Sena cakali camaano kuli Davida kulindila Leza kuti amubikkile maano? Sena Leza ulamubikkila maano nywebo? Bantu banji cilabakatazya kusyoma kuti Leza singuzuzyoonse ulababikkila maano. Ino nkaambo nzi?

Kaambo komwe nkakuti, Leza ulisumpukide kapati kwiinda bantu. Mbwaanga cuuno cakwe cilisumpukide kapati, bamasi boonse “bali mbuli idosi lyamaanzi mukati kantesyo. Balayeeyegwa mbuli kasuko kacipimyo.” (Isaya 40:15) Mulembi umwi wamazubaano uudooneka kuti Leza nkwali wakaamba kuti, “nkulisumpula ikusyoma kuti kuli Leza uubikkila maano kuzintu nzyomucita alimwi uucita oobo cakufwambaana.”

Kulubazu lumwi, bantu bamwi balimvwa kuti micito yabo taikonzyi kupa kuti Leza ababikkile maano. Mucikozyanyo, mwaalumi uutegwa Jim wakaamba kuti: “Lyoonse ndakali kupaila kutegwa ndibe aluumuno alimwi akulilesya, pele kalitanalampa bukali bwangu bwakali kubuka alimwi. Kumamanino, ndakali kulibona kuti ndili sizibi wiinda alimwi akuti Leza tanaakali kukonzya kundigwasya.”

Sena Leza uli kulamfwu kapati abantu cakuti cilamwaalila kuzyiba zitucitikila? Ino mubwini ulimvwa buti kujatikizya zilenge zyakwe zitalondokede? Kakunyina kusololelwa a Leza, kunyina muntu ukonzya kwiiminina Leza mukwiingula mibuzyo eeyo. Nokuba boobo, mulumbe wa Leza ngwaakapa bantu iwakasololelwa amuuya, nkokuti Bbaibbele, litusyomezya kuti tali Leza uuli kule, walo uutabikkili maano kumuntu umwi aumwi. Bbaibbele lyaamba kuti: “Mubwini tali kulamfwu kuli umwi aumwi wesu.” (Milimo 17:27) Muzibalo zyone zitobela, tulalanga-langa ncatwaambila Leza kujatikizya mbwababikkila maano bantu alimwi ambwacita oobo kubantu bali mbuli ndinywe.

IKAAMBO BAMWI NCOBADOONEKA: Kweelana abuvwuntauzi bwakacitwa caino-ino, mulalabungu ulakonzya kuba amapulaneti asika ku bbiliyoni yomwe. Kubona mbobuli bupati bubumbo, bantu banji cibapa kubuzya kuti, ‘Nkaambo nzi mulengi singuzuzyoonse ncakonzya kubikkila maano kuzintu nzyobacita bantu bali muciimo caansi ibali apulaneti nsyoonto kapati?’

NCOLIYIISYA JWI LYA LEZA: Leza tanaakatupa buyo Bbaibbele mpoonya akuleka kutulanganya. Muciindi caboobo, Jehova utusyomezya kuti: “Njookweenzya kukubika liso lyangu alinduwe.”—Intembauzyo 32:8.

Amuyeeye buyo kujatikizya Hagare mukaintu muna Egepita wamumwaanda wamyaka wa 20 B.C.E. Hagare tanaakali kumupa bulemu Sarai sikumunjizya mulimo. Aboobo Sarai wakamutanda mpoonya Hagare wakatija kutozya munkanda. Mbwaanga Hagare wakalubizya, sena Leza wakaleka kumulanganya? Bbaibbele lyaamba kuti: “Angelo wa-Jehova wakamujana.” Mungelo ooyu wakamuumbulizya Hagare amajwi aakuti: “Jehova ulimvwide mapenzi aako.” Mpoonya Hagare wakati kuli Jehova: “Nduwe-Leza-oondibwene.”—Matalikilo 16:4-13.

‘Leza uubona’ ulamulanganya andinywe. Mucikozyanyo: Muzyali mukaintu inga ulabalanganya bana bakwe bacili baniini, ikuti mwana kacili muniini nkokuti nceciindi nayandika kubikkilwa maano abazyali wakwe. Mbubwenya buyo, Leza ulatulanganya, kwaambisya ciindi notutyompedwe anotuli mubukkale bukatazya. Jehova waamba kuti: “Ndikede mubusena busalalisya busumpwidwe, pele mubombumoyo uupengede alakwe ndikede awe. Ndime uubusya muuya wamuntu uubombede akukatalusya moyo wayooyo uupengede.”—Isaya 57:15.

