IKUTI mwamubona Diana,a inga mwajana kuti mukaintu uucili mwana-mwana imusongo alimwi uuyanda kumvwana abantu. Nokuba kuti Diana ulibonya kukkomana alimwi akuti ulasikika, pele ziindi zinji ulatyompwa kapati ambweni kwaciindi cili mbocibede. Aboobo waamba kuti, “buzuba abuzuba ndiyeeya buyo kufwa. Alimwi ndili masimpe kuti inga cainda kugwasya kuti ndafwa.”

Diana waamba kuti kunyina nakonzya kulijaya pe. Nokuba boobo, zimwi ziindi ulimvwa kuti kunyina kaambo keelede kumupa kuzumanana kupona. Waamba kuti, “Inga cainda kugwasya kuti ndafwa muntenda, alimwi lino, lufwu ndilubona kuba mulongwe kutali sinkondoma pe.”

Bantu banji balalimvwa mbubwenya mbwalimvwa Diana, alimwi bunji bwabo bali kuyeeya naa kusoleka kulijaya. Nokuba boobo, basyaazibwene baamba kuti bunji bwabantu ibakanza kulijaya, mubwini inga tabayandi kulijaya buya pe, pele ncobayanda buyo nkuti mapenzi ngobajisi amane. Mubufwaafwi, inga twaamba kuti bayeeya kuti tabacizyi cini ncobaponena, aboobo ncobayanda buyo nkufwa.

Nkaambo nzi ncotweelede kuzumanana kupona? Amulange-lange twaambo totatwe itutupa kuzumanana kupona.

Kulijaya kubonwa kuba “nzila ngubauba yakumana mapenzi aaciindi cisyoonto.” Nokuba kuti inga calibonya mbuli kuti tacikonzyeki, bukkale butyompya, alimwi aboobo mbomuyeeyela kuti inga tamukonzyi kubuzunda, bulakonzya kuba bwakaindi kasyoonto. Alimwi buya cakutayeeyela, bulakonzya kucinca akuba kabotu.—Amubone kabbokesi kajisi mutwe wakuti: “Bukkale bwabo bwakacinca.”

Nokuba kuti bukkale inga tiibwacinca, cilayandika kapati kulwana penzi lyomwe aciindi comwe abuzuba. Jesu wakaamba kuti: “Mutani kulibiliki zyabuzuba butobela, nkaambo buzuba butobela bunooli azyakulibilika zyambubo. Buzuba buli boonse bulijisi mapenzi aambubo.”—Matayo 6:34.

Mbuti kuti bukkale bwanu kabutakonzyi kucinca? Mucikozyanyo, ino inga mwacita buti kuti kamuciswa bulwazi butafwambaani kupona, lukwatano lwanu lwakamana, naa mwakafwidwa muyandwa wanu?

Nomuba mubukkale buli boobo, nkocili ncomukonzya kucinca: mulakonzya kucinca mbomububona bukkale. Kwiiya kuzumina bukkale mbomutakonzyi kucinca, kulakonzya kumupa kubona zintu munzila iiluzi. (Tusimpi 15:15) Alimwi mulakonzya kujana nzila zikonzya kumugwasya kuliyumya mubukkale oobo muciindi cakulijaya. Munzila nzi? Kwiinda mukucinca mbomuyeeya kujatikizya bukkale oobo, nokuba kuti tamukonzyi kubucinca.—Jobu 2:10.

KAMUYEEYA KUTI: Tamukonzyi kutanta mulundu antaamu yomwe, nokuba boobo, mulakonzya kuutanta kwiinda mukweenda aasyoonto-syoonto. Oobo mbocibede akubuyumuyumu mbomujana, nokuba kuti inga kabulibonya kuti bulakatazya.

NCOMUKONZYA KUCITA LINO: Amwaambile muntu umwi bukkale bwanu ambweni mulongwe, naa munamukwasyi. Muntu ooyo ulakonzya kumugwasya kubona bukkale bwanu munzila iiluzi.—Tusimpi 11:14.

Ncuubauba kulombozya kufwa kuti mubuumi kakulibonya mbuli kuti kunyina cintu cikonzya kucinca bukkale bwanu. Pele amulange-lange twaambo tukonzya kumugwasya.

Mupailo. Mupailo tacili cintu cikonzya kumupa buyo kulimvwa kabotu, naa cintu ncotukonzya kucita ciindi notuyanda cintu cimwi, pele nkwaambaula a Jehova Leza kwini-kwini, walo uutulanganya. Jehova uyanda kuti mumwaambile zintu nzyomulibilika. Ibbaibbele litukulwaizya kuti: “Bika makani aako oonse mumaanza aa-Jehova, lino ulakutabilila.”—Intembauzyo 55:22.

