Sena Tatukonzyi Kugwasya Kwiinda Waawo?
1 Ibubambe bwakugwasya bantu bayandika lugwasyo lwakujana Ngazi Yamulindizi naa bbuku libelesyegwa ciindi ca Ciiyo Cabbuku Cambungano bulimukubeleka kwamyaka iitandila kuli yobile ono. Mukwasyi omwe-omwe lyoonse ulatambula Ngazi Yamulindizi abbuku lyomwe lyakubelesya mumukwasyi caantoomwe kakunyina kubbadela. Ino mabbuku aaya abbadelelwa buti? Nkwiinda mukusanga kwakulisungula kuzwa kuli baabo ibakonzya kugwasya. Zimwi ziindi abaabo ibatambula lugwasyo olu balakonzya kusanga. Mucikozyanyo, mucizi umwi uuli ngosilutwe wamukwasyi wakwe wakalemba kuti, “Ndamulembela kuti ndimulumbe kulugwasyo ba Sosaiti ndobapa kubantu bayandika lugwasyo. Lyoonse ndilatambula imagazini ya Ngazi Yamulindizi yaciiyo cansondo ansondo alimwi abbuku libelesyegwa aa Ciiyo Cabbuku Cambungano ciindi eco. Zisyango zyangu nozyakatebulwa, ndakayeeya kutondezya kulumba kwangu kwamoyo woonse kwiinda mukusanga K25,000.00 kukugwasilizya bubambe obu.”
2 Mumwaka wamulimo wa 1997 imamagazini aali 166,870 amabbuku aali 318 akatuminwa kuti akagwasye mikwasyi eyi, imali aakabelesyegwa kumabbuku aaya asika ku K33,692,000.00. Ikusanga kwakatambulwa kuzwa mumbungano kwakali K2,585,502.00, caamba kuti 8% yalo yamali aamabbuku aaya njiili mukusangwa ambungano zyamucisi. Ibakwesu mumasi aambi mbabali mukubbadela 92% yamali aasyeede. Sena tamukonzyi kugwasya kwiinda waawo? Aaba tabali buyo bakwesu mulusyomo pe, mbaasicisima, mbantu bali mumbungano zyesu, mbanamukwasyi alimwi mbalongwe besu. Zimwi ziindi tulaluba alimwi tuyandika kuyeezyegwa, pele tusyoma kuti inga cabota naa mali woonse abbadelelwaa mbungano zyamucisi cesu cino muciindi cakulangila mbungano zili kunze lya Zambia kuti zigwasye nzizyo. Bakwesu muzisi zimbi bali mukupa kale lugwasyo lunji kusumpula mulimo mucisi cesu alimwi akupa lugwasyo kubazwakule abamwi banjililwa mapenzi akaambo kantenda. Masimpe tatweelede kulangila mbabo alimwi kutujanina mabbuku.
3 Sena tatukonzyi kugwasya kwiinda waawo? Imbungano yomwe-yomwe ilaakabbokesi kakusangila kuulilwa mabbuku amamagazini alimwi kusanga kutambulwa kutuminwa ku Sosaiti ciindi comwe amwezi. Mikwasyi minji yakalisungula kunikusanga mali aataleli kukuula magazini yomwe ciindi aciindi nobabweza mamagazini aabo. Balacita mbubwena ciindi nobabweza bbuku lyabo ipya lya Ciiyo Cabbuku Cambungano. Atwaambe kuti balagwasya mukwasyi uumbi. Mumakani aaya “umwi aumwi uleelede kupa mbuli mbwayanda mumoyo wakwe.”—2 Kor. 9:7.