“Jehova Ngomuvuni Wangu”
1 Jesu naakatuma basikwiiya bakwe bataanzi, wakabaambila kuti: “Amulange. Ndamutuma mbuli imbelele akati kabaumpe.” (Mt. 10:16) Sena eci cakapa kuti bayoowe akulengaana kukambauka? Peepe. Bakacita mbuli bwakazikwaamba mwaapostolo Paulo ku Banakristonyina kuti: “Atube aacamba cakwaamba kuti, ‘Leza ngomugwasyi wangu, taakwe ancenjoowa pe. Ino muntu inga wandicita buti?’” (Bahi. 13:6, Ci) Bakakukkomanina ikusampaulwa akaambo kazina lya Jesu, alimwi bakazumanana lyoonse ikuyiisya akukambauka makani mabotu.—Inc. 5:41, 42.
2 Mazubaano imulimo wakukambauka wanyika yoonse mbwiizulwa wasika kumamanino. Mbubwena mbuli mbwaakasinsima Jesu, twaba bantu basulidwe kumisyobo yoonse. (Mt. 24:9) Imulimo wesu wakukambauka wakazigwa akusampaulwa kapati, alimwi mumasena amwi aamunyika, mane walesyegwa buya. Ikuti notwatalijisi lusyomo lwini-lwini, notwayoowa akulengaana. Pele, ikuziba kuti Jehova Ngomugwasyi wesu kutukkazika moyo akutuyumya kukakatila.
3 Ibusicamba mbube bwakuba muntu muyumu, uuzumanana, uukakatila. Caamba kutaba muntu mukandu, sibweemya, imoowa. Basikwiiya ba Jesu lyoonse baali kuyandika busicamba kutegwa bakakatile. Ikuba sicamba kulayandika kapati ikuti katutayandi kutyompokelwa amuuya wanyika iitamvwani a Leza. Cilakulwaizya kaka ikutelaikaa cikozyanyo cipati ca Jesu, iwakaizunda nyika! (Joh. 16:33) Alimwi amuyeeye zyabaapostolo balo nokuba kuti bakali mumapenzi aataambiki, cabusicamba bakati: “Tuleelede kumvwa Leza kwiinda bantu.”—Inc. 5:29.
4 Tatuli Bantu Bapiluka Cifwuteesule: Tweelede kuzumanana kuukkomanina mulimo wesu. (Heb. 10:39) Lyoonse katuyeeya kuti tulimukutumwaa Jehova kuti tukatondezye luyando aluzyalo lwakwe kubanamaleya boonse. Kwiina natuma balanda bakwe kuti bacite cintu cinyina mpindu. Zyoonse nzyaakatutuma kuti tuzicite ziyoobaa mpindu kuli baabo ibamuyanda Leza.—Rom. 8:28.
5 Ikubaa lusyomo kuyootugwasya kuzumanana kuyandaula bantu bali mbuli mbelele mucilawo cesu. Ikutaakkomanina makani nkobatondezya bantu tulakonzya kukubona kuba citondezyo cakutyompwa nkobajisi. Iluyando lwesu alutukulwaizye kubeetelela akubakkazikila moyo. Ciindi aciindi notusiya mabbuku naa notubona muntu uutondezya kuti ulayanda kumvwa, imbaakani yesu yeelede kuba yakucita lweendo lwakupilukila cakufwambaana kutegwa tuyungizye luyandisisyo lwakwe. Tatweelede kudooneka kuti inga tatukonzyi kutalisya ciiyo ca Bbaibbele naa inga tatukonzyi kucisololela kabotu. Muciindi caboobo, lyoonse kwiinda mumupailo tweelede kunikulomba lugwasyo amalailile aa Jehova, katusyomede kuti uyootugwasya.
6 Tulisinizizye kuti Jehova ulazumanana kutugwasya kusikila kumamanino kwamulimo oyu. (Amweezyanisye Ba-Filipi 1:6.) Ilusyomo lwesu ilutazungaani mulinguwe lwakuti Ngomugwasyi wesu lulatuyumya, kutegwa “tutalengaani mukucita kabotu.”—Gal. 6:9.