BANYAMA tabakonzyi kucita ncomucita lino aawa. Muntu omwe akati kabantu bali cisambomwi kunyina naakaiya kubala, kanji-kanji cili boobo akaambo kakuti kunyina naakaunka kucikolo. Pele aabo ibakaiya, ibunji bwabo kunyina nobabala lyoonse pe. Nokuba boobo, ikucizyiba kubala mabala aasimbidwe apepa inga kwamugwasya kuswaya masi aambi, ikuswaangana abantu bali mubukkale bukonzya kumugwasya kusumpula bukkale bwanu alimwi akuba aluzibo iluyoomugwasya kulanganya mapenzi aamubuumi.

Ikutegwa mukubusi agwasyigwe alwiiyo ndwaiya kucikolo, ikusaanguna weelede kucizyiba kubala. Nayandaula mulimo, imulimo ngwayoojana alimwi amawoola nganoobeleka kutegwa ajane zintu nzyayandika mubuumi zilakonzya kaziyeeme akucizyiba kwakwe kubala. Bamakaintu batalembedwe mulimo wakumubili ibacizyi kubala kabotu cilabaubila-ubila ikuulanganya kabotu mukwasyi wabo kujatikizya busani bubotu, ibulondo alimwi ambokucingililwa malwazi. Alimwi bamatumbu ibacizyi kubala kabotu balakonzya kubagwasya kapati bana babo ikukomena camaano.

Icigwasya kapati mukubala ncakuti, mulakonzya “kujana luzibo lwa-Leza.” (Tus. 2:5) Ikucizyiba kubala kulayandika ciindi coonse notubelekela Leza. Kumiswaangano yambungano kulabalwa Magwalo amabbuku aapandulula Bbaibbele. Ikuzwidilila kwanu mumulimo wamumuunda kuyeeme kapati ambomucizyi kubala. Alimwi ikulibambila milimo eeyi kuyanda kubala. Aboobo, ikuyaambele kwanu kwakumuuya kuyeeme kapati akubala kwanu.

Amucibelesye Kabotu Ciindi Ncomujisi

Bamwi ibali mukwiiya nzila zya Leza bajisi buyo lwiiyo lwakumubili lusyoonto. Aboobo, inga kabayandika kuyiisyigwa kubala kutegwa bacikonzye kuyaambele kumuuya. Antela inga bayandika lugwasyo lubagaminide kutegwa bacizyibe kubala kabotu. Imbungano zilasola ikweendelezya cikolo cakwiiya kubala akulemba mumasena oomo bantu mobayandika lugwasyo, ikwiinda mukubelesya bbuku lyakuti, Sungwaala Kukubala Akukulemba. Izyuulu-zyuulu zyabantu banji bagwasyigwa kapati abubambe oobu. Mbwaanga ikubala kabotu ncintu ciyandika kapati, imbungano zimwi zili abubambe bwacikolo cakuyaambele mukubala calo cicitwa aciindi comwe a Cikolo Camulimo Weendelezyegwa a Leza. Noliba leelyo nokutakwe zikolo zyamusyobo ooyu, imuntu ulakonzya kuyaambele kapati ikuti kajana ciindi abuzuba cakubala cakupozya alimwi akwiinda mukujanika lyoonse akutola lubazu mucikolo.

Cilausisya ikwaamba kuti zintu zisesya alimwi acipekupeku nzyezimwi akati kazintu zyapa kuti bantu banji kabatabikkili maano kukubala. Ikweebelela cipekupeku akubala kwaciindi buyo cisyoonto zilakonzya kunyonganya kuyaambele kwamuntu muluzibo lwakwe lwakubala kubikkilizya akuyeeya alimwi akukanana kabotu.

“Muzike musyomesi uucenjede” nguutupa mabbuku aatugwasya ikumvwisya Bbaibbele. Ibaciinga eeci camuzike balatupa makani manji kapati aakumuuya aayandika kapati. (Mt. 24:45; 1 Kor. 2:12, 13) Alimwi balatugwasya ikuteelela zintu zicitika munyika iziyandika kapati alimwi ancozyaamba, balatugwasya ikumvwisya zintu zyacilengwaleza akutuyiisya nzila mbotukonzya kuliyumya mubuumi bwesu. Kwiinda zyoonse, balabikkila maano kujatikizya mbotukonzya kumubelekela Leza munzila njayanda kutegwa katumukkomanisya. Ikubala kuli ampindu ikuli boobu kuyoomugwasya ikuba bantu basimide kumuuya.

