Lukkomano Luboola Akaambo Kakupona Buumi Buuba-uba
BA DANIEL ABA MIRIAM bakakwatana mu September 2000 akutalika kukkala mudolopo lya Barcelona, mucisi ca Spain. Ba Daniel bakaamba kuti: “Twakalibukkede! Milimo njotwakali kubeleka yakali kupa kuti katucikonzya kulida mumaresitilanti aasumpukide kapati, kuyooswaya kumasi aambi alimwi akusama zisani zidula. Kuyungizya waawo, twakali kutola lubazu lyoonse mumulimo wamumuunda.” Pele zintu zyakacinca.
Kabali kumuswaangano wacooko mu 2006, ba Daniel akabasika amoyo makani aakajisi mubuzyo wakuti: “Sena tulacita zyoonse nzyotukonzya ikugwasya baabo ‘ibayaabudadalikila kuyoojayigwa’ kutegwa beendele munzila iitola kubuumi butamani?” (Tus. 24:11) Makani aaya akakankaizya mukuli ngotujisi wakwaambila bantu mulumbe wamu Bbaibbele uufwutula. (Mil. 20:26, 27) Ba Daniel balayeeya nobati, “Ndakalimvwa mbuli kuti Jehova wakali kwaambila ndime kundigama.” Alimwi makani akaamba kuti ikuyungizya mulimo wesu wakukambauka kusololela kulukkomano lunji. Ba Daniel bakalizyi kuti makani aaya ngamasimpe. Kayi ba Miriam balo ibakalitalikide kale kucita bupainiya, bakalikkomene azilongezyo zikkomanisya kapati.
Ba Daniel bakaamba kuti: “Ndakabona kuti eeci cakali ciindi cakuti ndibweze ntaamu mpoona-mpoona.” Aboobo bakacita oobo. Bakatalika kubeleka mawoola masyoonto kumulimo wabo, bakatalika bupainiya alimwi bakayeeya lukkomano ndobakali kukonzya kujana balo aba Miriam ikuti baunka kuyoobelekela kubusena kubulide bakambausi ba Bwami.
BUYUMUYUMU BWATOBELWA AMAKANI AAKKOMANISYA
Mu May 2007, ba Daniel aba Miriam bakaileka milimo yabo akuunka ku Panama, icisi ncobakaswaide kale. Cilawo cabo cipya cakajisi nsumbu zinji mucibeela ciitwa kuti Bocas del Toro Archipelago mu Lwizi lwa Caribbean, ooko ikukkala bantu ibaitwa kuti Guaymi. Ba Daniel aba Miriam bakali kuyeeya kuti kwiinda mukubelesya mali aabo ngobakayobwede, bakali kukonzya kukkala mucisi ca Panama kwamyezi iili lusele.
Bakali kuunka munsumbu kwiinda mukubelesya bwato mpoonya akuccovwa macinga baseluka mubwato, alimwi balayeeya kabotu lweendo lwakusaanguna ndobakaccovwa macinga kwamakkilomita aali 32 mutulundu tulamfwu, kumwi zuba kalibala kapati. Kwakasyeede buyo asyoonto kuti ba Daniel banetuke akaambo kakukatala. Nokuba boobo, nobakali munzila kabali mulweendo, mikwasyi yaba Guaymi yakali kubatambula kabotu kwaambisya ciindi banabukwetene aaba nobakaiya mabala aali mbwaabede mumwaambo wakubusena oobo. Kalitanalampa, bakali kusololela ziiyo zya Bbaibbele zili 23.
Nokuba boobo, mali ngobakayobwede naakamana, lukkomano lwabanabukwetene aaba lwakamana aboobo bakausa. Ba Daniel balayeeya ategwa: “Kumwi misozi kayeenda mumeso eesu, twakatalika kuyeeya kupiluka ku Spain. Twakaluuside ikusiya ziiyo zyesu zya Bbaibbele.” Pele nokwakainda mwezi omwe, bakatambula makani aakkomanisya kapati. Ba Miriam bakaamba kuti: “Twakatambwa kubeleka katuli bapainiya baalubazu. Eelo kaka cakatukkomanisya kapati kukkala kubusena oobu akuzumanana mumulimo wesu!”
CINTU CIBAKKOMANISYA KAPATI
Mu 2015, akaambo kakucinca ikwali kucitika mumbunga, ba Daniel alimwi aba Miriam bakaambilwa kuti bazumanane kubeleka mumulimo wabo kabali bapainiya baciindi coonse. Ino ncinzi ncobakacita? Bakajisi lusyomo mucisyomezyo ca Jehova cijanika kulugwalo lwa Intembauzyo 37:5: “Bikka nzila yako mumaanza aa Jehova; komusyoma, eelyo walo ulakugwasya.” Bakajana mulimo wakumubili kutegwa kabaligwasyilizya kumwi kabacita bupainiya, aboobo lino bali mumbungano iili mucooko ca Veraguas, mucisi ca Panama.
Ba Daniel baamba kuti: “Katutanalonga kuzwa ku Spain, twakali kudooneka ikuti naa inga twacikonzya kupona buumi buuba-uba. Pele mazuba aano twacikonzya, alimwi taakwe cintu ncotubula iciyandika kapati.” Ino ncintu nzi cibakkomanisya kapati? Baamba kuti, “Ikugwasya bantu babombe myoyo kwiiya kujatikizya Jehova kutuletela lukkomano lutakonzyi kweelanisyigwa acintu cili coonse!”