• Mbotukonzya Kusala Kabotu
    Amupone Kukabe Kutamani!—Lwiiyo Lwamu Bbaibbele

    • 5. Amwaalemeke manjezyeezya aabamwi

      Bantu baindene-indene balakonzya kusala zintu ziindene. Mbuti mbotukonzya kulemeka manjezyeezya aabamwi? Atulange-lange bukkale oobu bobilo:

      Bukkale bwakusaanguna: Mucizyi uuyandisya kulipenta-penta walongela kumbungano kwalo bacizyi banji nkobatazyibide kubona bantu ibalipenta-penta.

      Amubale Baroma 15:1 alimwi a 1 Bakorinto 10:23, 24, akubandika mibuzyo eeyi:

      • Kweelana atupango ootu, ncinzi ncakonzya kusala mucizyi ooyo? Ncinzi ncomukonzya kucita kuti kamuli aamuntu uuli aamanjezyeezya aamukasya kucita cintu cimwi nywebo manjezyeezya aanu ncaamuzumizya kucita?

      Bukkale bwabili: Mukwesu ulizyi kuti Bbaibbele talikasyi kutaciindizya kunywa bukoko, pele wasala kutanywa. Watambwa kupobwe kwalo nkwaabona bakwesu ibanywa bukoko.

      Amubale Mukambausi 7:16 alimwi a Baroma 14:1, 10, akubandika mibuzyo eeyi:

      • Kweelana atupango ootu, ncinzi ncakonzya kusala mukwesu ooyo? Ncinzi ncomukonzya kucita kuti mwabona muntu umwi uucita cintu cimwi nywebo manjezyeezya aanu ncaatamuzumizyi?

      Nzintu nzi zikonzya kumugwasya kusala kabotu?

      Mukaintu ulapaila.

      1. Amumulombe Jehova kuti amugwasye kusala cakucita.—Jakobo 1:5.

      Mukaintu ngweena ulavwuntauzya kubelesya Bbaibbele, mabbuku aamba zyamu Bbaibbele alimwi akkompyuta.

      2. Amuvwuntauzye mu Bbaibbele alimwi amumabbuku aamba zyamu Bbaibbele kutegwa mujane njiisyo zikonzya kugwasya. Alimwi mulakonzya kubandika a Banakristo basimide.

      Mukaintu ngweena ulazinzibala kuyeeya.

      3. Amuyeeye cikonzya kucitika kumanjezyeezya aanu alimwi aabamwi akaambo kakusala kwanu.

  • Nkaambo nzi Nsamino Yesu Ambotulibonya Ncaali Makani Mapati?
    Amupone Kukabe Kutamani!—Lwiiyo Lwamu Bbaibbele

    • Toonse tulasala zisani nzyotuyanda kusama alimwi ambotuyanda kulibonya. Kuti twatobela njiisyo zyamu Bbaibbele zisyoonto alimwi zitakatazyi, tulakonzya kusala zisani nzyotuyanda alimwi akukkomanisya Jehova. Lino atuzilange-lange njiisyo eezyo.

      1. Ninjiisyo nzi izyeelede kutusololela notusala zyakusama alimwi akulibamba?

      Tweelede “kusama kabotu, cabulemu alimwi acakulibatamika,” akuzumanana kulibonya kabotu kutegwa bamwi babone kuti “tulilyaabide kuli Leza.” (1 Timoteyo 2:9, 10) Atulange-lange njiisyo eezyi zyone: (1) Tweelede “kusama kabotu.” Mbubwenya mbomubona kumiswaangano yambungano, bantu ba Jehova balasama munzila ziindene-indene, pele nsamino yesu alimwi ambotubamba masusu zilamulemeka Leza ngotukomba. (2) Kusama “cabulemu” caamba kuti mbotulibonya takukonzyi kupa bamwi kuba amuzeezo wakoonana, naa kutubikkila maano kapati. (3) Tulatondezya ‘kulibatamika’ ciindi notutatobeli masitailo naa mafasyoni aali woonse aadumide. (4) Mbotulibonya lyoonse kweelede kutondezya kuti ‘tulilyaabide kuli Leza,’ kutegwa bamwi kabakonzya kubona kuti tukomba Leza wakasimpe.—1 Bakorinto 10:31.

      2. Ino mbotulibonya inga kwabajatikizya buti basyomima?

      Nokuba kuti tulijisi lwaanguluko lwakusala nzyotuyanda kusama, tweelede kuyeeya mbobakonzya kujatikizyigwa bamwi akaambo kambotulibonya. Tulasoleka kusikila mpotugolela kutatyompya muntu naba omwe, muciindi caboobo ‘tukkomanisye mweenzuma muzintu zibotu alimwi izimupa kuyakwa.’—Amubale Baroma 15:1, 2.

      3. Ino mbotulibonya inga kwabakwelelezya buti bamwi kubukombi bwakasimpe?

      Nokuba kuti tulasoleka kusama cabulemu ciindi coonse, pele tulabikkila maano kapati kunsamino yesu ciindi notuunka kumiswaangano yambungano alimwi amumulimo wakukambauka. Tatuyandi kuba cisinkilizyo kumulumbe uuyandika kapati ngotubatolela bantu. Muciindi caboobo, mbotulibonya kulakonzya kukwelelezya bantu kukasimpe alimwi ‘akupa bamwi kutembaula kuyiisya kwa Mufwutuli wesu.’—Tito 2:10.