Nokuba boobo, mulakonzya kulibuzya kuti: ‘Mbuti Leza mbwandilanganya? Sena ulacita oobo kwiinda mukulanga mbondiboneka, naa ulalangisisya twaambo toonse alimwi akuzyiba bwini mbondibede?’

IKAAMBO BAMWI NCOBADOONEKA: Bantu banji balimvwa kuti Leza ubabona buyo kuti mbaasizibi, nkokuti, tabasalali alimwi takonzyi kubabikkila maano. Ba Kendra ibakaciswa bulwazi bwakutyompwa bakalipa mulandu akaambo kakuti tiibakali kukonzya kusika azyeelelo zya Leza. Akaambo kaceeci bakaamba kuti, “Ndakacileka kupaila.”

NCOLIYIISYA JWI LYA LEZA: Jehova talangi buyo kutalondoka kwanu, pele alimwi ulamvwisya bwini mbomubede. Bbaibbele lyaamba kuti: “Ulizi mbububede buntu bwesu, ulaibulukwa kuti tuli bulongo buyo.” Kwiinda waawo, kunyina natweendelezya kweelana ‘azibi zyesu,’ pele calubomba ulatulekelela ciindi notweempwa.—Intembauzyo 103:10, 14.

Amuyeeye Davida, mwami muna Israyeli iwaambwa mucibalo cakusaanguna cazibalo eezi zitobelene. Mumupailo wakwe kuli Leza, Davida wakaamba kuti: “Meso aako akandibona nkecili insalalila: Mubbuku lyako zizo zyangu zyoonse kazilembedwe, . . . Undilingule, O Leza, uzibe moyo wangu.” (Intembauzyo 139:16, 23) Ncobeni, Davida wakali masimpe kuti nokuba kuti wakali kucita zibi zipati zimwi ziindi, Jehova wakali kubona kuti weempwa kuzwa aansi amoyo wakwe.

Jehova ulimuzyi kabotu kwiinda muntu uuli woonse. Bbaibbele lyaamba kuti: “Muntu ulabona busyu buyo, pele Jehova ulabona moyo.” (1 Samuele 16:7) Leza ulizyi cimupa kuti kamulilemeka mbuli mbomulilemeka, nkokuti bube mbomwakakona, mbomwakakomena, busena nkomukkala alimwi abube mbomujisi mbozipa kuti mube mbuli mbomubede. Ulabona alimwi akulumba kusolekesya nkomucita kutegwa mube mbomubede lino, nokuba kuti mulalubizya.

Ino mbuti Leza mbwabelesya luzyibo lwakwe lwakuzyiba ‘bwini mbomubede’ kutegwa amuumbulizye?

IKAAMBO BAMWI NCOBADOONEKA: Nociba ciindi bantu nobayandika lugwasyo akaambo kakupenga, bamwi balimvwa kuti tacili camaano kuti Leza anjilile kutegwa abagwasye kumana mapenzi aabo. Mukaintu umwi wazina lya Raquel wakaamba kuti: “Ikuti ndayeeya mweelwe wabantu bali munyika—alimwi amapenzi aakatazya ngobajisi, zintu zindipa kulibilika ziboneka mbuli kuti taziyandiki kapati cakuti ndilawayawaya kulomba Leza kuti andigwasye.”

NCOLIYIISYA JWI LWA LEZA: Leza watondezya kale munzila imwi kuti ulabagwasya alimwi akubaumbulizya bantu. Muntu uuli woonse anyika wakakona cibi, nkokuti kutacikonzya kucita kuyanda kwa Leza munzila iilondokede. Nokuba boobo, Leza “nguwakatuyanda akutuma Mwanaakwe kuti abe cipaizyo cakumanya zibi zyesu.” (1 Johane 4:10) Kwiinda mucituuzyo calufwu lwa Jesu, Leza wapa kuti cikonzyeke kulekelelwa zibi, kuba amanjezeezya aasalala, alimwi akuba abulangizi bwa buumi butamani munyika mpya yaluumuno.a Pele sena cituuzyo eeco cijatikizya bantu boonse, naa citondezya luyandisisyo ndwajisi Leza kulindinywe kumugama?

