Nkaambo Nzi Ncokuli Bubi Akupenga?

Ciindi nokwacitika cintu cibyaabi, bantu balabuzya kuti: “Nkaambo nzi?” Eelo kaka cilakkomanisya kuti Bbaibbele lilawiingula kabotu-kabotu mubuzyo ooyu!

1. Mbuti Saatani mbwaakatalisya bubi munyika?

Saatani Diabolosi wakamuzangila Leza. Wakali kuyanda kweendelezya bamwi, aboobo wakoongelezya bantu bakusaanguna ba Adamu a Eva kuti bamusangane mubuzangi bwakwe. Saatani wakacita oobo kwiinda mukwaambila Eva makani aakubeja. (Matalikilo 3:1-5) Wakapa Eva kuyeeya kuti Jehova wakali kumwiima cintu cimwi cibotu. Wakali kwaamba kuti bantu balakonzya kukkomana kapati kuti kabatamumvwidi Leza. Saatani wakaamba makani aakubeja aakusaanguna kwiinda mukwaambila Eva kuti takonzyi kufwa. Nkakaambo kaako, Bbaibbele ncolyaamba Saatani kuti “mubeji alimwi ngousyi wabubeji.”—Johane 8:44.

2. Ncinzi ba Adamu a Eva ncobakasala kucita?

Jehova wakatondezya kuti mwaabi kapati kuli ba Adamu a Eva. Wakabaambila kuti bakali kukonzya kulya kuzisamu zyoonse izyakali mumuunda wa Edeni kunze buyo lyacisamu comwe. (Matalikilo 2:15-17) Pele bakasala kulya kucisamu eeco acaali. Eva “wakacela micelo kulincico akulya.” Kumane, Adamu “awalo wakalya.” (Matalikilo 3:6) Boonse bobilo tiibakamumvwida Leza. Akaambo kakuti ba Adamu a Eva bakalilondokede, cakali cuuba-uba kulimbabo kucita ciluzi. Pele kwiinda mukutamumvwida Leza acaali, bakabisya alimwi akukazya bweendelezi bwakwe. Ncobakasala kucita cakabaletela mapenzi.—Matalikilo 3:16-19.

3. Ino kusala kwaba Adamu a Eva kwakatujatikizya buti swebo?

Ciindi ba Adamu a Eva nobakabisya, bakaba bantu batalondokede alimwi kutalondoka ooko kwakabayambukila bana babo boonse. Kujatikizya Adamu, Bbaibbele lyaamba kuti: “Mbubonya cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.”—Baroma 5:12.

Tulapenga akaambo katwaambo twiindene-indene. Zimwi ziindi tulapenga akaambo kakusala kwesu kutaluzi. Zimwi ziindi tulapenga akaambo kakusala kwabamwi kutaluzi. Alimwi zimwi ziindi tulapenga akaambo kakuba abusena buteelede aciindi citeelede.—Amubale Mukambausi 9:11.

AMWIIYE ZINJI

4. Uupa kuti katupenga

Bantu banji basyoma kuti Leza nguweendelezya nyika. Sena aayo masimpe? Atweebelele VIDIYO.

VIDIYO: Nguni Weendelezya Nyika? (1:24)

Amubale Jakobo 1:13 alimwi a 1 Johane 5:19, akubandika mubuzyo ooyu:

• Sena Leza nguupa kuti kakuli bubi akupenga?

5. Amubone zintu izyacitika akaambo kabweendelezi bwa Saatani

VIDIYO: Nkaambo Nzi Leza Ncalekelede Kupenga?​—Kabeela buyo (3:07)

Amubale Matalikilo 3:1-6, akubandika mibuzyo eeyi:

• Makani nzi aakubeja ngaakaamba Saatani?—Amubone kapango 4 a 5.

• Mbuti Saatani mbwaakatondezya mbuli kuti Jehova wakali kubaima cintu cimwi cibotu bantu?

• Kweelana ancaakaamba Saatani, sena bantu bayandika kusololelwa a Jehova kutegwa bakkomane?

Amubale Mukambausi 8:9, akubandika mubuzyo ooyu:

• Muciindi eeci Jehova ncaatali Mweendelezi wanyika, ncinzi cacitika?

