Luumbulizyo Mukati ka Myaka Yone ya Nkondo
MUKATI ka myaka yone yankondo mu busena bwakali kwiitwa kuti Yugoslavia, bantu banji bakalaa buyumuyumu kapati alimwi tiibakali kukonzya kujana zintu ziyandika. Bamwi babaaba, myaanda-myaanda ya Bakamboni ba Jehova balo calusyomo bakazumanana kukomba “Leza siluumbulizyo loonse.”—2 Ba-Korinto 1:3.
Mu Sarajevo, bantu bakapenga mapenzi aambi aakukkala mudolopo pati lyakasaalidwe ciindi coonse cankondo. Malaiti, meenda, nkuni acakulya zyakaceya. Ino Mbungano ya Bakamboni ba Jehova yaku Sarajevo yakabeleka buti mubukkale bwakali kukatazya boobu? Ibanakristo kuzwa muzisi zyamunsi-munsi bakali kubikka buumi bwabo muntenda kutegwa babatolele mabbudu-mabbudu aazintu zyakubagwasya. (Amubone Ngazi Yamulindizi yamu Chichewa ya November 1 1994, amapeeji 23-7.) Alimwi bakwesu bamu Sarajevo bakali kwaabilana kufumbwa ncobakajisi, kapati bakali kubikkila maanu kwaabilana zintu zyakumuuya. Muciindi eeco cakusaalwa boobo, mulangizi Munakristo kuzwa kudolopo eelyo wakapa lipooti eyi iitobela:
“Tulailemeka kapati miswaangano yesu. Imebo amukaintu wangu antoomwe abantu bambi bali 30, tuleenda makkilomita aali 15 [mamaile aali 9] lweendo lomwe kuya kumiswaangano. Zimwi ziindi kwakali kwaambilizigwa kuti meenda alavwozegwa aciindi twanooli kumiswaangano. Ino bakwesu bakali kucita buti? Sena bakali kunga bakkala amunzi naa kuunka kumiswaangano? Ibakwesu bakali kusala kuunka kumiswaangano. Iciindi coonse bakwesu balagwasyanya; kufumbwa aumwi ncajisi, balaabana. Umwi mucizi mumbungano yesu ukkala kumanina dolopo afwaafwi asaka; aboobo cilamuubaubila kujana nkuni. Alimwi ubeleka kubbeka kujikilwa zinkwa, ikuvwola kwakwe upegwa busu bwa fulawu. Nocikonzyeka, inga ulajika munkkwa mupati akuleta aboola kumiswaangano. Yamana miswaangano notuya anze ulamupa aumwi kapaanzi.
“Kulayandika kapati kuti kunyina mukwesu naa mucizi uulimvwa kulekelezegwa. Kunyina uuzi naa nguni akati kesu uyooyandika lugwasyo aakuba mupenzi. Migwagwa yesu noyakajisi caanda umwi mucizi wakali kuciswa, bakwesu bacana-cana bazuunyene bakamukwela akalayi kumuleta kumiswaangano.
“Toonse tulatola lubazu mumulimo wabukambausi aboobo Jehova walongezya kusoleka kwesu. Wabubona bukkale bwesu bukatazya mu Bosnia, pele watulongezya kuti tuvwule—ikuvwula kwatakaliko inkondo kaitanaba.”
Mbubwena buyo amumasena ambi muli nkondo omuya mwakali mu Yugoslavia, Bakamboni ba Jehova bakkomana akuvwula kwaba, nokuba kuti bali mumapenzi mapati. Kuzwa kuopesi lya Bakamboni ba Jehova ku Croatia, kuli lipooti eeyi iijatikizya nkamu ya Bakamboni: “Ibakwesu bakkala mu Velika Kladuša bakali muciindi cikatazya ncobeni. Idolopo lyakalwanwa ziindi zinjaanji. Ibakwesu bakapandulula ciimo cabo cakutatola lubazu mutwaambo twanyika kuli basikalumamba baku Croatia, Serbia abamwi-bamwi ba Muzlimu. Masimpe bakeelede kuliyumya muzintu zinji—ikwaangwa muntolongo, kuumwa, nzala, lufwu. Nokuba boobo boonse bakazumanana mulusyomo alimwi balaa coolwe cibotu cakubona milimo yabo kailongezyegwa a Jehova.”
Nokuba kuti kuli buyumuyumu buli boobu, Bakamboni ba Jehova bamu Velika Kladuša abali mu Bihać bazumanana kukkomana akaambo kakuvwula kwaba mbobayaa bwaabila mulumbe wa Leza waluumbulizyo kuli basimukobonyina cabusungu. Basikumwaya ba Bwami basika ku 26 kuzwa mumasena aya obile baleendelezya ziiyo zya Bbaibbele zyaaŋanda zili 39!