Imbunga ya Jehova Ilamugwasya Mumulimo Wanu
“Ndakabona angelo umbi uuluka mujulu, wakalijisi Makani Mabotu aateeli.”—CIYUBUNUZYO 14:6.
1. Ino muunzila nzi mubasunkwa Bakamboni ba Jehova, alimwi nkaambo nzi ncobafwutuka?
NKAAMBO nzi ncociyandika kapati kuziba mulimo uucita mbunga ya Jehova yakujulu mukugwasilizya mulimo wa Bunakristo? Sena Bakamboni ba Jehova nobakazwidilila kukambauka makani mabotu aa Bwami bwa Leza munyika eyi yalunya ikuti nokwakanyina lugwasyo luzwa kumakamu-makamu aabangelo ba Jehova bakujulu? Bakamboni bakambauka munzila iili boobu mumwaanda wamyaka imuli lusalululo lwamasi, ibweendelezi bwazisi bwalunya, nkondo zyanyika alimwi amapenzi aamwi aandeene-andeene. Sena Bakamboni nobakakonzya kufwutuka mukusalaulana musyomo kwaakati kamasi, ikutalulama alimwi akupenzyegwa nkobalikupenga ikuti nokwakanyina lugwasyo lwa Jehova?—Intembauzyo 34:7.
Ikufwutuka Nokuba Kuti Kuli Kukazigwa Nyika Yoonse Mbwiizulwa
2. Nkweelana nzi kuliko akati ka Banakristo bakasimpe bamumwaanda wamyaka wakusaanguna alimwi abasunu?
2 Basinkondo bamumwaanda wamyaka uno wa 20, basizikombelo alimwi abeendelezi bamfwulumende babikka zisinkilizyo zyoonse nzyobakonzya izyamumulawo azyobalibikkila buyo beni ikusola kulesya mulimo wa Jehova. Ibakwesu abacizi Banakristo bapenzyegwa, babejelezyegwa alimwi basampaulwa kwiinda mukulemba—ibanji bajaigwa—kanjikanji kwiinda mukuyunga kwabasololi ba Babuloni Mupati. Kulakonzya kwaambwa mbuli mbucakabede ku Banakristo bakusaanguna kuti “tulizi kuti anooli aankamu eyi, alakazigwa kumasena oonse.” Mbubwenya mbuli basololi bacikombelo caba Juda bakuciindi ca Kristo mbobakasoleka canguzu ikulesya mulimo wakwe, abalo basololi bacikombelo alimwi abasiluleyo kwiinda mukubelekala antoomwe abeendelezi bamfwulumende basolekesya kusinkilila mulimo mupati wakuyiisya uucitwa abantu ba Jehova.—Incito 28:22; Matayo 26:59, 65-67.
3. Ncinzi ncotunga twaiya kuzwa kukusyomeka kwa Henryka Żur?
3 Amulange cakacitika mu Poland mu March 1, 1946. Henryka Żur, imusimbi Kamboni wamyaka iili 15 iwakali kukkala munsi-munsi aaku Chełm wakasindikila Kamboni umwi mukwesu kuyakuswaya bantu bakali kuyanda kwiiya kasimpe mumunzi wakalaafwaafwi-fwaafwi buyo. Bakajatwa abasinkamu yabasilumamba ya Katolika iyiitwa kuti Narodowe Siły Zbrojne (Basilumamba Bacisi). Oyu mukwesu wakaumwa kapati pele taakajaigwa pe. Pele kuli Henryka cakali bumbi. Wakapenzyegwa kapati kwamawoola manji ciindi nobakali kusola kumusinikizya kuti apange citondezyo ca Katolika caciingano. Umwi wabasikumupenzya wakati: “Ulakonzya kusyoma kufwumbwa ncoyanda, kopanga buyo citondezyo ca Katolika caciingano. Buyo-buyo ilakulindila nkulu!” Sena kwakazungaana kusyomeka kwakwe? Peepe. Aba basicikombelo bakamukwelaanya kumutola mucisaka cakali afwaafwi akumudubula. Pele wakacizundide! Bakaalilwa kujaya lusyomo lwakwe.a—Ba-Roma 8:35-39.