Masimpe, ikucizyiba buyo kubala kabotu kulikke takugwasyi pe. Iluzibo oolu luyandika kubelesyegwa kabotu. Mbubwenya mbuli kulya, tweelede kusala nzyotubala. Nkaambo nzi ncomunga mwalya cakulya citamupi abusani buli boonse naa icijisi musamu uujaya? Aboobo, ino nkaambo nzi ncomunga mwayanda kubala makani nokuba kuti inga kamucita boobo cakutaasungwaalila buya, imakani aakonzya kusofwaazya mizeezo amoyo wanu? Injiisyo zyamu Bbaibbele zyeelede kutugwasya mukusala zintu zili zyoonse nzyotubala. Kamutanasala ncomuyanda kubala, amwiibaluke magwalo mbuli bwayaaya, Mukambausi 12:12, 13; Ba-Efeso 4:22-24; 5:3, 4; Ba-Filipi 4:8; Ba-Kolose 2:8; 1 Johane 2:15-17; a 2 Johane 10.

Amubale Amuzeezo Mubotu

Mwalanga-langa zibalo zya Makani Mabotu mulabona mbociyandika kapati ikuba amuzeezo mubotu ciindi nomubala. Mucikozyanyo, mu Makani Mabotu aakalembwa a Matayo, tujana zibeela Jesu mwaakali kubuzya basololi bazikombelo ibakaazyi kabotu magwalo mibuzyo yakuti, “Sa tamu[na]balide?” akuti “Sa tamubalide kuti?” katanaingula kwiinda mu Magwalo kumibuzyo yabo yabucenjezu yakuyanda kumujanina mulandu. (Mt. 12:3, 5; 19:4; 21:16, 42; 22:31) Cimwi ncotwiiya kuli ceeci ncakuti, ikuti katubala amuzeezo uutali kabotu, tatukonzyi kukapandulula kabotu naa kutakamvwida limwi buya kaambo nkotwali kubala. Iba Farisi bakali kubala Magwalo nkaambo bakalijisi muzeezo wakuti bakali kuyoojana buumi butamani kwiinda mukucita boobo. Ikweelana ambwaakaamba Jesu, ibulumbu oobo tabuli bwabantu aabo ibatamuyandi Leza alimwi ibatazumini nzila Yakwe njabelesya kufwutula bantu. (Joh. 5:39-43) Imizeezo yaba Farisi yakali yakuliyanda; aboobo ikuyeeya kwabo lyoonse kwakali lubide.

Ikuyanda Jehova ngomuzeezo mubotu weelede kutukulwaizya ikubala Jwi lyakwe. Iluyando luli boobo lulatukulwaizya ikwiiya kuyanda kwa Leza, mbwaanga luyando “lulabotelwa muli zyabwini.” (1 Bako. 13:6) Nokuba kuti musyule kunyina notwakali kukuyanda kubala, ikuyanda Jehova ‘amiyeeyo yesu yoonse’ kuyootukulwaizya ikubikkila maano kapati kukwiiya kasimpe ka Leza. (Mt. 22:37) Iluyando lupa kuti tube aluyandisyo nkabela luyandisyo lukulwaizya kwiiya.

Amubikkile Maano Kukubala Kwanu

Ikubala kuleendelana kapati akuzyiba. Noliba lino nomubala, muli mukwaazyiba mabala akwiibaluka ncaamba. Mulakonzya kuyaambele mukubala kwanu ikuti kamwaazyi kabotu mabala. Muciindi cakwiima buya ikutegwa mulangisye bbala lomwe-lomwe, amusole kubona mabala aali mbwaabede aciindi comwe. Mbomuya buyaambele mukucita boobu, muyoojana kuti lino munoozimvwisya kabotu nzyomubala.

