Bantu Bamisyobo Yoonse Bayoofutulwa
1 Jehova uyanda kuti “bantu [“bamisyobo yoonse,” NW] bafutulwe akuboola kuluzibo lwakuziba lusinizyo.” (1 Tim. 2:4) Nokuba kuti munzila zimwi bantu bakozya luzubo lwabo akwiiya mbuli mbobakakomezyegwa alimwi akutobela bukkale bwakooko nkobazwa, balaliyandila alimwi balakonzya kulisalila lwabo beni mbobakonzya kubelesya buumi bwabo. Balakonzya kucita cili kabotu akupona naa balakonzya kucita zibyaabi akunyonyooka. (Mt. 7:13, 14) Ino kuteelela kuli boobu kujatikizya buti mbotulanga bantu mbotusisizya makani mabotu aa Bwami?
2 Tatweelede kuyeeyela kuti icipa muntu kuyanda kasimpe nzintu zili mbuli kucisi nkwazwa naa zilengwa zyamusyobo wakwe naa ciimo cakwe. Ikasimpe kalakonzya kukkomanisya kulibaabo batayiide kapati nobaba aabo ibalaa lwiiyo lwaambele, aabo bayandisya zyamapolitikisi abahaazibwene kumilimo, ibatasyomi muli Leza, ibadooneka Leza akulibaabo nobaba basimilandu bazizilwe. Bantu bazwa mubukkale bwiindene-indene alimwi amuziimo ziindene-indene basanduka ikuzwa mukulilemeka kwakaindi elyo lino balangila buumi munyika ya Leza mpya. (Tus. 11:19) Aboobo tatweelede kweenkeenka kusisya mulumbe wa Bwami kubantu baindene-indene maumi abo.
3 Amuyeeye Zikozyanyo Ezi: Umwi mwaalumi wakakanzide kujaya bawisi bakujana pele tanaakacita obo pe. Kumbele wakasala kulijaya pele wakakakilwa. Naakamana kwaangwa ntolongo akaambo kakubba akuulisya misamu iikola, lukwato lwakwe lwakamana. Sunu oyu muntu ulabeleka mulimo uusyomeka alimwi uli mulukwatano lukkomene alimwi acilongwe cibotu kuli bawisi bakujana. Ncinzi cakacinca zintu? Wakaiya Bbaibbele a Bakamboni ba Jehova akutobela zeezyo nzyaakaiya. Jehova taakamubona kuba muntu uutacikwe bufwutule.
4 Mukaintu umwi mwana-mwana impuwo njaakajisi yakusobana zipekupeku zyaa TV teeyakamuletela lukkomano pe. Pesi naakalamwa akulilemeka kwa Bakamboni, wakazumina ciiyo ca Bbaibbele, aboobo teelyakalampa wakatalika kugwasya bambi kwiiya zyamakani mabotu aa Bwami. Kufwumbwa kwaakainka kuyaa bukambauka kuŋandaa ŋanda wakali kuyaa buzibwa kubantu, pele wakapandulula cakukkomana kuti wakali kuyandisya kuzibwa kuba umwi wa Bakamboni ba Jehova kwiinda kuti ngusizipekupeku.
5 Ciindi umwi Kamboni naakamvwana ciiyo ca Bbaibbele asikulembya Ngazi Yamulindizi umwi, simukobonyina wakamvwa cakali kucitika elyo awalo wakazoojanikawo. Oyo simukobonyina mpoona-mpoona wakaziba kuti aka nkakasimpe nkaakali kuyandaula! Walo amulumaakwe bakamwaya cizumizyo cakulekana ncobakapedwe akuzumanana mulukwatano. Wakalisakene mumicito yakulingula nyenyeezi alimwi wakaliswaangene acikombelo cimwi camizimo, pele wakalisungula kusowa mabbuku aadula alimwi azintu zyoonse nzyaakajisi izyakaswaangene abadaimona. Teelyakalampa wakatalika kujanika kumiswaangano alimwi wakali kwaambaula abasazinyina abeenzinyina kujatikizya cikombelo cakwe cipya ncaakajana. Lino ulakambaukila bambi cabusungu.
6 Tatweelede kulanga ciimo camuntu pe. Ncotweelede nkusungwaala kwaabila bantu makani mabotu koonse. Tujisi kaambo kabotu ikakusyoma kuti Jehova, walo uuli “ulabona moyo,” uyooba “Mufutuli wabantu [“bamisyobo yoonse,” NW].”—1 Sam. 16:7; 1 Tim. 4:10.