4. Ino basimapolitikisi alimwi abasicikombelo basoleka buti kulesya mulimo wakukambauka Bwami?
4 Kwamyaka iinda kumwaanda omwe, babelesi ba Leza basunu bali kupenzyegwa calunya alimwi camasampu. Akaambo kakuti Bakamboni ba Jehova tabali lubazu lwazikombelo zya Saatani alimwi kunyina nobalombozya kuba boobo, balangwa kuti mbabeelede lunya loonse naa kukazigwa koonse kwacibbunga nkamu. Bali kulwanwa kapati abasimapolitikisi. Bakamboni banji bajaigwa akaambo kalusyomo lwabo. Nomuba mumasi aategwa bantu mobakonzya kulisalila basoleka kusinkilila mulimo wakukambauka makani mabotu. Mu 1917, mu Canada alimwi amu United States, basololi bazikombelo bakalipangila twaambo twakuti Basikwiiya Bbaibbele, mbuli mbubakali kwiitwa Bakamboni, bakali kuyanda kwaatula mfwulumende. Beendelezi ba Watch Tower Society bakaangwa munzila iitaluzi balo bakazyooide kwaangululwa kumbele.—Ciyubunuzyo 11:7-9; 12:17.
5. Majwi nzi aakulwaizya babelesi ba Jehova?
5 Saatani wabelesya nzila zyoonse nzyakonzya ikusola kulesya mulimo wakukambauka wabanabakwabo Kristo antoomwe abeenzinyina basyomeka. Pele mbubwenya mbozitondezya zyakuluula zinji, kunyina cakonzya kubalesya Bakamboni ba Jehova, akube kukongwa, ikuumwa, ntolongo, muzilabba noluba lufwu. Alimwi obu mbucabede kuzwa kaindi. Ciindi aciindi, imajwi aa Elisha alatukulwaizya aakuti: “Utayoowi pe, nkaambo abo mbetuli abo mbanji kwiinda mbabo.” Ikaambo komwe nkakuti, bangelo basyomeka mbanji kwiinda nkamu ya Diabolosi!—2 Bami 6:16; Incito 5:27-32, 41, 42.
Jehova Walongezya Kukambauka Kucitwa Cabusungu
6, 7. (a) Nkusoleka nzi kwakusaanguna ikwakacitwa kutegwa makani mabotu akambaukwe? (b) Nkucinca nzi kugwasya kwakatola busena kutalika mu 1943?
6 Mumwaanda wamyaka wa 20, Bakamboni ba Jehova babelesya nzila zyasayaansi zisumpukide kutegwa bayungizye alimwi akufwambaanya mulimo mupati wakukambauka mamanino kaatanasika. Mu 1914, Pastor Russell, mweendelezi wakusaanguna wa Watch Tower Bible and Tract Society wakatalika kubelesya masilaidi alimwi abbasikopo yakajisi amakani aa Bbaibbele amalekkoodi, mucipekupeku ca Bbaibbele citola mawoola aali lusele citegwa “The Photo-Drama of Creation.” Cakabagambya bantu banji kuciindi eco mumasi manji. Mpoonya muma 1930 amuma 1940, Bakamboni bakazibwa kuti mbantu bakambauka ŋanda aŋanda kababelesya malekkoodi aamakani aa Bbaibbele aakaambwaa J. F. Rutherford, imweendelezi wabili wa Sosaiti.
7 Mu 1943 intaamu yabusicamba yakacitwa kwiinda mubusolozi bwaa Nathan H. Knorr, mweendelezi watatu wa Sosaiti ciindi nokwakayeeyegwa kuti kutalikwe cikolo cababelesi mumbungano yomwe-yomwe. Bakamboni bakali kuya kuyiisigwa mbokukambaukwa alimwi akuyiisya kuŋanda aŋanda kakunyina kubelesya malekkoodi. Kuzwa ciindi eco, izikolo zimbi zyabambwa ikuyiisya bamisyinali, bapainiya baciindi coonse, ibaalu bambungano alimwi abalangizi bajisi mikuli mumitabi ya Watch Tower Society. Ncinzi cacitika?
8. Ino Bakamboni bakalutondezya buti lusyomo mu 1943?
8 Mumwaka wa 1943 kaicilwa Nkondo Yanyika Yabili, kwakali buyo Bakamboni ibali 129,000 basungweede mumasi aali 54. Pele bakalijisi lusyomo alimwi amakanze kuti bbuku lya Matayo 24:14 lyakeelede kuzuzikizigwa kaatanasika mamanino. Bakali kusyoma kuti Jehova uyoocita kuti kwaambilizigwe milumbe iiyandika kapati yakucenjezya kusaanguna kautana mulongo wazintu zyakeelede kuleta mamanino aabweende obu bwazintu. (Matayo 24:21; Ciyubunuzyo 16:16; 19:11-16, 19-21; 20:1-3) Sena kusoleka kwabo kwalongezyegwa?