Pele ciindi nomubala makani aakatazya kumvwa, ilugwasyo ndomuyoojana mukubala kwanu lulakonzya kuyungizyigwa kwiinda mukubelesya nzila imbi. Naakali kulailila Joshua mbwaakeelede kubala Magwalo, Jehova wakati: “Eli ibbuku lyamulao talyeelede kutantamuka kumulomo wako, pe, uleelede kubika miyeeyo yako kulindilyo lyoonse buyo.” (Jos. 1:8) Ikwaambaula mumizeezo kanji-kanji kulacitwa muntu nazinzibala akaambo kamwi. Nkakaambo kaako ibbala lya Cihebrayo lyakasandululwa kuti “kubika miyeeyo” lilakonzya alimwi kusandululwa kuti “kuyeeya.” (Int. 63:6; 77:12; 143:5) Muntu nayeeya munzila iili boobu, ulacita oobo cakuzinzibala; tabindaani pe. Ikubala cakuzinzibala kupa kuti Jwi lya Leza limukulwaizye muntu mumizeezo amumoyo. Ibbaibbele lilijisi businsimi, lulayo, tusimpi, kweema, milumbe yaambilizya lubeta lwa Leza, makani aajatikizya makanze aa Jehova azikozyanyo zinji zyakacitika ncobeni—zyoonse iziyandika kapati kuli baabo ibayanda kweenda munzila zya Jehova. Cilagwasya kaka ikubala Bbaibbele munzila iigwasya kumvwisya nzyotubala akuziibaluka mumizeezo amumoyo wanu!

Amulizyibizye Kubikkila Maano

Nomubala, amulibikke muciimo acimwi caambwa. Mumizeezo yanu, amweezyeezye kuti mulibabwene aabo ibaambwa mucibalo alimwi akulimvwa mbobalimvwa kuzintu zibacitikila mubuumi bwabo. Eeci tacikatazyi pe ikapati nomubala makani aamba Davida a Goliati aayo aalembedwe mubbuku lya 1 Samueli caandaano 17. Pele naaba makani aali mubbuku lya Kulonga a Levitiko aamba zyakuyakwa kwatempele naa kutalisyigwa kwabupaizi, ayoomukkomanisya kapati alimwi ayooba mbuli kuti mulizibwene buya zintu kazicitika ciindi nomweezyeezya ibuyale azibelesyo naa kununkizya tununkilizyo, imaila aayokedwe abanyama bakali kutuulwa kazili zituuzyo zyakutenta. Amuyeeye buyo mbocakali kuyoosya kapati ikubeleka mulimo wabupaizi! (Lk. 1:8-10) Ikulekela mizeezo yanu alimwi ambomulimvwa kujatikizyigwa munzila eeyi kuyoomugwasya ikumvwisya ncozyaamba eezyo nzyomubala alimwi kuyoomugwasya kuziibaluka.

Pele ikuti tiimwacenjela ciindi nomubala, imizeezo yanu ilakonzya kaili kumbi. Meso aanu alakonzya kaalangide aapepa, pele mizeezo ilakonzya kiili kumbi. Sena kuli kulila nyimbo? Sena cipekupeku cilijaludwe? Sena kuli bamukwasyi baambaula? Ikuti kacikonzyeka, ncibotu kubalila mubusena butakwe cisabila. Nokuba boobo, kuli zintu zinyonganya nzyomukonzya kuba anzizyo nobeni. Ambweni mwajisi bubi buzuba boonse. Ncuuba-uba kaka ikutalika kuyeeya nzyotwali kucita buzuba oobo! Inzya, ncibotu kuziyeeya zintu nzyomwali kucita mubuzuba—pele tamweelede kucita oobo ciindi nomubala. Ambweni mwalitalikide kamugamikide mizeezo yanu kukubala, antela mwalitalikide kubala kwanu amupailo. Pele mbomuya buzumanana kubala, imizeezo yanu yatalika kusakana. Amusoleke alimwi. Amugamike mizeezo yanu kumakani ngomubala. Bucebuce, muyoobona kuti muyaambele.

