. Ino Bwami bwa Leza ninzi, alimwi nguni Mwami wambubo?

Bwami nimfwulumende iyakatalisyigwa a Jehova Leza. Jesu Kristo, Mwami wambubo, ulalela kali kujulu. (Matayo 4:17; Johane 18:36) Bbaibbele lyaamba Jesu kuti: “Unooli Mwami uuyoolela . . . kukabe kutamani.” (Luka 1:32, 33) Mbwali Mwami wa Bwami bwa Leza, Jesu uyoolela bantu boonse munyika.

2. Mbaani ibayoolela a Jesu?

Jesu takaleli alikke pe. Bantu bazwa “kumisyobo yoonse amilaka yoonse amikowa yoonse azisi zyoonse . . . bayooba bami ibayoolela nyika.” (Ciyubunuzyo 5:9, 10) Ino bali bongaye ibayoolela a Kristo? Kuzwa ciindi Jesu naakaboola anyika, Banakristo banji baba basikumutobela. Pele balikke ibali 144,000 mbabaunka kujulu kuyoolela a Jesu. (Amubale Ciyubunuzyo 14:1-4.) Banakristo bambi boonse banooli balelwa ba Bwami anyika.—Intembauzyo 37:29.

3. Mbuti Bwami bwa Leza mbobusumpukide kwiinda mfwulumende zyabantu?

Noliba leelyo beendelezi bantunsi nobasoleka kucita zintu zibotu, tabajisi nguzu zyakucita zyoonse nzyobayanda. Mukuya kwaciindi banjililwa busena abeendelezi bambi ibaliyanda alimwi batabikkili maano kubalelwa babo. Pele Muleli wa Bwami bwa Leza, Jesu, kunyina nayoonjililwa busena amuntu uuli woonse. Leza ‘wakabikka bwami ibutakanyonyoonwi pe.’ (Daniele 2:44) Jesu uyoolela munyika yoonse, alimwi kunyina nayootondezya lusalululo. Ngusiluyando, siluzyalo alimwi uucita zintu cabululami, aboobo uyooyiisya bantu kuti kabeendelezyanya munzila njiyonya, nkokuti caluyando, caluzyalo alimwi acabululami.—Amubale Isaya 11:9.

4. Mfwulumende iili anguzu kapati iyoolela nyika yoonse

Jesu Kristo ulijisi nguzu kapati zyakweendelezya kwiinda muleli uuli woonse iwakaponede. Amubale Matayo 28:18, akubandika mubuzyo ooyu:

• Mbuti bweendelezi bwa Jesu mbobusumpukide kwiinda bwamuleli muntunsi uuli woonse?

Kanji-kanji mfwulumende zyabantu zilacinca, alimwi umwi aumwi ulela buyo kabeela kamwi kamunyika. Ino mbuti kujatikizya Bwami bwa Leza? Amubale Daniele 7:14, akubandika mibuzyo eeyi:

• Nkaambo nzi ncocikkomanisya kuzyiba kuti Bwami bwa Leza ‘tabukanyonyoonwi’?

• Nkaambo nzi ncocikkomanisya kuzyiba kuti Bwami bwa Leza buyakweendelezya nyika yoonse?

5. Bulelo bwabantu bweelede kunjililwa busena

Nkaambo nzi Bwami bwa Leza ncobweelede kunjila mubusena bwamfwulumende zyabantu? Atweebelele VIDIYO, akubandika mubuzyo uutobela.

VIDIYO: Ino Bwami bwa Leza Ninzi?​—Kabeela Buyo (1:41)

• Nzintu nzi izyacitika akaambo kabulelo bwabantu?

Amubale Mukambausi 8:9, akubandika mibuzyo eeyi:

• Sena muyeeya kuti Bwami bwa Leza bweelede kunjila mubusena bwamfwulumende zyabantu? Nkaambo nzi?

6. Bwami bwa Leza bujisi baleli ibabuzyi kabotu bukkale bwesu

Akaambo kakuti Mwami wesu Jesu wakapona kali muntu, ulakonzya “kutweetelela mukubula nguzu kwesu.” (Bahebrayo 4:15) Baalumi alimwi abamakaintu basyomeka ibali 144,000 ibayoolela a Jesu, bakasalwa a Jehova “kuzwa kumisyobo yoonse amilaka yoonse amikowa yoonse azisi zyoonse.”—Ciyubunuzyo 5:9.

• Sena cilamuumbulizya kuzyiba kuti Jesu abaabo mbayoolela limwi balizyi mbotulimvwa alimwi amapenzi ngotujisi? Nkaambo nzi?