Sena inga tiimwabandika a Leza mumupailo lino? Kamubelesya zina lyakwe lyakuti Jehova, alimwi akumwaambila kuzwa aansi aamoyo wanu. (Intembauzyo 62:8) Jehova uyanda kuti mumubone kuba mulongwe. (Isaya 55:6; Jakobo 2:23) Mupailo ncoolwe cilibedelede cakubandika a Jehova calo cikonzya kuboola kufwumbwa ciindi alimwi aabusena buli boonse.

Bantu bamubikkila maano. Buumi bwanu bulayandika kapati kubantu bamwi, ibantu mbuli balongwe alimwi abanamukwasyi nkaambo balo balatondezya kale kuti balamuyanda. Bantu bambi bakonzya kumubikkila maano mbantu mbomutazyi. Mucikozyanyo, zimwi ziindi Bakamboni ba Jehova nobakambauka, balaswangana abantu batyompedwe, bamwi balalyaambilila kuti baliyandide kapati kugwasyigwa alimwi akuti bajisi makanze aakulijaya. Mulimo wabo ngobacita wakuŋanda aŋanda wabapa coolwe cilibedelede Bakamboni ba Jehova cakugwasya bantu bali boobu. Kabatobela cikozyanyo ca Jesu, Bakamboni ba Jehova balababikkila maano bantunyina. Andinywe balamubikkila maano.—Johane 13:35.

Kugwasyigwa abasyaazibwene. Mizeezo yakulijaya kanji-kanji itondezya kuti muntu ulaakabuko, mbuli bulwazi bwakutyompwa. Ikuti naa kamujisi kabuko, tamweelede kufwa nsoni nkaambo abwalo mbulwazi buya. Mubwini, kutyompwa kuzyibidwe kuti “ndipenzi lyamumizeezo.” Muntu uuli woonse ulakonzya kutyompwa, pele inga wasilikwa.a

KAMUYEEYA KUTI: Cilakatazya kusola kumana penzi lyakutyompwa nobeni. Pele kwiinda mukugwasyigwa abamwi, mulakonzya kuzwidilila.

NCOMUKONZYA KUCITA LINO: Amuyandaule syaazibwene mukusilika bulwazi bwakutyompwa.

Ibbaibbele lilazuminizya kuti muntu ‘upona buyo mazuba masyoonto alimwi ulijisi mapenzi manji kapati.’ (Jobu 14:1) Mazuba aano, muntu uuli woonse ulajatikizyigwa amapenzi aindene-indene. Aboobo, bantu bamwi balimvwa kuti buumi bunyina mpindu, alimwi bayeeya kuti kunyina bulangizi bwabuumi bubotu kumbele. Sena andinywe mbomulimvwa oobo? Kuti kakuli boobo, amubusyome bulangizi bwini-bwini bwamu Bbaibbele ibujatikizya bantu boonse kutali buyo ndinywe. Mucikozyanyo:

• Ibbaibbele liyiisya kuti Jehova Leza wakakanzide kutucitila zintu zibotu.—Matalikilo 1:28.

• Jehova Leza usyomezya kuti nyika iyooba paradaiso.—Isaya 65:21-25.

• Lugwalo lwa Ciyubunuzyo 21:3, 4 lusinizya kuti cisyomezyo eeci ciyoocitika ncobeni nolwaamba kuti:

  “Tente lya Leza lili aabantu, alimwi uyookkala ambabo, eelyo bayooba bantu bakwe. Alimwi Leza lwakwe uyooba ambabo. Eelyo uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.”

Bulangizi oobu takuli kulombozya buyo kwa Jehova. Jehova Leza ulikanzide cakumaninina kuzuzikizya makanze aaya, nkaambo ulijisi nguzu alimwi aluyandisisyo. Bulangizi bulembedwe mu Bbaibbele mbwamasimpe, alimwi bulapa bwiinguzi bukkazika moyo kumubuzyo wakuti: “Nkaambo nzi ncotweelede kuzumanana kupona?”

KAMUYEEYA KUTI: Nokuba kuti kutyompwa kulakonzya kumupepaula mbuli bwato buli mulwizi muli mayuwe, bulangizi bwamu Bbaibbele buli mbuli musemu uyoomugwasya kukkalikana.

NCOMUKONZYA KUCITA LINO: Amulange-lange ncolyaamba Bbaibbele kujatikizya bulangizi bwini-bwini bwakumbele. Bakamboni ba Jehova bayookkomana kumugwasya. Mulakonzya kubandika a Bakamboni bakubusena nkomukkala alimwi akujana makani ngomuyanda a Web site ya jw.org.a