9. Ntwaambo nzi tutondezya kuti mulimo wakukambauka wayaambele?
9 Lino kuli masi aatandila ku 13 aajisi Bakamboni basungweede bainda ku 100,000 cisi comwe-comwe. Ibunji bwamasi aya ngayaayo aazwide Cikombelo ca Katolika. Pele amulange mbozibede zintu. Brazil ilijisi basikumwaya bamakani mabotu batandila ku 450,000 alimwi ibainda ku 1,200,000 bakajanika ku Ciibalusyo calufwu lwa Kristo mu 1997. Icikozyanyo cimbi nca Mexico yalo iijisi Bakamboni batandila ku 500,000 alimwi ibali 1,600,000 bakajanika kukusekelela Ciibalusyo. Imasi amwi aa Katolika ngu Italy (Bakamboni batandila ku 225,000), France (ibatandila ku 125,000), Spain (ibainda ku 105,000), alimwi a Argentina (ibainda ku 115,000). Mu United States mozivwulide zikombelo zya Pulotestant, Katolika alimwi azyaci Juda, kuli Bakamboni batandila ku 975,000 alimwi ibainda ku 2,000,000 bakajanika ku Ciibalusyo. Masimpe, makamu-makamu aluujisi kuzwa mu Babuloni Mupati, ibwami bwanyika bwabukombi bwakubeja akusiya ziyiisyo zyakwe zyabudaimona akuboola kuzisyomezyo zya Leza, izyuuba-uba alimwi zisyomeka ‘zyajulu ipya anyika impya.’—2 Petro 3:13; Isaya 2:3, 4; 65:17; Ciyubunuzyo 18:4, 5; 21:1-4.
Ikukambauka Kweelana Aziyandika Kubantu
10. Ino bukkale bwacinca buti mumasena amwi?
10 Ibunji bwabaabo baboola kuli Jehova kwiinda muli Kristo Jesu bakajanwa kwiinda mumulimo waŋanda aŋanda. (Johane 3:16; Incito 20:20) Pele azimbi nzila zyabelesyegwa. Izintu zyacinca alimwi bamakaintu banji lino babeleka milimo yakumubili akaambo kabuumi bwayuma. Kanjikanji, mukati kansondo, bantu mbasyoonto bakonzya kujanika amunzi. Aboobo Bakamboni ba Jehova batobelezya bukkale mbubwenya obu. Mbubwenya mbuli Jesu abasikwiiya bakusaanguna, balaunka oko nkobajanika bantu alimwi aciindi nobakonzya kujanika.—Matayo 5:1, 2; 9:35; Marko 6:34; 10:1; Incito 2:14; 17:16, 17.
11. Nkuli nkobakambaukila sunu Bakamboni ba Jehova, alimwi ncinzi cacitika?
11 Bakamboni balaliyeeyela alimwi bakambaukila bantu cabusongo mumasena mapati aasiigwa myootokala, mumantoolo, mumafakitali, mumaopesi amumaandaa makwebo, muzikolo, muzitisyini zyamapulisa, imunywisigwa mungwimba kumyootokala, mumahotela alimwi amumasena mulidwa alimwi amumigwagwa. Atwaambe, balakambauka kufwumbwa kujanika bantu. Alimwi ciindi bantu nobali amaanda, Bakamboni balazumanana kubaswaya. Eyi nzila iitakatazyi alimwi iibeleka yapa kuti kumwaya kwamabbuku aa Bbaibbele kuyungizigwe. Abo bali mbuli mbelele balajanika. Iziiyo zya Bbaibbele zipya zilatalikwa. Imulimo wiinda kukomena mubukkale bwabantu boonse iwakuyiisya ulacitwa cabusungu ababelesi balisungude ibainda kutuulunzuma tosanwe acisela! Sena mulaa coolwe cakuba akati kabo?—2 Ba-Korinto 2:14-17; 3:5, 6.
Ncinzi Cibakulwaizya Bakamboni ba Jehova?
12. (a) Ino Jehova ubayiisya buti bantu bakwe? (b) Ino kuyiisya kuli boobu kwabajatikizya buti bantu?