7. Bwami bwa Leza bujisi milawo iisumpukide

Mfwulumende zilabikka milawo iyeelede kugwasya alimwi akukwabilila balelwa banzizyo. Abwalo Bwami bwa Leza bulijisi milawo njobeelede kutobela balelwa bambubo. Amubale 1 Bakorinto 6:9-11, akubandika mibuzyo eeyi:

• Ino muyeeya kuti nyika iyooba buti ciindi boonse baakutalika kutobela milawo ya Leza yakulilemeka?a

• Sena muyeeya kuti Jehova ulijisi nguzu zyakubona kuti balelwa ba Bwami beelede kwiitobela milawo eeyi? Nkaambo nzi?

• Ncinzi citondezya kuti bantu ibatatobeli milawo eeyi balakonzya kucinca?—Amubone kapango 11.

MUBUFWAAFWI

Bwami bwa Leza nimfwulumende iini-ini yakujulu iiyoolela nyika yoonse.

Ncinzi Ncomwaiya?

• Ino baleli ba Bwami bwa Leza mbaani?

• Ino Bwami bwa Leza busumpukide buti kwiinda mfwulumende yabantu iili yoonse?

• Ncinzi Jehova ncalangila kubalelwa ba Bwami?

AMUZYIBE ZINJI

Amubone ncaakayiisya Jesu kujatikizya busena nkobubede Bwami.

“Sena Bwami bwa Leza Buli Mumoyo Wanu?” (Cibalo caaintaneti)

Nkaambo nzi Bakamboni ba Jehova ncobasala kusyomeka ku Bwami bwa Leza muciindi cakusyomeka kubulelo bwabantu?

Ibalyaabide ku Bwami bwa Leza (1:43)

Amulange-lange ncolyaamba Bbaibbele kujatikizya ba 144,000 aabo Jehova mbaakasala kuyoolela a Jesu.

“Ino Mbaani Baunka Kujulu?” (Cibalo caaintaneti)

Ncinzi cakapa mukaintu umwi iwakali muntolongo kusyoma kuti alikke Leza nguukonzya kuleta nyika yabululami?

“Mbondakazyiba Uuyoomanizya Kutalulama” (Sinsimuka!, November 2011)

Jesu wakayiisya kuti basikumutobela tabeelede ‘kuba banyika.’ (Johane 15:19) Eeci cibikkilizya kutatola lubazu mutwaambo twacisi, nkokuti mumapolitikisi alimwi amunkondo. Mubwini, talili lyoonse nocili cuuba-uba kutatola lubazu mutwaambo twacisi. Bantu balakonzya kutufwubaazya akaambo kaceeci. Mbuti mbotukonzya kuzumanana kutatola lubazu mutwaambo twacisi alimwi akuzumanana kusyomeka kuli Jehova Leza?

1. Ino Banakristo bakasimpe bazibona buti mfwulumende zyabantu?

Banakristo balazilemeka mfwulumende. Tulacita kweelana ancaakaamba Jesu ‘akupa Kaisara zintu zya Kaisara,’ nkokuti tulaitobela milawo yamucisi, mbuli yeeyo iijatikizya kutela mitelo. (Marko 12:17) Bbaibbele lyaamba kuti mfwulumende zyabantu zileendelezya akaambo buyo kakuti zilizumizyidwe a Jehova. (Baroma 13:1) Akaambo kaceeci, tulizyi kuti nguzu nzyozijisi mfwulumende zyabantu kuli mpozigolela. Aboobo tusyoma Leza alimwi a Bwami bwakwe bwakujulu kuti mbobuyoomanizya mapenzi ngobajisi bantu.

2. Mbuti mbotukonzya kutondezya kuti tatutoli lubazu mutwaambo twacisi?

Mbubwenya mbuli Jesu, tatutoli lubazu mumapolitikisi. Ciindi bantu nobakabona maleele amwi ngaakacita Jesu, bakasola kuti bamubikke kuba mwami wabo anyika, pele wakakaka. (Johane 6:15) Nkaambo nzi? Nkaambo wakalaambide kale kuti, “Bwami bwangu tabuli bwanyika eeyi.” (Johane 18:36) Mbotuli basikwiiya ba Jesu, tulatondezya kuti tatutoli lubazu mutwaambo twacisi munzila zinji. Mucikozyanyo, tatuunki kunkondo. (Amubale Mika 4:3.) Tulazilemeka zitondezyo zyacisi, mbuli ndembela, pele tatuzikombi. (1 Johane 5:21) Alimwi tatuwidi kubbazu lyacipani cimwi naa kuli yooyo uuyanda kweendelezya. Munzila eezyi alimwi azimbi, tulatondezya kuti tulasyomeka cakumaninina kumfwulumende ya Leza, nkokuti Bwami bwakwe.

AMWIIYE ZINJI

3. Banakristo bakasimpe tabatoli lubazu mutwaambo twacisi

Jesu alimwi abasikumutobela bakatusiila cikozyanyo cibotu. Amubale Baroma 13:1, 5-7 alimwi a 1 Petro 2:13, 14. Mpoonya, tweebelele VIDIYO akubandika mibuzyo iitobela.