Mucita nzi mwajana bbala ndyomutazyi ncolyaamba? Mabala amwi ngomutazyi kabotu alakonzya kaapanduludwe naa kubandikwa mucibalo mweena. Ambweni mulakonzya kuzyiba ncaamba mabala kwiinda mumakani aali mucibalo. Ikuti kakutali boobo, amulilange bbala eelyo lyamukatazya mubbuku lipandulula mabala ikuti kamujisi, naa amulyeenge buyo bbala eelyo kutegwa mubuzye umwi aciindi cimbi. Eeci ciyooyungizya mabala ngomuzyi alimwi ciyoomugwasya kapati ikumvwisya nzyomubala.

Kubala Kubuleya

Ciindi mwaapostolo Paulo naakaambila Timoteo kuti asungwaale kukubala, ikapati wakali kwaamba zyakubalila bamwi. (1 Tim. 4:13) Nzinji zijatikizyidwe mukubala kabotu kubuleya kunze lyakubala buyo mabala aalembedwe cakupozya. Sikubala uyandika kumvwisya ncaamba mabala alimwi akututeelela twaambo twaambwa mucibalo. Lilikke acita boobo nanga wacikonzya ikubala twaambo munzila iluzi alimwi akutondezya muuya wangawo munzila iili kabotu. Masimpe, eeci ciyanda kulibambila kabotu alimwi akwiinduluka-induluka. Nkakaambo kaako Paulo ncaakakulwaizya kuti: “Sungwaala kukubala.” Muyoojana lwiiyo lugwasya kapati muluzibo oolu mu Cikolo Camulimo Weendelezyegwa a Leza.

Amujane Ciindi Cakubala

“Makanze aabasungu alaleta zilyo zinji, pele uufwanzya makani ulajana bucete buyo.” (Tus. 21:5) Elo kaka kaliluzi kaambo aaka kujatikizya luyandisyo lwesu lwakubala! Ikutegwa tujane “zilyo zinji,” tuyandika kulibambila kabotu kutegwa milimo imbi itasinkilili kubala kwesu.

Ino ndilili nomubala? Sena kubala ciindi camafwumofwumo kulamugwasya? Sena mubikkila maano kapati ciindi cakumazuba? Ikuti mwabikka ambali maminiti aali 15 naa 20 buyo aakubala abuzuba, ciyoomugambya kapati ikubona nzyomukonzya kuzuzikizya. Iciyandika nkuzumanana kucita oobo lyoonse.

Ino nkaambo nzi Jehova ncaakasala kuti makanze aakwe aayandika kapati alembwe mubbuku? Wakacita oobo ikutegwa bantu kabajana busolozi mbobayandika kwiinda mu Jwi lyakwe lilembedwe. Eeci cilabagwasya ikuzinzibala milimo ya Jehova iigambya, akwiizyibya bana babo alimwi akutaluba milimo ya Leza. (Int. 78:5-7) Ikulumba kwesu kujatikizya buuya bwa Jehova mumakani aaya kulatondezyegwa kwiinda mukusungwaala kwesu mukubala Jwi lyakwe lipa buumi.

SENA kuli nomwakabona kale bantu kabasala mucelo? Ibanji balaulangisya ikubona musyobo akubona mboubede kukomena ikutegwa bazyibe naa ulipide. Bamwi bantu balaununkizya mucelo. Ibamwi balautyanka-tyanka. Alimwi ibamwi baleezyeezya, kabajisi mucelo omwe kujanza limwi aumwi mujanza limbi kutegwa bamvwe kuti nguuli uulema kapati. Ino aba bantu inga bayeeya nzi nobacita boobo? Inga kabali mukweezyeezya zintu, ikulanga-langa kwiindana kuliko, kabayeeya kusala nkobakacitide musyule alimwi akweezyanisya nzyobabona lino azyeezyo nzyobazyi kale. Akaambo kakuti inga balailangisya micelo kabatanasala, balajana micelo iili amunse.