Atulange-lange cikozyanyo camwaapostolo Paulo. Wakakulwaizyigwa acituuzyo ca Jesu cakuti wakalemba kuti: “Ndilapona akaambo kalusyomo ndondijisi mumwana wa Leza, iwakandiyanda akulyaaba akaambo kandime.” (Bagalatiya 2:20) Masimpe Jesu wakafwa ciindi Paulo katanaba Munakristo. Pele Paulo wakali kubona cituuzyo kuti ncipego ca Leza cigamikidwe kulinguwe.

Mbubonya buyo, cituuzyo ca Jesu ncipego ca Leza ncaakamupa. Cipego eeci citondezya mbomuyandika kapati kuli Leza. Cilakonzya kumupa “luumbulizyo lutamani abulangizi bubotu” alimwi “akumuyumya mumilimo mibotu iili yoonse alimwi amajwi.”—2 Batesalonika 2:16, 17.

Nokuba kuti Jesu wakatuula buumi bwakwe kacili cituuzyo myaka iitandila ku 2,000 yainda, ncitondezyo nzi ciliko citondezya kuti Leza ulamubikkila maano mazubaano?

IKAAMBO BAMWI NCOBADOONEKA: Bantu banji ibamusyoma Leza balimvwa kuba kulamfwu anguwe. Ba Christina baku Ireland balo ibakali kuunka kucikombelo mvwiki amvwiki bakaamba kuti: “Ndakali kumubona buyo kuti ngu Leza wakalenga zintu zyoonse. Pele tiindakamuzyi. Taakwe nondakalimvwa kuba acilongwe anguwe.”

NCOLIYIISYA JWI LYA LEZA: Ciindi notulimvwa kusweeka, Jehova tatulekelezyi pe. Jesu wakapa cikozyanyo eeci kutondezya Leza mbwatulanganya: “Ino muyeeya buti? Ikuti muntu umwi kajisi mbelele zili mwaanda eelyo yomwe yasweeka, sena takoozisiya mumalundu eezyo zili makumi aali fwuka afwuka akuunka kuyooyandaula yeeyo yasweeka?” Ino eeci cituyiisya nzi? Cituyiisya kuti, “Mbubonya oobo, Taata uuli kujulu tayandi kuti umwi wabasyoonto aaba alobe.”—Matayo 18:12-14.

Umwi “aumwi wabasyoonto aaba ” ulayandika kapati kuli Leza. Ino mbuti Leza ‘mbwayandaula yeeyo yasweeka’? Mbubonya mbuli lugwalo lwazubululwa kumatalikilo aacibalo, Jehova ulakwela bantu kuli nguwe.

Amulange-lange buyo Leza mbwaakabweza ntaamu yakukwela bantu basyomeka kulinguwe. Mumwaanda wamyaka wakusaanguna C.E., Leza wakatuma sikwiiya Munakristo Filipo kuti akayaanye sinkuta waku Etiyopiya akubandika ncobwakali kwaamba businsimi bwamu Bbaibbele mbwaakali kubala sinkuta. (Milimo 8:26-39) Mukuya kwaciindi, Leza wakalailila mwaapostolo Petro kuti aunke kuŋanda yasilutwe wabasikalumamba muna Roma uutegwa Koneliyo, walo iwakali kupaila akusolekesya kukomba Leza. (Milimo 10:1-48) Alimwi Leza wakalailila mwaapostolo Paulo ababelesinyina kuti baunke kumulonga iwakali kunze amunzi wa Filipo. Ookuya bakajana “mukombi wa Leza” wazina lya Lidiya alimwi “Jehova wakajalula moyo wakwe cakumaninina kuti abikkile maano.”—Milimo 16:9-15.

Mubukkale bumwi abumwi Jehova wakasinizya kuti bantu ibakali kumuyandaula bapegwa coolwe cakuti bamuzyibe. Ino mbaani mazuba aano baswaya bantu mumaanda alimwi abanamaleya kutegwa babandike mulumbe wamu Bbaibbele uujatikizya Leza? Banji balakonzya kwaamba kuti, “Bakamboni ba Jehova” mbabacita oobo. Aboobo amulibuzye kuti, ‘Sena Leza ubelesya mbabo kutegwa andigwasye?’ Tumukulwaizya kuti mupaile kuli Leza kutegwa amugwasye kuti mukutambule kusolekesya kwakwe kwakuti muswene kulinguwe.a