VIDIYO: Banakristo Bakasimpe Tabatoli Lubazu Mutwaambo Twacisi​—Cibeela 1 (4:28)

• Nkaambo nzi ncotweelede kuzilemeka mfwulumende zyabantu?

• Muunzila nzi motutondezya kuti tulalibombya kulinzizyo?

Muziindi zyankondo, zisi zimwi zilakonzya kulitaminina kutatola lubazu, pele zilagwasyilizya mumazwanga aazisi zilwana. Ino kutatola lubazu mutwaambo twacisi kwini-kwini caamba nzi? Amubale Johane 17:16. Mpoonya, tweebelele VIDIYO akubandika mubuzyo uutobela.

VIDIYO: Banakristo Bakasimpe Tabatoli Lubazu Mutwaambo Twacisi​—Cibeela 2 (3:11)

• Ino kutatola lubazu mutwaambo twacisi caamba nzi?

Mbuti kuti beendelezi bamfwulumende bayanda kuti mucite cintu cimwi citeendelani amulawo wa Leza? Amubale Milimo 5:28, 29. Mpoonya, tweebelele VIDIYO akubandika mibuzyo iitobela.

VIDIYO: Banakristo Bakasimpe Tabatoli Lubazu Mutwaambo Twacisi​—Cibeela 3 (1:18)

• Kuti kwaba kuteendelana akati kamulawo wabantu alimwi awa Leza, ino mulawo wani ngotweelede kutobela?

• Sena kuli bukkale buli boonse mbomukonzya kuyeeya mwalo Munakristo mwateelede kutobela mulawo wabeendelezi bamfwulumende?

4. Mutatoli lubazu mutwaambo twacisi mumizeezo alimwi amumicito

Amubale 1 Johane 5:21. Mpoonya, tweebelele VIDIYO akubandika mibuzyo iitobela.

VIDIYO: Ikaambo Banakristo Bakasimpe Ncobayandika Busicamba​—Kutegwa Batatoli Lubazu Mutwaambo Twacisi (2:49)

• Muvidiyo, nkaambo nzi ba Ayenge ncobakasala kutanjila cipani camapolitikisi naa kutatola lubazu mumapobwe aacisi, mbuli kusalyuuta ndembela?

• Sena muyeeya kuti bakasala cabusongo?

Mbukkale nzi bumwi ibukonzya kutusunka mumakani aakutatola lubazu mutwaambo twacisi? Atweebelele VIDIYO, akubandika mibuzyo iitobela.

VIDIYO: Ziiyo Kuzwa mu Ngazi Yamulindizi​—Amuzumanane Kutatola Lubazu Mutwaambo Twacisi Munyika Eeyi Iitakamantene (5:16)

• Mbuti mbotukonzya kuzumanana kutatola lubazu ciindi notweebelela zisobano zyamasi aayindene-indene?

• Mbuti mbotukonzya kuzumanana kutatola lubazu mutwaambo twacisi nokuba kuti nzyobasala basimapolitikisi zyatujatikizya cacigaminina?

• Mbuti zintu nzyotumvwa mumanyuuzi naa kubalongwe besu mbozikonzya kukujatikizya kutatola lubazu kwesu mutwaambo twacisi?

MUBUFWAAFWI

Banakristo balabeleka canguzu kutegwa batatoli lubazu mumapolitikisi mumizeezo, mumajwi alimwi amumicito yabo.

Ncinzi Ncomwaiya?

• Ncinzi ncotweelede kucita kumfwulumende zyabantu?

• Nkaambo nzi ncotuteelede kutola lubazu mumapolitikisi?

• Mbukkale nzi ibukonzya kutusunka akaambo kakutatola lubazu mutwaambo twacisi?

AMUZYIBE ZINJI

Nkulyaaba kuli buti nkotukonzya kucita kutegwa tuzumanane kutatola lubazu mutwaambo twacisi?

Jehova Kunyina Naakatulekelezya (3:14)

Ncinzi ncoikonzya kucita mikwasyi kutegwa ilibambilile limwi kuti naa yasunkwa kutola lubazu mutwaambo twacisi?

Kutatola Lubazu Muzilengwa Zidumide Mucisi (4:25)

Nkaambo nzi kwiiminina cisi ncobutali bulumbu bwiinda kukomena muntu mbwakonzya kupegwa?

“Zintu Zyoonse Zilakonzyeka Kuli Leza” (5:19)

Atulange-lange mbomukonzya kutaba banyika ciindi nomusala zintu zimwi kujatikizya mulimo wanu.

“Aumwi Uleelede Kunyampula Mukuli Wakwe Mwini” (Ngazi Yamulindizi, April 1, 2006)