Pele ibulumbu bwakwiiya Jwi lya Leza bulainda awo. Ikuti twabikkila maano kukwiiya kuli boobo mubuumi bwesu, ilusyomo lwesu lulayumizyigwa, luyando lwesu lulayungizyigwa, tulazwidilila mumulimo wesu. Alimwi ikusala nkotucita kupa bumboni bwakuti tuli aluzibo abusongo bwa Leza. Kubulumbu buli boobu, bbuku lya Tusimpi 3:15 lyaamba kuti: “Azintu zyoonse nzoyandisya tazyeelene abo.” Sena muli mukugwasyigwa abulumbu buli boobo? Ciya mbuli mbomwiiya.—Kol. 1:9, 10.

Ino kwiiya ninzi? Takuli buyo kubala kulikke pe. Kulajatikizya kubelesya mizeezo yanu kabotu-kabotu naa ikulanga makani amwi kwaciindi cili mbocibede. Kulabikkilizya akulanga-langa nzyomubala, ikweelanya makani ngomuzyi kale akubikkila maano kutwaambo tupedwe kujatikizya makani aambwa. Nomwiiya, amuyeeye cakuzinzibala atwaambo tuli toonse itwaambwa ooto ntomwiiya ciindi cakusaanguna. Alimwi amulange-lange mbomukonzya ikubelesya lulayo lwamu Magwalo kusikila mpomugolela. Mbomuli Bakamboni ba Jehova, muyookulwaizyigwa akulanga-langa mbazu oomo momukonzya kubelesya makani aayo ikugwasya bamwi. Kakunyina akudooneka, ikwiiya kulabikkilizya akuzinzibala kuyeeya.

Ikulibambila Mumizeezo

Nomulibambila kwiiya, mulabweza zintu mbuli Bbaibbele, mabbuku aali woonse ngomuyanda kubelesya, impensulu naa bboopeni abbuku lyakulembela twaambo. Pele sena mulalibambila amumoyo wanu? Ibbaibbele litwaambila kuti Ezara “wakapangika moyo wakwe kukuyandaula mulao wa-Jehova, akuucita, akukwiisya ba-Israyeli milazyo ambeta.” (Ezr. 7:10) Ino kupangika moyo ooku kujatikizya nzi?

Imupailo ulatugwasya kutalika kwiiya Jwi lya Leza amizeezo iili kabotu. Tuyanda kuti imoyo wesu, waatambule malailile ngatupa Jehova. Lyoonse notutalika kwiiya, atumukumbile Jehova kuti atugwasye amuuya wakwe. (Lk. 11:13) Amumukumbile kuti amugwasye ikumvwisya ncozyaamba eezyo nzyomuyanda kubala, mbozyiswaangene amakanze aakwe, mbozyikonzya kumugwasya ikuba aluzibo lwakwaandaanya cibotu acibi, mbomukonzya kubelesya njiisyo zyakwe mubuumi bwanu alimwi amakani aayo mbwaajatikizya cilongwe canu anguwe. (Tus. 9:10) Eelyo nomwiiya, ‘amuzumanane kukumbila Leza’ kuti amupe busongo. (Jak. 1:5) Kwiinda mumakani ngomwiiya, cakusyomeka amulilingule eelyo nomukumbila Jehova kuti amugwasye kuleka mizeezo iilubide alimwi azisusi zibi. Lyoonse “amwiimbile Jehova cakulumba” kujatikizya zintu nzyaatuyubunwida. (Int. 147:7) Eeyi nzila yakutalika ciiyo amupailo isololela kukuba acilongwe cini-cini a Jehova mbwaanga ilatugwasya kumwiingula naambaula kulindiswe kwiinda mu Jwi lyakwe.—Int. 145:18.

Ikulisungula kuli boobo kulabaandaanya bantu ba Jehova kuli basikwiiya bambi. Icilengwa cakudooneka alimwi akukazya makani aalembedwe cilidumide akati kabaabo batakombi Leza. Pele oobo tabusyi mbotubede swebo. Tulamusyoma Jehova. (Tus. 3:5-7) Ciindi notutaamvwisyi kabotu makani amwi, tatuyeeyi cakulisumpula kuti makani aayo alilubide. Notuciyandaula alimwi akuvwuntauzya bwiinguzi, tulangila kuli Jehova kuti atugwasye. (Mik. 7:7) Mbubwenya bwakacita Ezara, andiswe imbaakani yesu njakuzyibelesya akuziyiisya bamwi nzyotwiiya. Katujisi makanze aaya mumoyo, tuyoogwasyigwa kapati kwiinda mukwiiya kwesu.