12 Ino ono mbunga yakujulu ibeleka mulimo nzi mumakani oonse aya? Isaya wakasinsima kuti: “Bana bako boonse bayooiyisigwa Jehova. Ncobeni bana bako bayooba acoolwe cipati.” (Isaya 54:13) Jehova uyiisya babunyina aba bakamantene nyika yoonse mbwiizulwa kwiinda mumbunga yakwe iilibonya anyika—ku Maanda aa Bwami, kumiswaangano mipati amisyoonto. Icijanika ndukamantano aluumuno. Ikuyiisya kwa Jehova kwapa kuti kube bantu balibedelede, ibayiisidwe kuyandana alimwi akuyanda beenzinyina mbubwenya mbubaliyanda beni, ikutali kusulaika beenzinyina kufwumbwa naa nkuli nkobakkala munyika eyi iitakamantene alimwi yaandeene.—Matayo 22:36-40.
13. Ino inga twasyoma buti kuti kuli busolozi bwabangelo mumulimo wakukambauka?
13 Iluyando ndolukulwaizya Bakamboni ba Jehova kuti kabazumanana kukambauka nokuba kuti balasulaikwa akupezyegwa. (1 Ba-Korinto 13:1-8) Balizi kuti mulimo wabo uupa buumi usololelwa kuzwa kujulu mbubwenya bbuku lya Ciyubunuzyo 14:6 mbulyaamba. Ino mulumbe nzi waambilizigwa kwiinda mubusolozi bwamugelo? “Amuyoowe Leza akumupa bulemu, nkaambo casika ciindi calubeteko lwakwe. Amukombe oyo iwakalenga ijulu anyika alwizi atusensa twamaanzi.” Ikukambauka kwamakani mabotu aa Bwami kusumpula zina lya Jehova. Ibantu batambwa kuti bape bulemu ku Mulengi, Leza ikutali kuzilenge alimwi akuziyiisyo zyakusanduka zitakwe akumutwe. Alimwi nkaambo nzi kukambauka ncokuyandika kucita cakufwambaana? Nkaambo ciindi calubeteko casika—lubeteko lwa Babuloni Mupati alimwi ambazu zyoonse zilibonya zyabweende bwa Saatani.—Ciyubunuzyo 14:7; 18:8-10.
14. Mbaani bajatikizidwe mumulimo oyu mupati wakuyiisya?
14 Kunyina Munakristo uulyaabide uucaala mumulimo oyu wakukambauka. Ibaalu basimide munzila yakumuuya mbabali mbele mumulimo wakukambauka ambungano. Ibapainiya bayiisidwe bajisi bubi mumulimo oyu. Basikumwaya bamulumbe wa Bwami basungu, naa bakonzya buyo kukambauka kwamawoola masyoonto amwezi naa manji, balaumwaya mulumbe muzibeela zyanyika zyoonse.—Matayo 28:19, 20; Ba-Hebrayo 13:7, 17.
15. Ncinzi citondezya kuti mulimo wakukambauka wa Bakamboni ba Jehova wabajatikizya banji?
15 Sena kusoleka oku koonse kuli mbukwaijatikizya nyika? Cimwi cisinizya kaambo aaka nkubona ziindi Bakamboni ba Jehova nzyobaambwa muma pulogilamu aa TV alimwi amumapepa aabalwa makani. Kanjikanji inga baamba kuzumanana kwesu alimwi amakanzeesu aakusikila bantu boonse. Ee, ibusungu bwesu alimwi akubeleka kwesu lyoonse kulabajatikizya bantu nokuba kuti banji balaukaka mulumbe antoomwe abatumwa!
