Banakristo bamwi baku Korinto yansiku bakalinyongene kujatikizya makani aaya, alimwi bamwi tiibakali kusyoma mububuke. Mulugwalo lwakwe lwakusaanguna ndwaakalembela Banakristo baku Korinto, Paulo wakaamba zyintu zyakali kunoocitika kuti bubuke nibwatakaliko ncobeni. Wakalemba kuti: “Ikuti naa ncobeni kunyina bubuke bwabafwu, nkokuti naba Kilisito tanaakabusyigwa pe. Pele ikuti naa Kilisito tanaakabusyigwa, kukambauka kwesu ncobeni nkwabuyo alimwi alwalo lusyomo lwesu ndwabuyo. Kunze lyaboobo, alimwi twaba bakamboni bakubeja kujatikizya Leza, . . . Lusyomo lwanu ndwabuyo; mucili muzibi zyanu. . . . Aabo bakoona mulufwu kabakamantene a Kilisito abalo bakaloba.”—1 Bakolinto 15:13-18.

Nkozili azimwi zyakali kuyoocitika. Ikuti naa Kristo naatakabusyigwa, nkokuti njiisyo zya Bunakristo nzyabuyo, zinyina mpindu, alimwi nzyakubeja. Kuyungizya waawo, Paulo alimwi abamwi nobakaamba zyakubeja kutali buyo kujatikizya bubuke bwa Jesu, pele alimwi ayooyo ngobakaamba kuti nguwakamubusya, Jehova Leza. Kunze lyaboobo, kaambo kakuti Kristo “wakafwa kutegwa atwaangulule kuzibi zyesu” nokali kakubeja—nkaambo ikuti naa Mufwutuli lwakwe tanaakafwutulwa kulufwu, takonzyi kufwutula bamwi. (1 Bakolinto 15:3) Eeci inga caamba kuti Banakristo ibakafwa akaambo kalusyomo lwabo, bakafwa abulangizi bwakubeja bwakuti bayakubusyigwa.