Mbomweelede Kwiiya

Muciindi cakwiile kutalika kubala muncali wakusaanguna akuzumanana kusikila kumamanino, amusaangune kulanga-langa ciiyo naa cibalo coonse mbocibede cijatikizyidwe mumakani aayo. Amusaangune kulanga-langa mabala aabelesyegwa mumutwe wamakani. Ooyu ngomutwe wamakani aali mucibalo ncomuyanda kwiiya. Mpoonya amubikkile maano mitwe yamukati mboiswaangene amutwe wamakani. Amuzilangisye kabotu zifwanikiso, maccaati naa tubbokesi tugwasya mukwiiya, eezyo zijatikizyidwe mucibalo. Amulibuzye kuti: ‘Kweelana akulanga-langa ooku nkondacita, ncinzi ncondilangila kwiiya? Munzila nzi mociya kundigwasya?’ Eeci ciyoomugwasya ikuba ambaakani mukwiiya kwanu.

Lino amubale twaambo twini. Zibalo zyaciiyo ca Ngazi Yamulindizi amabbuku amwi zilabikkilizya amibuzyo iisimbidwe. Nomubala mincali, cilagwasya ikweenga aali bwiinguzi. Noliba leelyo nokutakwe mibuzyo yaciiyo, mulakonzya kweenga twaambo tuyandika kapati ooto ntomuyanda kwiibaluka. Mwajana kaambo kamwi kapya, mutabali cakufwambaana, amutole ciindi kutegwa mukamvwisye. Amubikkile maano kubupanduluzi bugwasya kumvwisya makani amwi naa twaambo tupedwe ooto tuyoomugwasya mumulimo wamumuunda antela tukonzya kubikkilizyigwa mumakani amwi aacizya kumbele ngomunga mwapegwa mumbungano. Amuyeeye bantu aabo mbomuzyi kuti balakonzya kuyumizyigwa mulusyomo lwabo ikuti mwabaambila makani ngomwiiya. Amweenge twaambo ooto ntomulombozya kubelesya alimwi amwiinduluke kutulanga-langa nomwamana kwiiya.

Nomulanga-langa makani amwi, amwaalange amagwalo aabikkidwe. Amuyeeye cakuzinzibala alugwalo alumwi mboluswaangene amakani aambwa mumuncali.

Mulakonzya kujana makani ngomutamvwisyi naa ngomunga mwayanda kuti mwaavwuntauzye kabotu-kabotu. Muciindi cakulekela makani aali boobu kumunyonganya, amulembe majwi masyoonto ambali kutegwa mwaalange-lange mwamanizya kwiiya. Makani amwi kanji-kanji alalimvwisya kabotu mwabala zili kumbele. Ikuti kakutali boobo, mulakonzya kwaavwuntauzya. Ino nzintu nzi nzyomukonzya kubikkilizya mumakani aaya? Ambweni kuli lugwalo lumwi luzubuludwe ndomutamvwisyi. Antela cilakonzya kumuyumina kubona kweendelena kuliko amakani aabandikwa. Ambweni inga kamuyeeya kuti mwakamvwisya kaambo kabandikwa pele tiimwakamvwisya kabotu cakuti inga mwakapanduluda muntu umbi. Muciindi cakwiile kutwiinda twaambo tuli boobu, cilakonzya kugwasya ikuti mwatuvwuntauzya mwamana kwiiya nzyomwatalikide.