1. Ba Adamu a Eva bakalilondokede alimwi bakali kukkala mu Paradaiso. Pele bakamvwida Saatani akuzangila Jehova

2. Nobakamana kuzanga, munyika kwakavwula bubi, kupenga alimwi alufwu

3. Jehova uyoobumana bubi, kupenga alimwi alufwu. Mpoonya bantu bayoolondoka alimwi akukkala mu Paradaiso

6. Jehova ulaabikkila maano mapenzi eesu

Sena Leza kuli mbwalimvwa kumapenzi eesu? Amubone Mwami Davida alimwi amwaapostolo Petro nzyobakalemba. Amubale Intembauzyo 31:7 alimwi a 1 Petro 5:7, akubandika mubuzyo ooyu:

• Mbuti mbomulimvwa ikuzyiba kuti Jehova ulaabona mapenzi eesu alimwi akuti kuli mbwalimvwa kujatikizya ngawo?

MUBUFWAAFWI

Saatani Diabolosi alimwi abantu bobilo bakusaanguna mbebakapa kuti kakuli bubi akupenga munyika. Jehova ulaabikkila kapati maano mapenzi eesu alimwi lino-lino uyakwaamana.

Ncinzi Ncomwaiya?

• Makani nzi aakubeja Saatani Diabolosi ngaakaambila Eva?

• Mbuti buzangi bwaba Adamu a Eva mbobwakatujatikizya?

• Ino tuzyi buti kuti Jehova ulaabikkila maano mapenzi eesu?

AMUZYIBE ZINJI

Amubone Bbaibbele mbolicipandulula cibi.

“Ino Cibi Ninzi?” (Cibalo caaintaneti)

Amwiiye zinji kujatikizya kaambo Saatani Diabolosi nkaakatalisya mumuunda wa Edeni.

“Nkaambo Nzi Leza Ncalekelede Kupenga?” (Ngazi Yamulindizi, January 1, 2014)

Amubone bwiinguzi buumbulizya bwamubuzyo uukatazya kapati.

“Nkaambo Nzi Holocaust Ncoyakacitikila? Nkaambo Nzi Leza Ncaatakailesya?” (Cibalo caaintaneti)

Amubone mwaalumi umwi ncaakaiya kujatikizya mapenzi ngaakali kubona.

Lino Tandicili Ndelikke Pe (5:09)

Tulabisya, kupenga alimwi akufwa nkaambo banabukwetene bakusaanguna ba Adamu a Eva bakamuzangila Leza.a Pele tulijisi bulangizi. Kwiinda mu Mwanaakwe Jesu Kristo, Jehova wakabikka bubambe bwakutufwutula kukusinganyizyigwa acibi alimwi alufwu. Bbaibbele liyiisya kuti kwiinda mulufwu lwakwe, Jesu wakapa cinunuzyo. Cinunuzyo muulo uubbadelwa kunununa muntu umwi. Muulo Jesu ngwaakabbadela, mbuumi bwakwe bulondokede. (Amubale Matayo 20:28.) Ciindi Jesu naakalisungula kwaaba coolwe cakwe cakupona kukabe kutamani anyika, wakajalula nzila yakuti tukajane zintu zyoonse eezyo ba Adamu a Eva nzyobakasowa. Kuyungizya waawo, Jehova alimwi a Jesu bakatondezya mbobatuyanda kapati swebo. Ciiyo eeci cilamugwasya kulumba kapati akaambo kalufwu lwa Jesu.

1. Ino lufwu lwa Jesu inga lwatugwasya buti mazuba aano?

Mbwaanga tuli basizibi, tulacita zintu zinji zitamukkomanisyi Jehova. Nokuba boobo, ikuti twausa ncobeni akaambo kazibi zyesu, akulomba Jehova kuti atulekelele kwiinda muli Jesu Kristo alimwi akubeleka canguzu kutegwa tutaziinduluki zibi eezyo, tulakonzya kuba acilongwe ciyumu a Leza. (1 Johane 2:1) Bbaibbele lyaamba kuti: “Kristo wakafwa ciindi comwe buyo kukabe kutamani kujatikizya zibi, muntu uululeme kufwida bantu bataluleme, kutegwa amusololele kuli Leza.”—1 Petro 3:18.