Ibusungu Bwesu Bwakumanizya Kukambauka
16. Nciimo nzi ceelede kutondezyegwa lino muciindi eci cisyoonto cisyeede?
16 Tatuzi naa kuceede ciindi cilamfwu buti kubweende obu bwazintu alimwi tatuyandiki akuziba kufwumbwa buyo kuti imuzeezo uutukulwaizya kubelekela Jehova kausalala. (Matayo 24:36; 1 Ba-Korinto 13:1-3) Pele tulizi kuti kutegwa lutondezyegwe luyando, nguzu alimwi abululami bwa Jehova, imakani mabotu ayeelede kukambaukwa “kusaanguna.” (Maako 13:10, BT) Aboobo, tacikwe makani naa myaka yongaye njotwalindila kuti imane nyika eyi mbyaabi, yalunya alimwi yabulwani, tweelede kuzuzikizya kulyaaba kwesu cabusungu kweelana abukkale bwesu. Ambweni twacembaala lino naa kuciswa pele tulakonzya kuzumanana kubelekela Jehova cabusungu mbubwenya mbutwakabede notwakacili bana naa katucili abuumi bubotu. Ambweni tatucicikonzyi kukkala ciindi cilamfwu mumulimo mbuli mbutwakali kucita musyule pele tulakonzya kuzumanana aciimo cesu cakulumba Jehova.—Ba-Hebrayo 13:15.
17. Amuluule cimwi cakacitika icikulwaizya icikonzya kutugwasya toonse.
17 Aboobo, tube bana naa bapati, atusungwaale akumwaya mulumbe wesu wanyika mpya kuli baabo boonse mbotuswaanganya. Atube mbuli mwana musimbi waku Australia wamyaka iili ciloba wakalaa nsoni kapati walo wakaunkaa banyina kumantoolo. Kumuswaangano wakateelela nobakaamba mbuli mbociyandika kapati kuti toonse katukambauka, aboobo wakabikka mabroshuwa obile mubbeeke lyakwe. Nobakacili kubbadela banyina mucintoolo, oyu mwana musimbi wakazwa. Nobakamuyandaula banyina, bakamubona kapa broshuwa kumukaintu umwi! Banyina musimbi oyu bakaunka kuti bakalilekelele kumukaintu oyo naa kuli mbwaamunyemya mwana. Pele mukaintu oyu wakaibweza broshuwa cakukondwa. Nobakaba bobile, banyina bakamubuzya kuti ino wakayuma buti kuyakwaambaulaa muntu ngwatazi. “Ndaide kwaamba buyo kuti, Libambile Lino, Koya! Mpoonya ndaunka!”
18. Ino inga twatondezya buti muuya oyu mubotu?
18 Toonse tuyandika muuya mbuli wamwana musimbi waku Australia kutegwa tutole makani mabotu kubantu mbotutazi naa beendelezi. Tulakonzya twalibilika kuti balakaka. Pele tutalubi ncaakaamba Jesu kuti: “Mutalikataazyi mumyoyo yanu kuti muyoovuwa kutinzi na muyooamba kutinzi, nkaambo Muuya Uusalala uyoomuzibya nkomweelede kwaamba kuliceeco ciindi.”—Luka 12:11, 12.
19. Ino mulimvwa buti kujatikizya mulimo wenu?
19 Aboobo atusyome lugwasyo lwamuuya wa Leza twanootola makani mabotu kubantu munzila yalubomba. Kanjikanji ituulunzuma twabantu tuli mbotubede basyoma baalumi abanakazi batakwe ankobaya ibakuti sunu mbaumi pele juunza tabawo. Tusyoma Jehova ambunga yakwe yakujulu—Kristo Jesu, bangelo basalala alimwi a Banakristo bananike babusidwe—balo bapona kusikila kutamani! Aboobo atuyeeye kuti: “Abo mbetuli abo mbanji kwiinda mbabo.”—2 Bami 6:16.
Bupanduluzi buyungizidwe
a Ikutegwa mujane zikozyanyo azimbi, amubone 1994 Yearbook of Jehovah’s Witnesses, mapeeji 217-20.
Mulaingula Buti?
◻ Ino mbunga ya Leza yakujulu yabeleka mulimo nzi mukufwutuka kwabantu ba Jehova?
◻ Mbaasimapolitikisi nzi alimwi abasicikombelo ibanyonganya Bakamboni ba Jehova mumwaanda uno wa 20?
◻ Ino Bakamboni ba Jehova babeleka buti mumulimo wabo kweelana aziyandika kuciindi cino?
◻ Ncinzi cimukulwaizya kukambauka?
[Cifwanikiso icili apeeji 9]
Henryka Żur
[Zifwanikiso izili apeeji 10]
Japan
Martinique
United States
Kenya
United States
Bakamboni ba Jehova balakambauka nobajana bantu alimwi kufwumbwa nkobakonzya kujanika
[Cifwanikiso icili apeeji 12]
Kumatalikilo aamwaanda oyu wamyaka, malekkoodi akali kubelesyegwa kumwaya mulumbe wa Bwami