Mwaapostolo Paulo naakalemba lugwalo lwakwe ku Banakristo bana Hebrayo kujatikizya twaambo tunji, wakalutyokezya akati akwaamba kuti: “Mutwe wamakani ngooyu.” (Heb. 8:1) Sena andinywe mulaliibalusya munzila njoonya eeyi ciindi aciindi? Amubone Paulo ncaakacitila boobo. Muzyaandaano zyamusyule zyalugwalo lwakwe lwakasololelwa amuuya, wakali batondezyede kale kwaamba kuti Kristo mbwali Mupaizi Mupati wa Leza, wakalinjilide kujulu kwini. (Heb. 4:14–5:10; 6:20) Pele kwiinda mukubikkila maano alimwi akukankaizya kaambo kapati aako kali kumatalikilo aacaandaano ca 8, Paulo wakabagwasya basikubala nzyaakalemba ikulibambila mumizeezo kutegwa babone mbocakali kubujatikizya buumi bwabo. Wakaambide kuti Kristo wakasika kuli Leza akaambo kambabo alimwi wakajula nzila yakuti abalo bacikonzye kunjila “mu-Busena Busalala” bwakujulu. (Heb. 9:24; 10:19-22) Ikusinizya kwabulangizi bwabo kwakali kuyoobakulwaizya ikubelesya lulayo alumbi lwakaambwa mulugwalo oolu kujatikizya lusyomo, lukakatilo abukkale bwa Bunakristo. Mbubwenya buyo, ciindi notwiiya, ikubikkila maano kutwaambo tuyandika kuyootugwasya ikubona bupanduluzi bwamutwe wamakani akumvwisya ncotuyandika ikucita kweelana amakani aayo.

Sena ciiyo canu ciyoomukulwaizya ikubweza ntaamu? Ooyu mmubuzyo uuyandika kapati. Nomwiiya cimwi cintu, amulibuzye kuti: ‘Ino eeci ceelede kukujatikizya buti kuyeeya kwangu alimwi ambaakani nzyondijisi mubuumi? Mbuti mbondikonzya kubelesya makani aaya mukumanizya penzi limwi, mukusala zyakucita naa kuzuzikizya mbaakani imwi? Ino inga ndacibelesya buti antoomwe abamukwasyi wangu, mumulimo wamumuunda amumbungano?’ Mibuzyo eeyi amwiilange-lange cakuzinzibala, ikweezyeezya bukkale oomo momukonzya kulubelesya luzibo ndomwajana.

Mwamanizya caandaano naa cibalo acimwi, amupilukile kucilanga-langa. Amubone naa mulakonzya kutwiibaluka twaambo tuyandika kapati amakani aatusindikizya. Eeyi ntaamu iyoomugwasya ikwiibaluka makani kutegwa mukaabelesye kumbele.

Nzyotweelede Kwiiya

Mbotuli bantu ba Jehova, tujisi zinji zyakwiiya. Pele ino tweelede kutalikila aali? Abuzuba tweelede kwiiya lugwalo alimwi acibalo cili mukabbuku ka Kulingaula Magwalo Abuzuba. Amvwiki tulajanika kumiswaangano yambungano, aboobo ikwiiya nkotucita mukulibambila miswaangano eeyi kuyootugwasya kapati. Kunze lyaboobo, bamwi bali kwiiya mabbuku eesu aa Bunakristo aakasimbwa kaindi kabatana akwiiya kasimpe. Ibamwi balasala zibeela zimwi mukubala Bbaibbele kwabo amvwiki akuvwuntauzya kujatikizya tupango ooto.

Ino ncinzi ncomunga mwacita ikuti kamutajani ciindi cakwiiya kabotu-kabotu makani oonse ayoolangwa-langwa kumiswaangano yambungano amvwiki? Mutabi aciyanza cakubala cakufwambaana amuzeezo wakuti mumanizye-maninzye naa ikulekela limwi kuzilanga eezyo ziyooyiigwa akaambo kakuti inga tamucikonzyi. Muciindi caboobo, amubone eezyo nzyomukonzya kwiiya mpoonya akuzicita kabotu. Amucite oobo amvwiki. Mukuya kwaciindi, amusoleke kubikkilizya miswaangano aimbi.

“Yaka Iŋanda Yako”

Jehova ulizyi kuti basilutwe bamikwasyi bayandika kubeleka canguzu ikujanina bayandwa babo zintu nzyobayandika. Ibbuku lya Tusimpi 24:27 lyaamba kuti, “Bamba milimo yako anze; bamba zintu zyoonse mumyuunda.” Pele tamweelede kuluba ziyandika mukwasyi wanu kumuuya. Nkakaambo kaako, ikapango kalazumanana kwaamba kuti: “Wamana obo, yaka iŋanda yako.” Ino mbuti basilutwe bamikwasyi mbobakonzya kucita boobo? Ibbuku lya Tusimpi 24:3 lyaamba kuti: “Iŋanda ilayasigwa . . . amaanu.”