2. Ino lufwu lwa Jesu luyootugwasya buti kumbele?

Jehova wakatuma Jesu kuzikwaaba buumi bwakwe bulondokede ‘kutegwa muntu uuli woonse uumusyoma Jesu atanyonyoonwi, pele abe abuumi butamani.’ (Johane 3:16) Tulalumba kuli ncaakatucitila Jesu, nkaambo lino-lino, Jehova uyoozigwisya zintu zyoonse zibyaabi izyakaletwa akaambo kakutamvwida kwa Adamu. Eeci caamba kuti, ikuti twatondezya lusyomo mucipaizyo ca Jesu, tuyooba acoolwe cakupona kukabe kutamani muparadaiso anyika!—Isaya 65:21-23.

AMWIIYE ZINJI

3. Lufwu lwa Jesu lulatwaangulula kucibi alimwi alufwu

VIDIYO: Ino Jesu Wakafwida Nzi?​—Cibeela 1 (2:01)

• Ncoolwe nzi Adamu ncaakasweekelwa ciindi naakazangila Leza?

Amubale Baroma 5:12, akubandika mubuzyo ooyu:

• Mbuti cibi ca Adamu mbocibujatikizya buumi bwanu?

Amubale Johane 3:16, akubandika mubuzyo ooyu:

• Nkaambo nzi Jehova ncaakatuma Mwanaakwe anyika?

1. Adamu wakali muntu uulondokede iwakazangila Leza akupa kuti bantu kababisya akufwa

2. Jesu wakali muntu uulondokede iwakamvwida Leza akupa kuti bantu bakalondoke akupona kukabe kutamani

4. Lufwu lwa Jesu lulakonzya kubagwasya bantu boonse

VIDIYO: Ino Jesu Wakafwida Nzi?​—Cibeela 2 (2:00)

• Mbuti lufwu lwamuntu omwe mbolukonzya kugwasya bantu boonse?

Amubale 1 Timoteyo 2:5, 6, akubandika mubuzyo ooyu:

• Adamu wakali muntu uulondokede pele akaambo kakuti wakabisya, bantu boonse balabisya akufwa. Awalo Jesu wakali muntu uulondokede. Muunzila nzi mwaakapa cinunuzyo ceelene abuumi bulondokede mbwaakasowa Adamu?

5. Cinunuzyo ncipego ncaakamupa Jehova nywebo kumugama

Balongwe ba Jehova cinunuzyo bacibona kuti ncipego cibageme. Mucikozyanyo, amubale Bagalatiya 2:20, akubandika mubuzyo ooyu:

• Mbuti mwaapostolo Paulo mbwaakatondezya kuti cinunuzyo wakali kucibona kuti ncipego cimugeme?

Ciindi Adamu naakabisya, walo abana bakwe boonse bakasinganizigwa alufwu. Pele Jehova wakatuma Mwanaakwe kuzoopa buumi bwakwe kutegwa nywebo mube acoolwe cakuyoopona buumi butamani.

Ciindi nomubala tupango ootu tutobela, amweezeezye mbwaakalimvwide Jehova ciindi Mwanaakwe naakali kupenga. Amubale Johane 19:1-7, 16-18, akubandika mubuzyo ooyu:

• Ino mulimvwa buti kujatikizya ncaakamucitila Jehova alimwi a Jesu?

MUBUFWAAFWI

Lufwu lwa Jesu lupa kuti Jehova atulekelele zibi zyesu, alimwi lutupa coolwe cakuyoopona kukabe kutamani.

Ncinzi Ncomwaiya?

• Ino Jesu wakafwida nzi?

• Muunzila nzi buumi bwa Jesu bulondokede mobwakaba cinunuzyo ceelene abuumi bulondokede mbwaakasowa Adamu?

• Ino lufwu lwa Jesu inga lwamugwasya buti?

AMUZYIBE ZINJI

Amwiiye kaambo buumi bwa Jesu bulondokede ncobwiitwa kuti cinunuzyo.

“Mbuti Cituuzyo ca Jesu Mbocili ‘Cinunuzyo Cakununuzya Banji’?” (Cibalo caaintaneti)

Amuzyibe ncotweelede kucita kutegwa tukafwutuke.

“Ino Jesu Wakatufwutula Munzila Nzi?” (Cibalo caaintaneti)

Sena Jehova ulakonzya kulekelela noziba zibi zipati?

“Mibuzyo Yamu Bbaibbele Yaingulwa” (Ngazi Yamulindizi, May 1, 2013)

Amubone kwiiya kujatikizya cipaizyo ca Kristo mbokwakagwasya mwaalumi umwi kucinca bube bwakwe.

“Tandicili Sinkondo” (Cibalo caaintaneti)