16, 17. (a) Ino mmulumbe uuli buti uuyoowambilizyigwa kabutanamana bweende bwazyintu oobu? (b) Ino ncinzi ncotuya kulanga-langa mucibalo citobela?

¹⁶ Ciindi ciyoosika mulumbe ngotukambauka nuuyooba mbuli “loompololo lupati.” Mubbuku lya Ciyubunuzyo, milumbe yalubeta ilakozyanisyigwa a “civulamabwe cipati kuzwa kujulu. Ibbwe limwi alimwi [kalili] abulemu mbuli italenta.”b Alimwi bbuku lya Ciyubunuzyo 16:21 lyaamba kuti: “Cipenzyo [cakali] cipati loko.” Tatunazyiba kuti mulimo wakukambauka kuŋanda aŋanda naa unoojisi cibeela nzi mukwaambilizya milumbe yalubeta kwamamanino. Pele tuli masimpe kuti “mapenzi ayo mapati” kaatanamana, izyina lya Jehova liyoozyibwa citanabwenwe kuzwa kaindi kusikila sunu.—Ciy. 7:14; Ezk. 38:23.