Ino mbuti maano mbwaakonzya kubagwasya bamuŋanda yanu? Maano nduzibo lwakucikonzya ikubona zintu eezyo zitakonzyi kubonwa buyo kakunyina kuziiya. Inga kwaambwa kuti ikutegwa mube aciiyo camukwasyi cigwasya mweelede kusaanguna kulangilila mukwasyi wanu kwaciindi cili mbocibede. Ino mbuti mbobayaambele bamukwasyi wanu kumuuya? Amuswiililisye nomubandika ambabo. Sena kuli citondezyo cili coonse cakutongooka naa ikusulaikana? Sena babikkila maano kapati kuzintu zyakumubili? Ciindi nomuli mumulimo wamumuunda abana banu, sena balalizyibya kubeenzyinyina kabatamvwi nsoni kuti mbamwi ba Bakamboni ba Jehova? Ino balabukkomanina bubambe bwamukwasyi bwakubala Bbaibbele alimwi akwiiya? Ino ncobeni babikka nzila zya Jehova kuba nzila nzyobatobela mubuumi bwabo? Mbomuli basilutwe bamukwasyi, kulangisyisya kuyoomugwasya ikubona ncomuyandika kucita ikutegwa muyumye alimwi akuyaka bube bwakumuuya muli aumwi wamukwasyi.

Amuyandaule zibalo zijatikizya lugwasyo lugaminide kuzwa mu Ngazi Yamulindizi a Galamukani! Mpoonya amuuzyibye mukwasyi ciyooyiigwa kakucili ciindi kutegwa balibambilile limwi makani aayo. Amube aaluyando ciindi nomwiiya. Kakunyina kusinsa naa ikuusya nsoni uuli woonse mumukwasyi, amukankaizye mbwaayandika makani ngomulanga-langa, alimwi akutondezya kabotu-kabotu mbwaakonzya kubelesyegwa amukwasyi. Amubajatikizye boonse bamukwasyi mumubandi. Amumugwasye aumwi ikubona Jwi lya Jehova ‘mbolilondokede’ mukupa ceeco ciyandika mubuumi.—Int. 19:7.

Ikutebula Zilongezyo

Ibantu babikkila maano ibatakwe luzibo lwazintu zyakumuuya, balakonzya kwiiya bubumbo, zintu zicitika munyika mane akwiiya mbobabede lwabo beni, pele cilabaalila ikumvwisya cini ncozyaamba eezyo nzyobabona. Kulubazu lumbi, kwiinda mukugwasyigwa amuuya wa Leza, ibantu baiya Jwi lya Leza lyoonse balakonzya kubona milimo ya Leza, ikuzuzikizyigwa kwabusinsimi bwamu Bbaibbele alimwi akuyubununwa kwamakanze aa Leza aakulongezya bantunsi bamvwa.—Mk. 13:4-29; Rom. 1:20; Ciy. 12:12.

Nokuba kuti ncintu cikkomanisya kapati eeco, taceelede kutupa kuba bantu balisumpula. Muciindi caboobo, ikulingaula Jwi lya Leza abuzuba kutugwasya kuba bantu balibombya. (Dt. 17:18-20) Alimwi kulatukwabilila ‘kukucengwa acibi’ akaambo kakuti ciindi Jwi lya Leza nolili lizumi mumyoyo yesu, ikubota kwacibi takulangilwi kuzunda makanze eesu aakucikazya. (Heb. 2:1; 3: 13; Kol. 3:5-10) Aboobo, tuyoozumanana ‘kweenda munzila yeelede cakubotezya Mwami muziyanza zyoonse notuyaabuzyala micelo yamilimo mibotu yamisyobo yoonse.’ (Kol. 1:10) Ikucita boobo nembaakani njotujisi ciindi notwiiya Jwi lya Leza alimwi tulagwasyigwa kapati eelyo notuyizuzikizya.