      AMWIIYE ZINJI

      Atulange-lange mbotukonzya kuba masimpe kuti mbotusama ambotulibonya kulabagwasya bamwi kubona kuti tuli Banakristo.

      Baalumi bobilo baliimvwi kumbele lyamubetesi. Mwaalumi umwi usamide nsuti, mpoonya umwi usamide zisani zizazaukide, zitalibonyi kabotu alimwi akasoti kacisobano ca baseball.

      Mbotulibonya kulakonzya kutondezya naa tulabalemeka beendelezi bamunyika. Nokuba kuti Jehova ubona zili mumoyo wesu, ambotulibonya anze kweelede kumupa bulemu

      4. Ciindi notulibonya kabotu, tutondezya bulemu kuli Jehova

      Nkaambo nzi kayandika kapati ikeelede kutupa kubikkila maano kujatikizya mbotulibonya? Amubale Intembauzyo 47:2, akubandika mibuzyo eeyi:

      • Ino kuyeeya kuti twiiminina Jehova kweelede kwiijatikizya buti nsamino yesu?

      • Sena muyeeya kuti cilayandika kubikkila maano kujatikizya mbotulibonya ciindi notuunka kumiswaangano yambungano alimwi amumulimo wakukambauka? Nkaambo nzi?

      5. Mbotukonzya kusala kabotu mumakani aansamino akulibamba

      Atweebelele VIDIYO.

      VIDIYO: “Amucite Zintu Zyoonse Kutegwa Leza Alemekwe” (10:18)

      Tacikwe makani naa zisani zyesu ziladula naa pe, zyeelede kuti kazisalala alimwi akweelela mubukkale bugaminide motwalijana. Amubale 1 Bakorinto 10:24 alimwi a 1 Timoteyo 2:9, 10. Mpoonya mubandike kaambo ncotuteelede kusama zisani . . .

      • zitalibonyi kabotu naa zilaadooti.

      • zijata, zibalangala, naa iziletela muzeezo wakoonana.

      Nokuba kuti Banakristo tabeendelezyegwi a Mulawo wa Musa, pele Mulawo ooyu ulatondezya mbwayeeya Jehova. Amubale Deuteronomo 22:5, akubandika mubuzyo ooyu:

      • Nkaambo nzi ncotuteelede kusama akulibamba munzila itondezya baalumi kulibonya mbuli bamakaintu naa bamakaintu kulibonya mbuli baalumi?

      Amubale 1 Bakorinto 10:32, 33 alimwi a 1 Johane 2:15, 16, akubandika mibuzyo eeyi:

      • Nkaambo nzi ncotweelede kubikkila maano ikuti naa mbotulibonya kulabatyompya bamwi mucilawo motukkala naa mumbungano?

      • Masitailo nzi aazisani naa kulibamba kudumide kubusena nkomukkala?

      • Sena muyeeya kuti masitailo aayo amwi aleelela ku Munakristo? Nkaambo nzi?

      Tulakonzya kusama akulibamba munzila ziindene-indene akumukkomanisya Jehova

      Bamaalumi abamakaintu bamisela amisyobo iindene alimwi azisi ziindene, babambide masusu alimwi akusama munzila iindene, pele iyeelede ku Banakristo.

      BAMWI BAAMBA KUTI: “Ndilijisi nguzu zyakusama kufwumbwa ncondiyanda.”

      • Sena mulakazumina kaambo aaka? Nkaambo nzi?

      MUBUFWAAFWI

      Ciindi notusala kabotu mumakani aajatikizya mbotulibonya, tutondezya kuti tulamulemeka Jehova alimwi abamwi.

      Ncinzi Ncomwaiya?

      • Nkaambo nzi nsamino yesu akulibamba ncoziyandika kapati kuli Jehova?

      • Ino ninjiisyo nzi izyeelede kutugwasya notusala kujatikizya mbotweelede kulibonya?

      • Ino mbotulibonya inga kwapa kuti bamwi kababubona buti bukombi bwakasimpe?

      Mbaakani

      AMUZYIBE ZINJI

      Amubone mbobakonzya kumuyeeyela bamwi ciindi nobabona nsamino yanu.

      “Ino Ndiboneka Buti?” (Cibalo caaintaneti)

      Amubone kaambo ncocili cabusongo kuzinzibala kuyeeya kamutanagantwa ciganto.

      “Ino Bbaibbele Lyaamba Nzi Kujatikizya Kulembaulwa Nsimbo naa Kugantwa?” (Cibalo caaintaneti)

      Atulange-lange njiisyo zimbi izikonzya kutugwasya ciindi notusala zyakusama.

      “Sena Nsamino Yanu Ipa Kuti Leza Alemekwe?” (Ngazi Yamulindizi, September 2016)

      Mbuti mukaintu umwi iwakali kuyanda kukkomanisya Leza, mbwaakaiya kuzumina kusala kwabamwi mumakani aansamino?

      “Nsamino Akulibamba Nzyozyakali Zilebyo Kulindime” (Sinsimuka!, December 22, 2003)